1 Tilo, Tagi Maolunga e oha naa henua i lalo

ga hai gi se mommee e ngadi dagodo;

ia e oha naa ono elunga

ga hai gi mavaevae saele dangada iai.

2 Gai e dagodo daudahi naa donu:

tangada haimeedabu e bei naa dangada,

tangada aamua e bei naa tangada hai hegau,

de haahine aamua e bei naa de hine hai hegau,

tangada hagao goloa e bei naa tangada e hagao ina goloa,

tangada e gaavee sseene e bei naa tangada e gaavange sseene gi de ia,

tangada e muli e bei naa tangada oona e muli ange aagena.

3 Henua i lalo e oha naa ga ngadi dagodo

ma de gaavee mee alodahi iai,

4 De henua e mmasa naa ga mmae mee iai,

henua i lalo alodahi e ngadi dagodo naa ma de mmae mee ia,

gai de gau aamua o de henua e deai naa olaadeu mahi.

5 Dangada gu hai gi hakino gee henua i lalo,

gilaadeu tee daudali i denga hainga,

gilaadeu gu hagahaisala mee gu lava i de hagasauaa,

ma de oha de hagatoo donu hagaheloongoi dee ngado mai laa.

6 Deelaa ai, de malaia gu hagadohu henua i lalo,

gai dangada iai gu hagaduasala i hiidinga o olaadeu haisala.

Deelaa ai, dangada e nnoho i henua i lalo gu dudu i de ahi,

gai gu sogoisi donu huu dangada e doe.

7 Gu dai deai donu uvaini hoou, denga grapevine gu maakau;

gai dangada alodahi nogo malangilangi laa gu tangi.

8 Gai gu tuu de malangilangi ma de hagadangidangi i denga tambourine;

gu tuu hagalongaa o dangada e haia daonga,

gu dee hagadangidangi i denga harp ma de malangilangi.

9 Gilaadeu gu dee daahili i delaadeu unu uvaini;

denga mee mmahi gu mmala i de unu.

10 De aduhale gu maoha ma gu dagodo;

haitoga o denga hale alodahi gu hagamakaga gi deai dangada e ulu ai.

11 Dangada e hagabuni i honga denga haiava ma e tangi i teai uvaini;

de malangilangi alodahi gu sui ma gu se lodo baubau,

gai de lodo danuaa alodahi gu dee maleva i henua i lalo.

12 De aduhale gu maoha ma gu ngadi dagodo,

ono haitoga gu maoha ma e daakodo ai.

13 De masavaa naa huu e hai ai mee nei

i honga de henua ma daho dangada,

gai de henua gu bei de olive

gu lava laa i de luuluu ma gu malili ono hua,

ma de grape gu sogoisi laa hua e doe ai

i dua de masavaa o de hagihagi.

14 Gai dangada e doe e oo naa

ga daahili ma de malangilangi.

Gilaadeu i de baasi ange gi tai

e tuhi naa de maolunga o Tagi Maolunga.

15 Deenei ai, hagamahamaha ina Tagi Maolunga i baasi dua;

denga modu i honga tai, goodou duuhia de ingoo o Tagi Maolunga, de Maadua o Israel.

16 Gimaadeu gu langona de leo o taahili mai i luu bido o henua i lalo:

“Hagamahamaha ina de Ia Heohi laa!”

Aagai au ne hagadaba, “Au gu hagadaga mai!

Au gu hagadaga mai! Gu vakaa loo au!

De gau hadu muna e duudagi de hagabaubau!

Gilaadeu e hagadaga ange donu de hagabaubau.”

17 Dangada o henua i lalo,

de mee hagamadagu, ma geelonga, ma ssele gu paba adu gi goodou.

18 Be goai e savini ga hano i dana langona de dae mai o de mee hagamaatagu,

e doo ange naa gi lo te geelonga;

gai be goai e gage age i lo te geelonga,

e doo ange naa gi lo te sele.

Denga abaaba o de langi gu maahuge,

gai denga dagelo o henua i lalo gu ngalungaalue.

19 Henua i lalo gu odi i de maoha,

henua i lalo gu mahanga lua;

henua i lalo gu kona donu de ngalungalue.

20 Henua i lalo gu bei tangada senga,

gai gu singasinga saele i de madangi bei de baasi hale;

gai gu kona taemaha i ono baubau ma dono hagamanege,

gai gu baguu — gu dee maua donu gi duu age ange.

21 De laangi laa gai Tagi Maolunga e hagaduasala naa

denga dagi maolunga o lo te langi i lunga

ma denga hodooligi o henua i lalo.

22 Gilaadeu alodahi e dagi mai naa

bei dagodo o dangada gu hhao gi lo te geelonga;

gilaadeu e tili ange naa gi lo te hale pono

gai dua naa huu hanu laangi lagolago,

gai gilaadeu e hagaduasala.

23 De masavaa laa gai de maasina e senga ange naa,

gai de laa e dogaa naa,

go hiidinga Tagi o denga hagabuulinga hebagi e hodooligi naa

i honga de mounga go Zion aama Jerusalem,

gai ia e hagamahamaha naa i madamada o denga daane maatua o Jerusalem.