23
Muna hagadaemaha i dagodo o Tyre
1 Muna hagadaemaha i dagodo o Tyre.
Denga vaga o Tarshish, goodou tangi see!
Go hiidinga Tyre gu maoha ma gu ngadi dagodo,
gu deai donu se hale be se ava i kilaa.
Gai ne hagailoo mai gi gilaadeu mee nei
i de henua go Cyprus.*Ezk 26.1—28.19; Joel 3.4-8; Amos 1.9-10; Zec 9.1-4; Mat 11.21-22; Luke 10.13-14
2 Dangada e nnoho i tagudai, goodou nnoho ma gi dee mmuu,
gai goodou de gau hagao mee o Sidon,
go dangada e hulo saele i de moana gu hai goodou ma gu lava.
3 Gai go honga denga dai nnui
e loomai ai oodou grain o Shihor;*Shihor go dahi manga o Nile.
mee ne hagihagi i gaogao o Nile gu hagadanuaa ai a Tyre,
gai gu hai ai de mommee hagao mee o denga huaahenua.
4 Sidon, de aduhale buibui makaga i gaogao tai, koe gu dogaa,
go hiidinga tai gu hagadaba:
“Au tee hai hanu hagalangona aabe ne haanau;
au tee haele hogi hanu dama daane aabe ni damaa hine.”
5 De masavaa e dae ai de longo gi Egypt
gai dangada e manavasaa naa i hiidinga longo o Tyre.
6 Hagadae adu gi Tarshish;
dangada e nnoho i tagudai, goodou tangi see!
7 E aha, e dee deenei doodou aduhale e malangilangi ai laa,
se aduhale duai, gai gu dagodo mai huu madagidagi,
gai luoono vae gu kave ia
gi nnoho i denga henua mmao?
8 Goai ne haia de hagatau e hai baasi ange ai gi Tyre,
go de aduhale hodooligi laa,
ono gau hagao mee go dagi o de henua,
gai ni dangada hagadubulia i henua i lalo?
9 De hagatau nei nii Tagi o denga hagabuulinga hebagi
gai ia ga oha ai de mahamaha alodahi
o Tyre e hagamaolunga ai laa,
ma de hai gi hagangadi mee ina gilaadeu alodahi
e hagadubulia laa i henua i lalo.
10 Dangada o Tarshish, hagadohu ina
honga doodou henua bei dagodo o de Nile,
gu deai donu dangada e daohia goodou.
11 Tagi Maolunga gu haalo dono lima gi honga tai,
ia gu hagangalungalue denga nohoanga hodooligi;
ia gu hagadaba bolo e oha Phoenicia,†Phoenicia: de Beebaa Hebrew go Canaan.
ma ono mommee buibui makaga.
12 Ia ne hagadaba, “Koe gu dee ahe ange naa donu e malangilangi,
tamaa hine o Sidon, koe gu haia gi de mahi.
Hidi age hannoo gi Cyprus;‡Cyprus: de Beebaa Hebrew go Kittim.
gai koe e dee gidee naa donu dahi hagamaabunga i kilaa.”
13 Galo ange diiloo dagodo o de henua o de gau Babylon;
deenei de huaadangada nogo deai laa.
De gau Assyria ne hai de henua gi se mommee
e nnoho ai denga manu lodo henua;
gilaadeu ne hagatuu denga mee ne hagatuu e oha ai,
gilaadeu ne oha ga maoha ono hale maolunga.§Muna Hebrew i de gubu nei e dee iloo danuaa dono hagadoonunga.
14 Denga vaga o Tarshish, goodou tangi see,
i hiidinga doodou mommee buibui makaga gu maoha!
15 De masavaa laa gai dangada e ngalo naa Tyre i e madahidu ngadau, go ngadau o dahi e hodooligi ai. Aagai ga odi ange naa huu de madahidu ngadau, gai Tyre e hai naa ga bei muna o taahili o de hine hai be se manu:
16 “De hine hai be se manu gu hagangalo laa,
gaavee dahi harp mage seesee saele ai i lo te aduhale.
Daalea gi danuaa dau harp, ma de daahili i denga daahili lagolago,
gi manadua ai e dangada goe.”
17 Gai ga odi ange naa huu de madahidu ngadau, gai Tagi Maolunga e ahe ange ga abodonu ange gi Tyre. Gai Tyre e ahe ange naa ga hagao mee, gai ia ga hai hegau naa bei de hine hai be se manu, madali denga nohoanga hodooligi alodahi o henua i lalo. 18 Gai ana mee e mau ai ma dono hagaoanga e vvae ange naa gi Tagi Maolunga. Tyre e dee maua naa i de hagabudu e doange dono lava. Gai ana mee e maua e gaavange naa e gaimee ai ma de kahu ai gilaadeu e nnoho i mada luu mada o Tagi Maolunga.