27
De hagaola o Israel
1 De laangi laa gai Tagi Maolunga e hagaduasala naa
i dana gadilaasa hagamaatagu ma de laumalie aama de mmahi,
de Leviathan, go de labodo e tolo laa,
de Leviathan, go de labodo e haganigo laa;
ia e daa naa ga magau de manu laumalie o de moana.*Job 41.1; Psa 74.14; 104.26
2 De laangi laa, gai goodou daahili
i dagodo o dahi veelengaa grape hagamalangilangi laa.
3 “Go au donu, Tagi Maolunga, e diiloo ange de veelenga laa;
au e hagamaluulu i vai i masavaa alodahi.
Gai au e hagaloosi ange i de boo ma de laangi,
gi dee humai ai dahi dangada gi vaivai haia.
4 Gai au e dee lili ai naa donu.
Mee naa gi hanu manu daladala ma manu duiduia e hai baasi mai gi de au!
Gai au ga hebagi ange gi gilaadeu;
ga dudu mee nei alodahi i de ahi.
5 Gai noo gilaadeu e llodo e hai au go delaadeu buibui,
gai gilaadeu gi hagadanuaa mai gi de au,
gilaadeu gi hagadanuaa mai gi de au.”
6 Gai Jacob e ssomo mai naa ono aga i laangi e loomai,
gai Israel e loage naa ono laa ma ono huaala,
ga loage ono hua ga hhao henua i lalo alodahi.
7 E aha, de Maadua ne hagaili laa ia,
bei dana hai ne hagaili ai dangada ne hagailiilia ia?
Aabe ne daa gilaadeu ga magau,
bei de daa ga maakau o dangada ne daia gilaadeu ga maakau?
8 Koe se hagabau donu dau alualu*Koe se hagabau donu dau alualu: muna Hebrew i kinei e dee iloo danuaa dono hagadoonunga. gilaadeu gi hulo gi dahi henua gee —
ia ne busi gilaadeu gi hulo gee i de madangi o dono ngudu,
bei de laangi e ssau mai ai de madangi i dua.
9 Deenei de hai e degi ange ai gi baubau o Jacob;
gai deenei de hai e aau gee ai ono haisala alodahi:
i de masavaa aana e oha ai denga hadu alodahi
o denga mommee o ssigidaumaha ga hai gu bei lehu,
gu deai donu duludulu laagau o Asherah e doe,
aabe ni mommee o ssigidaumaha o mee maanongi e tuu.*Rom 11.27
10 De aduhale buibui gu ngadi dagodo,
gu deai e nnoho ai, bei dagodo o de vao;
gai damaa a denga kaau e gaimee i kilaa,
ma de daakodo ai ga hagammabu,
ma de gai ga deai lau o ono laa.
11 De masavaa naa huu o ono laa vaaligi e mmasa ai, gai gu hadihadi,
gai denga haahine ga hai ai alaadeu ahi.
Gai de huaadangada nei e dee maua donu gi tonu ange,
gai de ia ne haia gilaadeu tee lodo aloha i gilaadeu;
de ia ne haia gilaadeu tee abodonu ange gi gilaadeu.
12 De laangi laa gai Tagi Maolunga e hili naa denga grain mai i ssaalingaa vai go Euphrates ga dae ai gi Ssaalingaa Vai o Egypt, gai goodou de gau Israel e bei naa denga grain e ogo dagidahi laa. 13 De laangi laa gai dahi hanga manu laumalie e ili naa. Gai dangada gu dai maakau laa i Assyria ma gilaadeu gu noonoodia laa ma gu gaavee gi Egypt, e loomai naa ga daumaha ange gi Tagi Maolunga i honga de mounga dabu i Jerusalem.