1 Israel, koe gi dee malangilangi;

koe gi dee lodo danuaa bei denga huaadangada ange laa.

Go hiidinga koe tee hai hegau ange gi doo Maadua i de mee abodonu;

koe e llodo mmao i hagaoanga a de hine hai be se manu

i denga mommee hili huamanu alodahi.

2 Denga mommee hili huamanu ma mommee kumi uvaini

e dee maua i de haangai gilaadeu,

gai e deai naa alaadeu uvaini hoou.

3 Gilaadeu e dee nnoho naa donu i de henua o Tagi Maolunga;

Ephraim e ahe naa gi Egypt,

ma de gai mee dee gilimalali i Assyria.

4 Gilaadeu e dee hai ange naa sigidaumaha o uvaini gi Tagi Maolunga;

gai alaadeu sigidaumaha e dee hagamalangilangi donu ia.

Alaadeu sigidaumaha e bei gai a de gau hinangalosaa e gai:

dangada alodahi e gaina e dee gilimalali.

Gai nei ni mee ange donu huu gi gilaadeu;

e dee maua donu i de kave gi lo te hale o Tagi Maolunga.

5 Ni aha naa oodou e hai i de laangi o oodou daonga,

ma laangi o taonga a Tagi Maolunga?

6 Tilo, ga ola naa donu gilaadeu i de hebagi,

gai Egypt e hagabuni naa gilaadeu,

gai Memphis e danu naa gilaadeu.

Denga manu duiduia e haoli naa olaadeu goloa selevaa;

denga manu daladala e ssomo age naa i lodo olaadeu hale malo.

7 Denga laangi o de hagaduasala gu tae mai donu,

laangi e hagao ange ai hegau a dangada gu paa mai.

Haia gi iloo e Israel de mee nei.

De pelaabisi gu bei tangada lodo senga;

gai taane iai de hagasaalunga gu senga ange,

go hiidinga oodou baubau gu lagolago mmao

gai goodou gu kona mmao de hagadau kino.*Luke 21.22

8 De pelaabisi, go de ia dagitilo o Ephraim

madali dogu Maadua,

gai sele e dada ai ia gu dugu i honga ono haiava alodahi,

gai de hagadau kino gu dagodo

i lo te hale o dono Maadua.

9 Dangada gu kona donu de baubau,

bei denga laangi i Gibeah.

De Maadua e hagamaanadu naa donu olaadeu baubau,

ma de hagaduasala gilaadeu i hiidinga olaadeu haisala.*Jdg 19.1-30

10 Au ne gidee Israel

bei de hai a dahi e gidee ai laa hanu grape i de vao;

Au ne gidee oodou dubuna madagidagi

bei de gidee a dahi hanu hua o de fig i taamada.

Aagai de masavaa olaadeu ne tae mai ai gi Baal o Peor,

gai gilaadeu ne gaavange gilaadeu

gi dahi diinonga hagadookaa,

ma de hai ga hakino gee gilaadeu

bei dahi diinonga olaadeu e llodo ai laa.*Num 25.1-5

11 De mahamaha o Ephraim gu bei de manu lele e lele laa ga hano,

gu deai donu dama e haanau, gu deai e hai tama, aabe e hagadili!

12 Gai e dee galemu naa donu delaadeu haele age alaadeu dama,

gai au e kave gee naa gilaadeu, ga dae ai gi teai se gilaadeu e doe.

E vakaa naa gilaadeu,

i de masavaa oogu e hano gee mai ai i olaadeu daha!

13 De masavaa aagu ne gidee ai Ephraim,

gai ia e bei de manu se goodo somo age laa i de mommee malaelae;

aagai Ephraim e dagi mai donu ana dama

gi de mommee olaadeu e daa ai gi magau.

14 Tagi Maolunga, gaavange gi gilaadeu —

be ni aha aau e gaavange gi gilaadeu?

Haia gi ssege alaadeu dama

gai gi deai olaadeu vai uu.

15 Alaadeu hegau baubau alodahi i Gilgal

ne hai au ga kino i gilaadeu i kilaa.

Go hiidinga de baubau alaadeu hegau

au e alualu naa gilaadeu gi hulo gee mai i dogu hale.

Au e dee aloha naa donu i gilaadeu;

olaadeu dagi alodahi i de henua gu hai baasi mai.

16 Ephraim gu bei manu somo gu hagailia laa,

olaadeu aga gu mmae,

gai gu dee maua gi hhua.

Gai ga hagadili naa donu gilaadeu,

gai au ga daa gi maakau alaadeu dama hagamogomogo.

17 Dogu Maadua e tili naa gilaadeu,

go hiidinga gilaadeu tee hagallongo ange gi de ia;

gilaadeu e silivaahea saele naa i magavaa o dangada i denga huaahenua.