1 Ilihia de hanga manu i doo ngudu!

Dahi igele gu hano iho gi honga de hale o Tagi Maolunga,

go hiidinga gilaadeu gu oha dagu hagatoo donu hagaheloongoi,

ma de hai baasi ange gi agu hainga.

2 Israel e dangi mai gi de au,

“Dogu Maadua, gimaadeu e iloo goe.”

3 Aagai Israel ne hagangadi mee de mee danuaa;

dahi hagadaumee e doolohi naa ia.

4 Gilaadeu gu hili hanu hodooligi, gai au tee iloo;

gilaadeu ne hili hanu dagi o de henua, aagai au tee malangilangi ai.

Gilaadeu ne hai olaadeu diinonga i alaadeu selevaa ma goolo,

ga hidi mai ai delaadeu hagaduasala.

5 Samaria, dilia doo ⌊diinonga e hagadulagi ange laa gi de⌋ kaau!

Au e kona mmao de lili i gilaadeu.

Dee hee maa taulooloa delaadeu dee maua

i de hai gi gilimalali gilaadeu?

6 Gilaadeu ni dangada mai i Israel!

Tiinonga nei — go de labagau ne haia;

gai e dee go de Maadua abodonu.

De kaau o Samaria

e oha naa ga too dagidahi.

7 Gilaadeu ne doo de madangi,

gai e hagihagi naa hua o ssio.

Alaadeu grain e deai olaadeu hua,

gai e dee maua i de hai ai pelaoaa.

Gai noo e hanu olaadeu hua grain,

gai de gau henua gee e loomai naa ga kave.

8 Israel gu oohaa ma gu maoha;

ono dangada gu nnoho i denga huaahenua,

gilaadeu gu bei de goloa gu deai laa ono haigamaiana.

9 Gilaadeu gu hulo gi Assyria,

bei dahi donkey aada e silivaahea saele laa.

Ephraim gu hagao ange ia gi ono dau soa.

10 Gai e dee galemu donu delaadeu hagao ange gilaadeu gi denga huaahenua,

gai au gu dai hagabuni mai naa gilaadeu.

Gilaadeu gu hagadaga ange naa de sogoisi

i delaadeu hagaduasala ina i daho denga hodooligi ma dagi.

11 Ephraim ne hagatuu mommee o ssigidaumaha lagolago ange gi de haisala,

aagai mommee nei gu ni mommee o ssigidaumaha e hagahaisala ina ia.

12 Au ne sisi ange gi gilaadeu mee lagolago i dagodo agu hainga,

aagai gilaadeu ne hai hainga nei bei ni mee gee.

13 Gilaadeu e hai denga sigidaumaha mai gi de au,

ma de gai kano o manu e hai ai;

aagai Tagi Maolunga e dee malangilangi i gilaadeu.

Gai ia e dee ngalo naa donu olaadeu baubau,

ma de hagaduasala gilaadeu i hiidinga olaadeu haisala;

gilaadeu e aahe naa ga hulo gi Egypt.

14 Israel gu ngalo de ia ne haia ia,

gai gu hagatuu denga hale danuaa;

Judah gu hagalagolago ono aduhale buibui.

Aagai au e gaamai naa de ahi gi duungia ono aduhale,

gai de ahi e dudu naa ga odi denga mommee buibui makaga.