Demaadeu aduhale e makaga;

de Maadua ne hagatuu ono buibui ma ono mee hagamakaga e hagaola ai.

2 Huugea haitoga o de aduhale,

e ulu mai ai de huaahenua heohi,

go de huaahenua e hai hegau i de muna abodonu.

3 Koe e hai gi nnoho paba gilaadeu alodahi

e maanadu goe i olaadeu lodo,

i hiidinga gilaadeu e hagadonusia goe.

4 Goodou hagadonusia Tagi Maolunga ga hano ai,

i hiidinga Iahweh, Tagi Maolunga, go de Baba makaga e dee ngado mai.

5 Ia gu hagamaolalo gilaadeu e nnoho i de mommee maolunga,

ma de hai gi maolalo de aduhale maolunga;

ia e oha iho naa ga hai gi dagodo i honga de gelegele,

ma de maga iho gi lo te gelegele.

6 Vae o dangada e dagadagahi naa gi lalo —

go vae o dangada e duasala

ma vae o de gau hagaau aloha.

7 De haiava o tangada heohi e soe;

gai koe e hai naa gi soe de haiava o tangada heohi.

8 Tagi Maolunga, de masavaa omaadeu e daudali ai i au muna gu hagamodu,

gai go koe donu demaadeu tali.

Gai demaadeu mee e llodo mmao ai

go de hagadeledele danuaa o doo ingoo.

9 Ogu lodo e maanadu donu huu goe i de boo,

gai dogu hagasaalunga e oho boo e ssala goe.

De masavaa aau e hagamodu ai muna i henua i lalo,

gai dangada e nnoho i henua i lalo gu iloo e gilaadeu de mee heohi.

10 Gai ga abodonu ange naa donu dangada gi de gau baubau,

gai gilaadeu e dee maua donu i de ago de mee heohi;

gai ga nnoho naa donu gilaadeu i de henua o olaadeu e heohi,

gai gilaadeu e duudagi donu de hai hegau i de baubau,

gilaadeu e dee anga ange donu gi de maolunga o Tagi Maolunga.

11 Tagi Maolunga, doo lima gu hagaabo

aagai gilaadeu e dee gidee.

Haia gi gidee e gilaadeu doo lodo mmahi i hiidinga o oo dangada, ma de hai gilaadeu gi dookaa;

haia de ahi gu baba ange laa gi oo hagadaumee gi duungia gilaadeu.*Heb 10.27

12 Tagi Maolunga, koe gu hai gi nnoho paba gimaadeu;

gai go koe gu hagassula mee alodahi amaadeu gu hai.

13 Tagi Maolunga, demaadeu Maadua, gu hanu ange donu ne dagina gimaadeu,

aagai go koe donu huu amaadeu e hagadubu.

14 Gilaadeu gu maakau iainei, gu dee mouli ange;

olaadeu hagasaalunga gu dee mouli age ange.

Koe ne hagaduasala gilaadeu ma de hagallilo gilaadeu,

koe gu hai gi deai olaadeu hagamaanadu.

15 Tagi Maolunga, koe e hai ma gu kii ange de laumalie de huaahenua,

koe e hai ma gu kii ange de laumalie age de huaahenua.

Koe gu hagamahamaha goe i daho dangada;

koe gu hagatolo gi daha goinga alodahi o de henua.

16 Tagi Maolunga, gilaadeu ne ssala goe i delaadeu duasala;

dau masavaa ne haele ai gilaadeu,

gai gilaadeu ne dalodalo adu gi de goe.*Muna Hebrew i kinei e dee iloo danuaa dono hagadoonunga.

17 Tagi Maolunga, omaadeu dagodo i mada luoo mada

e bei dagodo o de hine hai dama gu dai haanau laa,

i dono masavaa e mmae ma de dangi i de hai ono hagalangona.

18 Gimaadeu ne hai tama, ma de mmae i omaadeu hagalangona,

aagai ni ngadi madangi donu huu amaadeu ne haanau.

Gimaadeu tee maua i de hagaola henua i lalo,

gai dangada e nnoho i henua i lalo tee hagadee kii ina donu.

19 De gau maakau e mouli age naa;

olaadeu angaanga e hiihidi age naa.

Goodou denga angaanga i lodo daanunga,

hiihidi age daahili i doodou malangilangi.

Go hiidinga oodou mouli hoou

e bei de mee suungia i taiao,

gai de gelegele e hagaahe age naa

denga hagasaalunga o de gau maakau.*Dan 12.2

20 Ogu dangada, goodou hulo ulu gi lodo oodou aabi,

ma gi bonodia ange oodou haitoga,

ga mmuni ai i dahi masavaa bodobodo,

ga dae ai gi de ui de masavaa o de bole.

21 Tilo, Tagi Maolunga gu dai sao mai naa i dono mommee

e hagaduasala dangada o henua i lalo i hiidinga olaadeu baubau;

gai gilaadeu gu daia laa ma gu maakau

e gidee mai naa i henua i lalo;

henua i lalo gu dee maua i de hagammuni

ana dangada ne daa ga maakau.