19
Muna hagadaemaha i dagodo o Egypt
1 Muna hagadaemaha i dagodo o Egypt.
Tilo, Tagi Maolunga e gage i honga dahi giliiga gemo,
gai ia e humai naa gi Egypt.
Denga diinonga o Egypt e bolebole naa i mada luoono mada,
gai dangada o Egypt e manavasaa naa olaadeu lodo.*Jer 46.2-26; Ezk 29.1—32.32
2 “Au e hai naa de gau Egypt gi hagadau hebagi:
dahi dangada e hebagi ange naa gi dono daina,
dahi dangada e hebagi ange naa gi tangada e baa ange gi de ia,
dahi aduhale e hebagi ange gi de aduhale ange laa,
dahi nohoanga hodooligi e hebagi ange gi de nohoanga hodooligi ange laa.
3 De gau Egypt e baageaa naa olaadeu lodo,
gai au e hai naa gi dee ssula alaadeu hagatau;
gilaadeu e ssala naa de bale mai i daho denga diinonga ma hagasaalunga o de gau maakau,
ma denga hilohilo ma eidu aama gilaadeu e pasa ange gi denga hagasaalunga.
4 Au e dugu ange naa de gau Egypt gi dahi dagi e vaivai haia laa dangada
gai dahi hodooligi hagamaatagu e dagi naa gilaadeu,”
go de Ia Aamua, Tagi o denga hagabuulinga hebagi e hagadaba.
5 Denga vai o Nile e masa naa,
gai lo te vai laa e masa bagubagu naa.
6 Gai ono aasanga e pilo naa;
denga saalingaa vai o Egypt e maamasa naa.
Denga aalege ma helii i kilaa e mmae naa,
7 aama denga manu ssomo e doo i luu baasi de Nile,
ma manu i de gabugabu o de Nile.
Veelenga alodahi i luu baasi o de Nile
e mmae naa ga ilihia saele.
8 Denga daane haangoda e tangi naa ma de hinangalosaa,
dangada alodahi e haangoda i lo te saalingaa vai go Nile;
ma gilaadeu e magaa tae i honga de vai
e mmade ange naa olaadeu aalanga.
9 Dangada e haia malo i denga flax
ma gilaadeu e laangaa denga malo tea e deai naa selaadeu tali.
10 Dangada e laangaa malo e lodo baageaa naa;
gai de gau hai hegau alodahi e manavasaa naa.
11 Denga dagi o Zoan ni dangada donu ssenga;
de gau heiangi e balea ange hagasaele a Pharaoh,
ni ngadi hagasaele alaadeu e bale ange ai ia.
Gai dee hee ai naa doodou hai e maua ai i de hai ange gi Pharaoh,
“Au go dahi daane heiangi,
go dahi daane hai hegau o denga hodooligi madagidagi”?
12 Gai i hee iai oo daane heiangi iainei?
Gilaadeu gi hagaagona adu ma de hai gi iloo e goe
mee a Tagi o denga hagabuulinga hebagi
gu hagamodu e hai baasi ange ai gi Egypt.
13 Denga dagi o Zoan ni dangada donu ssenga,
gai dagi o Memphis*Memphis: de Beebaa Hebrew e hai ange go Noph. gu hagasengalia;
go gilaadeu duludulu o dangada,
aagai gilaadeu gu dagi gee Egypt.
14 Tagi Maolunga gu gaavange
de hagasaalunga e haia laa gilaadeu gi ssenga ange;
gilaadeu gu hai Egypt gi bei dagodo o tangada senga
e ssee saele laa i lodo ono hagalueia.
15 Egypt gu deai ana mee e maua i de hai;
go de biho be go ssugi,
go de lau o de palm be go de aalege gu ni ngadi mee.
16 De masavaa laa gai de gau Egypt e bei naa dagodo o denga haahine. Gilaadeu e bolebole naa ma de maatagu i de hagaabo de lima o Tagi o denga hagabuulinga hebagi e hai baasi ange ai gi gilaadeu. 17 Gai de henua o Judah e hai naa ga maatagu de gau Egypt. Dangada alodahi e langona dagodo o Judah e maatagu naa, i hiidinga mee a Tagi o denga hagabuulinga hebagi gu hagatau e hai baasi ange gi gilaadeu.
18 De laangi laa gai e lima aduhale o Egypt e pasa i muna Canaan, ma de hagaheloongoi ange gi Tagi o denga hagabuulinga hebagi. Dahi aduhale laa e hagaingoo ange naa go de Aduhale o de Oha.†de Aduhale o de Oha, aabe go de Aduhale o de Laa.
19 De laangi laa gai e dahi naa mommee o ssigidaumaha ange gi Tagi Maolunga i Egypt, ma dahi mee e hagamaanadu ai Tagi Maolunga i de ngaadonga o de henua. 20 Gai de mee laa se hagailonga gai se mee e tala ai dagodo o Tagi o denga hagabuulinga hebagi i de henua go Egypt. Gai de masavaa naa huu olaadeu e tangi ange ai gi Tagi Maolunga i hiidinga delaadeu vaivai haia, gai ia e gaamai naa dahi gi balea ange ma de hagaola gilaadeu. 21 Gai Tagi Maolunga e hai naa gi iloo e de gau Egypt ono dagodo, gai gilaadeu e iloo naa Tagi Maolunga i de laangi laa. Gilaadeu e daumaha naa ma de hai denga sigidaumaha dudu ma sigidaumaha o grain; gilaadeu e hagatoo donu ange naa gi Tagi Maolunga ma de hagassula alaadeu hagatoo donu. 22 Gai Tagi Maolunga e gaamai naa dahi mee hagamaakau gi Egypt; ia e hagammae naa gilaadeu ga lava ga hagaieiangi gilaadeu. Gai gilaadeu e aahe mai naa gi Tagi Maolunga, gai ia ga basa ange gi alaadeu dangidangi ga hagaieiangi gilaadeu.
23 De masavaa laa gai e dahi haiava laumalie e humai naa i Egypt ga hano gi Assyria. De gau Assyria e loomai gi Egypt, gai de gau Egypt e hulo gi Assyria. Gai de gau Assyria ma de gau Egypt e hagabuni naa ga daumaha. 24 De masavaa laa gai Israel e hai naa go togodolu, madali Egypt ma Assyria, gai e hai naa ga se manuuia niio henua i lalo. 25 Gai Tagi o denga hagabuulinga hebagi gu hagamanuuia naa gilaadeu, ga hai ange, “E manuuia ogu dangada go de gau Egypt, ma de gau Assyria aagu ne hai laa i luoogu lima donu, aama de gau Israel, dogu boolonga.”