21
De oha o Babylon
1 Muna hagadaemaha i dagodo o de Vao i gaogao Tai.
Dahi hagadaumee e humai naa i de vao,
ma mai i dahi henua hagamaatagu,
bei denga sio e ssau mai laa i de Negev.
2 Dahi midi hagaduasala ne hagaago mai gi de au:
tangada adi longo e hagabaubau dangada,
tangada e gaavee goloa e kave goloa e maua i de hebagi.
Elam, hanage oohaa! Media, duuli ina luu baasi!
Au e hai naa gi tuu hagaduasala alodahi.
3 Deenei ai, au gu kona mmao dogu manavasaa ma de mmae,
au gu mmae, bei de hine gu hai laa ono hagalangona;
au gu ino gi lalo i hiidinga o agu mee gu langona,
ma de madagu i agu mee gu gidee.
4 Ogu lodo gu manavasaa,
gai au gu bolebole i dogu madagu;
de maalama aagu e tali laa
gu sui ma gu se mee hagamadagu mai gi de au.
5 Gilaadeu gu hagadabena denga deebele,
gilaadeu gu hhola mee e nnoho ai dangada,
gilaadeu gu gaimee ma de unu!
Denga dagi, goodou hiihidi age,
hagalollolo ina denga mee hungihungi!
6 Gai de Ia Aamua laa ne hai mai gi de au,
“Hannoo haia dahi dangada gi duu gi dagitilo,
gai ia gi hagailoo ina mee aana e gidee.
7 De masavaa naa huu aana e gidee ai denga hada hebagi
ma denga hagabuulingaa hoosa,
ma gilaadeu e kage i honga donkey,
ma gilaadeu e kage i honga gamelo,
gai ia gi kana ange gi dagidiiloo,
ia gi kana ange gi dagidiiloo.”
8 Gai tangada dagitilo ne oo ga hagadaba,
“Dogu dangada aamua, laangi alodahi, gai au e duu i de mommee dagitilo;
boo alodahi gai au e duu i dogu mommee.
9 Tilo, hanu dangada e kage i honga hoosa gu loomai,
gai denga hoosa e hagatau dagilua.”
Gai tangada dagitilo ne basa ange,
“Babylon gu maoha, Babylon gu maoha!
Denga diinonga alodahi o olaadeu maadua
gu maoha ma gu daakodo i honga de gelegele.” *Rev 14.8; 18.2
10 Ogu dangada gu dagadagahia ma de nonu
i de mommee hili huamanu,
au e hagailoo adu gi goodou agu muna gu langona
mai i daho Tagi o denga hagabuulinga hebagi, de Maadua o Israel.
Muna hagadaemaha i dagodo o Edom
11 Muna hagadaemaha i dagodo o Dumah.*Dumah i muna Hebrew e bei gi dee muu. Dumah e dagu bei Edom i muna Hebrew.
Dahi dangada e oo mai i Seir, ma e hai mai,
“Tangada dagitilo, go aahee maa e ao ai de mee?
Tangada dagitilo, go aahee maa e ao ai de mee?”
12 Gai tangada dagitilo ne hai ange,
“Gu baa ange donu gi de ao de mee,
gai de boo e dae mai naa donu hogi.
Noo koe e lodo e ssili, gai koe siilia;
ahe mai ange siilia!”
Muna hagadaemaha i dagodo o Arabia
13 Muna hagadaemaha i dagodo o Arabia.
Goodou de gau Dedan e hagadaga saele laa,
goodou e nnoho i de vao o Arabia i de boo.
14 Dangada e nnoho i de henua go Tema,
goodou gaamai vai e unu gilaadeu e hieunu,
ma pelaoaa e gaimee ai gilaadeu e silivaahea saele.
15 Gilaadeu e saavini ga hulo gee i de gadilaasa,
ma mai i de gadilaasa gu dada mai laa e daa ai gilaadeu gi maakau,
ma mai i de mee hholu e tili ai laa tao,
aama mai i de hebagi hagamaatagu.
16 Gai de Ia Aamua ne hai mai gi de au, “Dahi ngadau nei, bei de hai e dau ai laa de ngadau e hagahai hegau ai tangada, gai de mahamaha o Kedar e lilo naa hogi. 17 Gai denga daane e dilia mee hholu e ola laa, go denga daane hebagi o Kedar e sogoisi naa donu.” Go Tagi Maolunga de Maadua o Israel e hagadaba.