16
1 Goodou gaavee denga ssiibi i Sela laa lodo henua,
gaavange gi tagi o de henua,
gi de mounga o tamaa hine o Zion.
2 Denga damaa hine o Moab
i denga mommee e hulo ai laa lo te vai o Arnon
e bei denga manu llele e gabagaba laa
i de masavaa olaadeu ne hai ai gi hulo gee i de hoohanga.
3 “Daalaa mai amaadeu mee e hai,
hilihilia mai demaadeu mee e hai.
Haia doo malu gi bei de boo,
i de masavaa e mmahi ai de laa i lo te laangi.
Hagamuunia gilaadeu e silivaahea saele,
gai koe gi dee hagaahea gilaadeu.
4 Dugua de gau Moab gu silivaahea saele laa gi nnoho i oodou daha;
gai buibuia gilaadeu mai i tangada e daia gilaadeu gi maakau.”
Gu dai odi de masavaa o tangada e vaivai haia dangada,
gai gu ui de masavaa e oha ai,
gai tangada alasala gu dee maaleva i honga de henua.
5 De nohoanga hodooligi e hagaduu naa i de lodo aloha;
gai dahi mai i de hale o David e noho naa ga hodooligi ai,
gai ia e hai hegau i de muna abodonu.
Ia e ssala naa de hagamodu muna i de heohi
gai e moolau dana hagasula de mee heohi.
6 Gimaadeu gu langona de hagamaolunga o Moab;
ia e kona mmao de hagamaolunga
ma de hagaamua donu huu ia,
ia e hagamaolunga ma de lodo maolunga mmao,
aagai ana muna e tuhi ai donu huu ia ni ngadi muna.
7 Deenei ai, de gau Moab, goodou tangi ssee,
gilaadeu alodahi gi tangi ssee i hiidinga o Moab.
Gilaadeu e tangi ma de hinangalosaa i denga raisin puli o Kir Hareseth,
go hiidinga gilaadeu gu maakulu.
8 Denga veelenga o Heshbon gu mmae;
denga grapevine o Sibmah gu mmae hogi.
Gai dagi o denga huaahenua
gu dagadagahia denga grapevine danuaa hugadoo,
nogo somo laa ma e dae gi Jazer
gai ono laa e tae gi lodo henua.
Olaadeu uli e ssomo ma gu nnui
gai e hulo loo ma e tae gi tai.
9 Gai au e dangi bei de dangi o Jazer,
i hiidinga o de grapevine o Sibmah.
Heshbon, Elealeh,
au e hai gi ssali adu ogu loimada gi ooluu elunga!
De malangilangi o dangada i de lleu o denga huamanu
aama de malangilangi i masavaa o de hagihagi gu dee langona.
10 Gu deai se malangilangi be se lodo danuaa i lodo veelenga iai hua lagolago;
gu deai dangada e daahili aabe hevaalogi i lodo veelengaa grape;
gai gu deai dangada e dagadagahia grape e hai ai uvaini
go hiidinga au gu hai gi tuu de hevaalogi ⌊i de malangilangi⌋.
11 Deenei ai, au gu dangi bei de harp i hiidinga o Moab,
ogu lodo gu dangi i hiidinga o Kir Hareseth.
12 Gai de masavaa o Moab e hano ai gi dono mommee daumaha,
gai ia e hagadalea donu huu ia;
de masavaa oona e hano ai e dalodalo i dono hale dabu,
gai tee maua donu ono mee ne dalodalo ai.
13 Aanei muna a Tagi Maolunga gu tala ai dagodo o Moab i mua. 14 Aagai iainei Tagi Maolunga e hagadaba, “E dolu ange naa ngadau, bei taelodo ngadau o tangada hai hegau hagao, gai de mahamaha o Moab e hagangadi mee ina naa, gai e dee galemu donu de soa ono dangada, gai e sogoisi naa donu huu ono dangada e ola, gai e baageaa.”