14
1 Tagi Maolunga e lodo aloha ange naa gi Jacob;
ia e ahe ange naa e hili Israel
ma de hai gilaadeu gi nnoho i delaadeu henua.
De gau henua gee e loomai naa ga dau ange gi gilaadeu,
ma de hagabuni ange gi dangada o Jacob.
2 Denga huaadangada e kave naa gilaadeu,
ga hagaahe gi delaadeu mommee donu.
Gai de gau Israel e henua naa i denga huaahenua,
bei denga daane ma haahine hai hegau,
i de henua o Tagi Maolunga.
Gilaadeu e hagadee kii naa dangada ne hagadee kii ina gilaadeu
ma de dagi gilaadeu nogo vaivai haia gilaadeu.
3 De laangi laa gai Tagi Maolunga e hai naa gi ilaage goodou mai i de hagaduasala, ma de hai ngadaa, aama doodou hagahai hegau ina, 4 gai goodou e hua ange naa taahili hagammae manava nei gi de hodooligi o Babylon:
“De ia e vaivai haia dangada gu lilo!
Dono lili mmahi gu tuu!
5 Tagi Maolunga gu hhadi de laagau a tangada baubau,
ma togo o denga dagi,
6 go de mee alaadeu e daa ai dangada
i hanonga lagolago i delaadeu llili,
ma de dagi denga huaahenua i de lili,
aama tee tuu de vaivai hai gilaadeu.
7 Henua i lalo alodahi gu mmabu ma de nnoho paba,
gilaadeu gu oo ma gu daahili.
8 Denga cypress e malangilangi hogi i de goe,
denga cedar o Lebanon e hagataba,
‘Mai i de masavaa oou ne hagamaolalo ina ai,
gai gu deai donu se dangada e selea iho gimaadeu.’
9 De mommee o de gau maakau i lalo de gelegele
gu hidi age e hedae adu gi de goe i doo dae gi kilaa;
hagasaalunga o de gau maakau gu hiihidi age e hedae adu —
gilaadeu alodahi nogo dagina henua i lalo;
gu hai gi hiihidi age mai i olaadeu nohoanga —
go gilaadeu alodahi nogo hodooligi i denga huaahenua.
10 Gilaadeu alodahi e pasa adu naa,
gilaadeu e hai adu naa,
‘Koe gu baageaa hogi, bei omaadeu dagodo;
koe gu bei donu gimaadeu.’
11 Doo mahamaha alodahi gu tili iho gi de mommee o de gau maakau,
madali leo o au harp e hagadangidangi ai;
denga ilo gu tolo i doo mommee e dagodo ai,
gai gu haoli doo angaanga alodahi.
12 Koe gu tili iho mai i de langi,
de heduu o taiao, gai go de heduu maalama laa!
Iainei koe ne tili iho gi henua i lalo,
gai koe nogo hagadee kii denga huaahenua i mua!*Rev 8.10; 9.1
13 Koe ne hagadaba i oo lodo,
‘Au e hanage naa gi dae gi de langi;
au e hai naa dogu nohoanga hodooligi
gi maolunga ange i denga heduu a de Maadua;
au e noho i honga de mounga e hagabuni ai laa
go de mommee maolunga hugadoo o de mounga dabu.*de mounga dabu, aabe go i baasi i ngaiho. *Mat 11.23; Luke 10.15
14 Au e hanage naa gi maolunga ange au i denga giliiga;
au e hai naa gi maolunga bei dagodo o de Ia Maolunga Mmao laa.’
15 Aagai koe gu gave iho donu gi de mommee o de gau maakau,
ma tagelo o de geelonga laa.
16 Dangada e gidee goe e haaina naa goe,
ma de maanadu mee gu hai adu gi de goe:
‘E dee deenei taane ne hagangalungalue ina laa henua i lalo,
ma de hai gi maatagu denga nohoanga hodooligi?
17 Gai e dee deenei taane ne haia laa henua i lalo ga se vao,
ma de oha denga aduhale nnui,
gai tee dugu de gau dee kii gi aahe gi olaadeu henua?’
