17
Muna hagadaemaha i dagodo o Syria ma Israel
1 Muna hagadaemaha i dagodo o Damascus.
“Tilo, Damascus e hai naa ga dee se aduhale,
aagai e oha naa ga se mommee e ngadi dagodo.*Jer 49.23-27; Amos 1.3-5; Zec 9.1
2 Denga aduhale o Aroer e deai naa dangada e nnoho ai,
gai e hai naa ga se mommee niio denga hagabuulingaa ssiibi e daakodo ai,
gai e deai naa donu dangada e haia gi maatagu gilaadeu.
3 Denga aduhale buibui o Ephraim e llilo naa,
Damascus e deai naa sono sauaa e dagi ai;
gai dangada e doe i Syria e bei naa dagodo
o de mahamaha o de gau Israel,
go Tagi o denga hagabuulinga hebagi e hagadaba.
4 De laangi laa gai de mahamaha o Jacob e lilo naa,
gai dono angaanga bedi e bangabanga naa.
5 Gai e bei naa de masavaa a tangada e duuduu ai laa grain,
gai ia ga hagihagi denga hua i dono lima —
gai e bei de masavaa a tangada e ogo ai denga grain gu lava laa i de hagihagi
i de geelonga go Rephaim.
6 Aagai e hanu hua e doe ai,
bei de olive gu hagailiili iho laa ono hua,
gai e lua be dolu hua e doe i denga laa i de ulu,
aabe haa be lima hua i denga laa ange laa,”
go Tagi Maolunga, de Maadua o Israel e hagadaba.
7 De laangi laa gai dangada e tali ange naa de ia ne haia gilaadeu,
ma de daahuli ange naa gi de Ia Dabu o Israel.
8 Ia e dee galo ange naa donu gi denga mommee o ssigidaumaha,
go mee ne hai i luoono lima,
ia e dee daumada naa denga duludulu laagau o Asherah,
ma mommee o ssigidaumaha o mee maanongi,
aana ne hagatuu i luoono lima.
9 De laangi laa gai olaadeu aduhale mmahi, e bei naa mommee o de gau Hiv ma de gau Amor*de gau Hiv ma de gau Amor: muna nei go lo te Beebaa Greek iai. De Beebaa Hebrew e hai ange go lodo mee muimui ma ulu o denga manu ssomo ne tili laa i hiidinga o de gau Israel; mommee alodahi e ngadi daakodo naa.
10 Goodou gu ngalo de Maadua doodou Ia Hagaola;
goodou tee manadua de Baba ne buibuia goodou.
Deelaa ai, e dee galemu donu doodou doo manu danuaa,
ma denga grapevine ne sigi mai i denga henua gee;
11 gai ga haia naa donu e goe ga ssomo i de laangi laa aau e doo ai,
ma de hai ga loage olaadeu huaala i taiao aau ne doo ai,
gai e deai donu mee e hagihagi ai,
i de laangi o taemaha ma de mmae e dee maua laa gi ieiangi.
12 Hagalaangona adu de hagalongaa o denga huaahenua soa;
olaadeu leo e bei de saamumu o denga beau!
Hagalaangona adu de hellumi o denga huaadangada;
gilaadeu e haganngolo bei tai laumalie!
13 Gai ga hagalongaa naa donu denga huaahenua
bei de haganngolo o denga vai lagolago,
aagai de Maadua e hagasee gilaadeu,
gai gilaadeu e saavini naa ga hulo,
bei denga gili grain i honga mounga, e ilihia laa i de madangi,
ma de mama o de gelegele a de madangi e ili laa ga kave.
14 Tilo, de mee hagamaatagu gu hai i de ahiahi!
Gai i mua de ao de mee, gai gu ui!
Deenei tuuhanga o dangada e gaavee adaadeu mee,
ma hagaoanga o dangada e gaiaadia odaadeu mee.