1 de masavaa aagu e lodo ai e hagaieiangi Israel,

gai gu gidee mai baubau a Ephraim,

ma hegau dee heohi a Samaria.

Gilaau ne hai hegau i de hagasenga,

de gau gaiaa e ulu gi lodo hale e gaiaa ai,

denga hagabuulinga e gaiaa mee o dangada i honga denga haiava;

2 aagai gilaadeu e tee tonu iho donu

bolo au e manadua alaadeu hegau baubau alodahi.

Alaadeu hegau baubau gu duuli gilaadeu,

gai e daakodo donu i mada luoogu mada i masavaa alodahi.

3 Gilaadeu e hagamalangilangi denga hodooligi i alaadeu dahulinga baubau,

gai e hagamalangilangi denga dagi i alaadeu muna hhadu.

4 Gilaadeu alodahi ni dangada dagodo haisala;

gai e bei dagodo o de umu mmahi

a tangada e dee ulu laa

ga dae ai gi de hhua danuaa denga pelaoaa.

5 De laangi o taonga a de hodooligi gu hagailonga,

gai denga dagi e ssenga i de unu uvaini;

gai de hodooligi gu unu hogi madali gilaadeu.

6 Olaadeu lodo e vvela bei dahi mommee dao mee;

gilaadeu e loomai ma alaadeu hagatau hagasenga.

Gilaadeu e golomagi olaadeu llili i de boo;

gai e bei de ahi ula i taiao age.

7 Gilaadeu alodahi e vvela bei de mommee dao mee;

gilaadeu e daa gi maakau olaadeu dagi.

Olaadeu hodooligi alodahi gu odi i de maakau;

gai gu deai se gilaadeu e dangidangi mai i de bale.

8 Ephraim gu hilo ma denga huaahenua;

gai gu bei de keege tee huli laa.

9 De gau henua gee gu hai gi deai ono mahi,

aagai ia e dee gidee iho donu.

Ia gu sinasinaa dono biho

aagai ia e dee iloo donu.

10 De lodo maolunga o Israel gu hagabaubau donu huu ia;

aagai mee nei alodahi tee maua i de hai ia

gi ahe gi daho Tagi Maolunga dono Maadua,

aabe ne hai ia gi saalaa ia.

11 Ephraim gu bei dahi manu kono

e lodo senga laa ma teai ana maanadu danuaa;

ia e hagahi ange Egypt

ma de hano gi Assyria.

12 Au e maga naa gilaadeu i dagu galauna,

i de masavaa olaadeu e hulo ai;

au e dada iho naa gilaadeu bei denga manu llele i lo te moana.

Au e haele naa gilaadeu bei dagodo muna gu tala ange

gi delaadeu hagabuulingaa dangada.

13 E vakaa naa gilaadeu,

go hiidinga gilaadeu gu daahuli gee i de au!

Daia gilaadeu gi maakau,

go hiidinga gilaadeu gu hai baasi mai gi de au!

Au ne lodo mmao e hagaola gilaadeu,

aagai gilaadeu e hadu muna i de au.

14 Gilaadeu tee dalodalo mai i de lodo abodonu,

aagai e tangi see i honga olaadeu moenga.

Gilaadeu ne hagalagolagohia gilaadeu i hiidinga denga grain ma uvaini hoou;

aagai gilaadeu ne daahuli gee mai i de au.

15 Au ne agoago ange gilaadeu ma de hagammahi ange gilaadeu,

aagai gilaadeu ne hai denga hagatau e hai baasi mai ai gi de au.

16 Gilaadeu e aahe mai, aagai tee aahe mai gi de au,

de Ia Maolunga Mmao laa:

gilaadeu e bei de mee hholu e deai mee e kii ange ai.

Olaadeu dagi e maakau naa i de gadilaasa

i hiidinga o alaadeu muna hagamaolunga.

Gilaadeu e hagadookaa ina naa

i de henua go Egypt i hiidinga o de mee nei.