13
Muna hagadaemaha i dagodo o Babylon
1 Muna hagadaemaha i dagodo o Babylon ne hagaago ange gi Isaiah tama daane a Amoz.*Isa 47.1-15; Jer 50.1—51.64
2 Hagaduulia age dahi hagailonga i honga dahi duuduu malaelae,
gai oo ange gi gilaadeu,
ma de aloalohagi ange gilaadeu gi loomai gi ulu i haitoga o de gau aamua.
3 Au gu tala ange gi ogu dangada dabu;
au gu hagahi ogu daane hebagi gilaadeu gi hagasula ina dogu bole —
go gilaadeu e malangilangi i dogu kii.
4 Hagalaangona adu, de hagalongaa mai honga denga mounga,
bei de hevaalogi o dangada soa mmao!
Hagalaangona adu, de hellumi o denga nohoanga hodooligi,
bei de hagabuni o denga huaahenua!
Tagi o denga hagabuulinga hebagi gu hagabuni dono hagabuulinga e hebagi.
5 Gilaadeu e loomai i denga henua mmao,
ma mai i mommee alodahi i lalo de langi —
go Tagi Maolunga ma denga goloa hebagi o dono lili,
gai gilaadeu ga oha ai de henua alodahi.
6 Goodou tangi see, go hiidinga de laangi o Tagi Maolunga gu baa mai donu;
gai e dae mai naa bei de hai a de Ia Mmahi Mmao laa e oha ai laa!*Joel 1.15
7 Gai dangada alodahi e pole naa olaadeu lima,
gai dangada alodahi e maatagu naa.
8 Gilaadeu e kona naa de maatagu,
gilaadeu e mmae naa ma de manavasaa,
bei de hine gu hai laa ono hagalangona.
Gilaadeu e hagadau kalo ange naa ma de llele mouli,
gai olaadeu mada e mmea naa.
9 Tilo, de laangi o Tagi Maolunga gu dae mai donu,
gai se laangi hagaduasala, ma de bole aama de lili laumalie,
e oha ai de henua ga hai gu se ngadi mommee,
gai e daa naa gi maakau de gau haisala i kilaa.
10 Denga heduu i lo te langi
ma olaadeu hagabuulinga e dee maalama naa.
De laa e gohu naa i de masavaa e hanage ai,
gai de maasina e dee maalama naa hogi.*Ezk 32.7; Mat 24.29; Mark 13.24-25; Luke 21.25; Rev 6.12-13
11 Au e hagaduasala naa henua i lalo,
ma de gau baubau i hiidinga olaadeu haisala.
Au e hai naa gi dee llodo maolunga de gau hagamaolunga,
ma de hai gi maolalo de gau alasala e llodo maolunga laa.
12 Au e hai naa dangada gi sogoisi ange i denga goolo danuaa,
ma de sogoisi ange i goolo o Ophir.
13 Deelaa ai, au e hai naa gi ngalungalue de langi;
gai henua i lalo gi ngalue gee mai i dono duulanga,
i de laangi o de bole o Tagi o denga hagabuulinga hebagi,
ma de laangi o dono lili laumalie.
14 Dangada e bei naa dahi dia e dolohia laa,
aabe go denga ssiibi e deai selaadeu ia hagaloosi,
gai dahi ma dahi e ahe naa gi daho ono dangada,
dahi ma dahi e ahe naa gi dono henua donu.
15 Gai be goai naa huu e boogia mai, gai e velo gi magau,
gai dangada alodahi e boogia mai e daa naa ga magau i de gadilaasa.
16 Alaadeu gaagaa e dagadagahia naa ga maakau i olaadeu mada i mua;
gai goloa i lodo olaadeu hale e gaavee naa,
gai alaadeu haahine dau bodu e haia naa gi de mahi.
17 Tilo, au e hai naa gi loomai de gau Media gi hebagi ange gi gilaadeu,
go dangada e dee anga ange gi denga selevaa,
gai e dee malangilangi i denga goolo.
18 Alaadeu mee hholu e daa naa ga maakau denga dama daane,
gilaadeu e dee abodonu ange naa gi denga gaagaa,
aabe e llodo aaloha ange gi denga gauligi.
19 Babylon, de hadu hagamogomogo a denga nohoanga hodooligi,
gai go de mahamaha o de gau Babylon e hagamaolunga ai laa,
e oohaa naa e de Maadua,
bei dagodo o Sodom ma Gomorrah.*Gen 19.24
20 Gai e deai naa donu dangada e nnoho ai
i denga atangada e loomai;
e deai hogi se dangada Arab e hagaduulia dono hale malo i kilaa,
aabe ni dangada hagaloosi ssiibi
e haia alaadeu hagabuulingaa ssiibi gi hagammabu i kilaa.
21 Aagai denga manu lodo henua e nnoho naa i kilaa,
denga jackal e hhao naa lodo olaadeu hale ga hoohonu;
denga owl e nnoho naa i kilaa,
gai denga guudi de vao e saavini saele naa i kilaa.*Isa 34.14; Zep 2.14; Rev 18.2
22 Denga hyena e koo naa i lodo ono hale buibui makaga,
gai denga jackal i lodo ono hale danuaa.
Dono masavaa gu dae mai donu,
gai ono laangi e dee daulooloa naa donu.