18 Hodooligi alodahi o denga huaahenua
e daakodo i lodo olaadeu daanunga i de mahamaha.
19 Aagai koe e tili gee naa i lo too daanunga
bei dahi laa manu e aau laa ga tili;
koe gu haolia ma gu lilo i de gau maakau,
madali gilaadeu ne daia ga maakau i de gadilaasa,
go gilaadeu e loiho gi lodo hadu i lo te geelonga.
Koe gu bei de angaanga o tangada magau e dagadagahia laa.
20 Koe tee danu madali gilaadeu,
go hiidinga koe ne oha doo henua
ma de daa ga maakau oo dangada.
E deai naa donu dangada e manadua
hagadiilinga o dangada e haia de baubau.
21 Hagadabena ina dahi mommee e daa ai gi maakau ana dama,
i hiidinga baubau o olaadeu dubuna madagidagi;
gai gilaadeu e dee aahe ange naa donu e henua i de henua,
aabe gi haia gi dohu henua i lalo i olaadeu aduhale.”
22 “Au e hidi age naa e hai baasi ange gi gilaadeu,
go Tagi o denga hagabuulinga hebagi e hagadaba.
Au e hai naa gi ngalo de ingoo o Babylon, ma ono dangada e ola,
go denga hagadiilinga ma denga aamuli,
go Tagi Maolunga e hagadaba.
23 Au e hai naa hogi Babylon gi se mommee e nnoho ai denga owl
gai gi se mommee iai bela ma vai;
au e tahi naa Babylon i tuaanui,”
go Tagi o denga hagabuulinga hebagi e hagadaba.
Muna hagadaemaha i dagodo o Assyria
24 Tagi o denga hagabuulinga hebagi ne basa hagatoo donu, ga hai ange,
“Agu hagatau gu hai, e hagassula naa donu,
gai dagu mee gu hagamodu, e dee haisala donu.*Isa 10.5-34; Nah 1.1—3.19; Zep 2.13-15
25 Au e hagadee kii naa de gau Assyria i dogu henua;
gai au e dagadagahi naa Assyria i honga ogu mounga.
Gai dana laagau hagahai hegau e aau gee naa i honga ogu dangada,
dana mee hagauda daemaha e aau gee naa i honga olaadeu eu.”
26 Deenei de hagatau gu hagamodu ange gi henua i lalo alodahi,
gai deenei de lima ne hagaabo ange laa gi honga denga huaahenua alodahi.
27 Tagi o denga hagabuulinga hebagi gu hai dahi hagamodu,
gai goai naa e maua i de buibui gi dee hai?
Dono lima gu hagaabo,
gai goai naa e maua i de hagaahe dua?
Muna hagadaemaha i dagodo o Philistia
28 De ngadau o de hodooligi go Ahaz ne magau ai, gai muna hagadaemaha nei ne hagaago mai gi de au:*2 Ki 16.20; 2 Ch 28.27
29 De gau Philistia alodahi, goodou aude malangilangi,
i de hadi de laagau ne hagaili ai laa goodou;
go hiidinga de labodo e hagadili naa dahi labodo hagammau,
gai dana dama e lele gai e hagammau.*Jer 47.1-7; Ezk 25.15-17; Joel 3.4-8; Amos 1.6-8; Zep 2.4-7; Zec 9.5-7
30 Gai manu a de gau hagaau aloha hugadoo e gaimee i de mommee iai helii,
gilaadeu nogo duasala i mua e nnoho paba naa.
Aagai au e daa naa gi maakau oodou dama i de onge
ma oodou dangada alodahi ne ola.
31 De haitoga, koe gi dangi see; de aduhale oo ma gi dangi!
De gau Philistia alodahi, goodou gi bolebole ma de maatagu!
Go hiidinga dahi hagabuulinga hebagi bei de useahi laumalie gu humai i ngaiho,
gai e deai donu se daane iai e doo gi muli.
32 Dee hee dau hai e basa ange ai
gi de gau sui o de huaahenua laa?
Hai ange, “Tagi Maolunga gu hagaduu gi makaga Zion,
gai ono dangada nogo vaivai haia laa
e gidee naa delaadeu mommee buibui i ono daha.”