22
Muna hagadaemaha i dagodo o Jerusalem
1 Muna hagadaemaha i dagodo o de Geelonga o Midi Hagaago.
Ni aha gu hai naa,
gai goodou alodahi ga kage age ai gi tua denga hale?
2 De aduhale hagalongaa,
koe se aduhale hakoso e hai ai daonga hagalongaa?
Oo dangada maakau tee daia i de gadilaasa,
aabe ne maakau i de hebagi.
3 Oo dagi alodahi gu odi i de saavini ma gu hulo,
gilaadeu ne booboogia gai teai donu mee hholu alaadeu ne tili.
Goodou alodahi ne booboogia laa gu noonoodia,
e dee galemu donu doodou saavini ga mmao gee i de hagadaumee.
4 Deenei ai, au e hagadaba, “Goodou hulo gee mai i ogu daha;
dugua donu huu au gi dangi see.
Aude hagaaneane ina mai au,
i dogu dangi i de oohaa o de aduhale o ogu dangada.”
5 De Ia Aamua, Tagi o denga hagabuulinga hebagi
gu hagadabena dahi laangi hagalongaa,
ma de hagadee kii aama de hagamaatagu,
i lo te Geelonga o Midi Hagaago ange,
se laangi e oha ai de buibui o de aduhale,
ma de oo ai o dangada i lodo mounga.
6 Denga daane hebagi o Elam e hagauda mee hhao dao o de mee hholu,
gilaadeu e loomai madali denga hada hebagi ma hoosa;
Kir gu dada mai de mee hungihungi.
7 Oo geelonga hhua lagolago gu hoohonu i denga hada hebagi,
gai denga daane e kage i honga hoosa e duuli naa denga haitoga o de aduhale;
8 denga buibui o Judah gu aau gee naa.
De laangi laa gai koe e tali hagalodolodo ange naa
gi denga goloa hebagi i de Hale i Lodo Henua,
9 gai goodou ne gidee hogi bolo gu lagolago mommee maoha
i de buibui o de Aduhale o David.
Goodou ne hhao denga vai
i lo te mommee hao vai e mua gi lalo.
10 Goodou ne dau denga hale i Jerusalem
gai ne oha iho denga hale e hagamakaga ai de buibui.
11 Goodou ne geli dahi valavala i magavaa luu buibui
moo denga vai mai i de Vai Duai,
aagai goodou tee anga ange donu gi de ia ne haia de mee nei;
goodou tee hagadubu hogi de ia ne hagatau ina de hegau nei madagidagi loo.
12 Gai de Ia Aamua, Tagi o denga hagabuulinga hebagi
ne hagahi naa goodou i de laangi laa
gi tangi ma de tangi see
ma de dahi gi malali oodou biho,
aama de kahu i malo daladala.
13 Aagai tilo, goodou e daonga i de malangilangi ma de hagalongaa,
goodou e daa naa denga kaau ma ssiibi ga gai ma de unu uvaini.
Goodou e hagataba, “Gidaadeu ga gaimee ma de unu uvaini,
go hiidinga daiao gai gidaadeu e maakau!” *1 Co 15.32
14 Gai de Ia Aamua, Tagi o denga hagabuulinga hebagi ne tala mai de mee nei gi langona e au: “Ni muna abodonu, au e dee degi adu donu gi goodou i de baubau nei, ga dae ai gi doodou maakau,” go de Ia Aamua, Tagi o denga hagabuulinga hebagi e hagadaba.
15 De Ia Aamua, Tagi o denga hagabuulinga hebagi ne hai mai:
“Hannoo daalaa ange muna nei gi Shebna,
taane e diiloo ange de hale o de hodooligi:
16 Ni aha aau e hai naa i kinei,
gai goai ne gaavadu gi de goe ssauaa
e tuu ai dahi daanunga moou i kinei,
ma de hoda ai dahi daanunga i de mommee maolunga i lo te baba?
17 Tilo, Tagi Maolunga gu dai poo naa goe ga maga, e taane mmahi.
18 Ia e kumi naa goe ga hagamoe be se buu
ga maga gi dahi henua laumalie.
Gai koe e magau naa i kilaa,
gai oo hada hebagi mahamaha e kave naa hogi gi kilaa —
koe gu hagadogaa de hale o doo dangada aamua.
19 Au e aau gee naa goe i dau hegau, ma doo duulanga maolunga.
20 De masavaa laa gai au e hagahi naa dogu dangada hai hegau go Eliakim tama daane a Hilkiah, 21 ga hakahu ia i doo malo laa daha ma de nnoa dono ungaalodo i doo mee nnoa ungaalodo. Gai au e gaavange naa gi de ia doo duulanga ma doo sauaa. Gai ia e hai naa go tamana o dangada o Jerusalem ma Judah. 22 Au e hagauda ange naa gi honga dono eu de gii o de hale o David; gai dana mee e hhuge e deai donu e maua i de pono, gai dana mee e pono e deai donu e maua i de hhuge.*Rev 3.7 23 Au e hagamakaga naa dono duulanga bei de neele gu tugi laa ma gu hagamakaga, gai ia e hagamahamaha naa de ingoo o dono huaabodu. 24 Gilaadeu e hagauda ange naa gi de ia de mahamaha alodahi e huahua ai i dono huaabodu; go denga aamuli ma hagadiilinga, ma denga gumedi vaaligiligi alodahi, mai i denga ubu ga dae ai loo gi denga ssaa hao vai.
25 E hagadaba Tagi o denga hagabuulinga hebagi: De laangi laa gai de laagau hagamakaga gu tugi laa ma gu makaga e mounu mai naa; gai e tuu naa ga doo, gai de mee e hagalau ange laa aagena e doo iho naa.” Go Tagi Maolunga e hagadaba.