20
Muna hagadaemaha i dagodo o Egypt ma Ethiopia
1 De ngadau a Sargon de hodooligi o Assyria, ne hai ai gi humai tagi o denga daane hebagi, gi hebagi ange ma de hagadee kii de aduhale go Ashdod — 2 de masavaa laa gai Tagi Maolunga ne hai ange gi Isaiah tama daane a Amoz, “Hagauia oo malo daladala ma oo mee vae.” Gai Isaiah ne hai ga bei muna laa, ia ne gilisau ma de aau ono mee vae ga hano saele ai.
3 Gai Tagi Maolunga ne hagadaba, “Gai e bei de hai o dogu dangada hai hegau go Isaiah e gilisau ai laa ma teai ono mee vae ga hano saele ai i e dolu ngadau, e hai ai dahi hagailonga ma de mee hagalele mouli ange gi Egypt ma Ethiopia, 4 gai e bei ai hogi, de hodooligi o Assyria e aau gee naa malo ma mee vae o de gau Egypt, ma de gau Ethiopia ga kave gilaadeu gi olaadeu henua, gai dae o denga gauligi ma de gau maatua e hai naa ga ssula mai — e hagadogaa ai Egypt. 5 Gai dangada e tali hagalodolodo ange gi Ethiopia ma de tuhi Egypt e maatagu naa ma de dookaa. 6 De laangi laa gai dangada e nnoho i tagudai e hagataba naa, ‘Kalo ange diiloo mee gu hai ange gi dangada adaadeu ne tali ange laa aagena, ma de hulo gi olaadeu daha e kave ai de bale, ma de hai gi ola gidaadeu mai i de hodooligi o Assyria! Gai dee hee ai naa taadeu hai e ola ai?’ ”