1 E vakaa naa de hau hagadubu a de gau ssenga o Ephraim e tuhi laa,

go dono mahamaha gu dai lilo bei de huaala gu mmae laa,

go de aduhale e duu laa i honga tuuduu o de geelonga iai gelegele danuaa,

go de mommee a de gau ssenga i uvaini e tuhi laa.

2 Tilo, de Ia Aamua e dahi ana ia sauaa ma de mmahi.

Bei denga duudangaa haisi ma de madangi mmahi e oohaa laa mee,

ma de langi mmahi ma de maadolu e pala iho laa,

gai ia e poo ga maga iho naa gi honga de gelegele.

3 De aduhale a de gau ssenga o Ephraim e tuhi laa

e dagadagahia naa gi lalo vae o dangada.

4 Dono mahamaha gu lilo, bei de huaala gu dai mmae laa,

go de aduhale e duu laa i honga tuuduu o de geelonga iai de gelegele danuaa,

e bei de fig e leu laa i mua de masavaa o de hagihagi —

de masavaa naa huu a tangada e gidee ai,

gai ia ga hhagi ga gai.

5 De laangi laa gai Tagi o denga hagabuulinga hebagi

e hai naa go de hau mahamaha,

gai se hau ua mahamaha

ange gi ono dangada e doe laa.

6 Ia e gaavange naa gi de ia hagamodu muna

de hagasaalunga o de hagamodu heohi,

ma de hagammahi gilaadeu e aahe mai i de hebagi gi de haitoga o de aduhale.

7 Gilaadeu nei e ssenga hogi i denga uvaini,

ma de ssee saele i de unu mee mmahi;

de gau haimeedabu ma denga pelaabisi

gu ssee saele i de unu mee mmahi ma uvaini;

gilaadeu e ssenga ange naa i de unu mee mmahi;

gilaadeu e ssee saele i delaadeu gidee denga midi,

gilaadeu gu dee maua i de hagamodu muna.

8 Deebele alodahi gu hoohonu i denga hagalueia,

gu deai donu se mommee e deai mee hakino gee iai.

9 ⌊Gilaadeu e ssili,⌋ “Goai aana e hagatale nei de agoago ange i de iloo mee?

Gai goai aana e hagadonu ange aagena ana muna?

Go denga gaagaa gu dee unu laa vai uu,

go denga gaagaa gu dee unuunu laa i de gaanuunu?

10 Gai ia e dee modu de hagaaheahe age ana muna,

go muna mau donu huu, go muna mau donu huu,

gai e tala dagimomo mai, e tala dagimomo mai.”

11 Deelaa ai, Tagi Maolunga e basa ange naa

gi de huaadangada nei i muna a de gau henua gee;*1 Co 14.21

12 go gilaadeu aana gu hai ange laa,

“Deenei de mommee hagammabu, e hagamabu ai gilaadeu e daalea,”

gai “deenei doodou hagamaabunga” —

aagai gilaadeu e dee llodo e hagallongo ange.

13 Deelaa ai, muna a Tagi Maolunga ange gi gilaadeu e bei naa donu:

e hagaaheahe ange naa, e hagaaheahe ange naa,

go muna mau donu huu, go muna mau donu huu,

gai e tala dagimomo ange, e tala dagimomo ange,

gi hulo ai gilaadeu gi baakuu saele,

gi lagolagohia, ma de noodia i ssele,

aama de noonoodia ga gaavee gee.

14 Deenei ai, denga dagi o Jerusalem e doo mee laa,

goodou hagalaangona muna a Tagi Maolunga.

15 Goodou e hagataba,

“Gimaadeu gu hai dahi hagatoo donu hagaheloongoi madali de magau,

gimaadeu gu hagaheloongoi ange gi de mommee o de gau maakau.

Gai de masavaa naa huu e dae mai ai de hagaduasala laumalie,

gai e dee maua gi duu mai gi gimaadeu,

go hiidinga demaadeu buibui go de muna hhadu,

gai demaadeu mommee mmuni go muna hagasenga.”

16 Gai e hagadaba de Ia Aamua go Iahweh;

“Tilo, au gu hagaduu dahi hadu e hai ai tagelo i Zion,

se hadu gu lava i de hagadanuaa;

gai go tuludulu o de logunga hagamogomogo, gai se dagelo makaga;

gai be goai e hagadonusia e dee hai mee hagamoolau.*Psa 118.22-23; Rom 9.33; 10.11; 1 Pe 2.6

17 Au e hai naa de hagamodu muna heohi go de uga haide mee,

gai de heohi go de mee e hagassoe ai muna;

denga dibadibaa haisi e oha naa doodou buibui, e hai laa go muna hhadu,

gai denga vai e haoli naa doodou mommee mmuni.

18 Doodou hagatoo donu hagaheloongoi madali de magau e hagadeai naa;

doodou hagaheloongoi ne hai madali de mommee o de gau maakau e dee sula naa donu.

Gai de masavaa naa huu e dae mai ai de hai ngadaa laumalie,

gai goodou e dee pau ange donu aagena.

19 Masavaa alodahi e aheahe mai ai, gai e kave gee naa donu goodou;

i daiao alodahi, ma laangi ma boo alodahi,

gai e hagamaatagu mmao i doodou tonu ange gi muna nei.”

20 De moenga e bodobodo, e dee oo ai tangada;

de malo o tangada e gahu ai e gasogaso,

e dee maua i de saabini ai tangada.

21 Tagi Maolunga e hidi age naa bei dono hidi age i de mounga go Perazim;

ia e bole naa bei dono bole i de geelonga o Gibeon,

ga hai ana hegau, go ana hegau hagalele mouli,

ma de hagassula ana hegau, go ana hegau e dagodo gee.*2 Sa 5.20; 1 Ch 14.11

22 Deenei ai, goodou aude doo mee,

kana kii ange taemaha seeini oodou e noonoa ai;

de Ia Aamua, Tagi o denga hagabuulinga hebagi,

gu tala mai gi de au dagodo de oha o de henua alodahi gu hagamodu laa.

23 Huuhuli mai hagalaangona agu muna,

gai goodou aanga mai hagalaangona agu muna e tala adu.

24 E aha, tangada e duudagi laa donu huu de hagabalabala dana veelenga?

Ia e duudagi laa donu huu de oha ma de sua age de gelegele?

25 E aha, ia e dee doo ai laa denga dill, ma cummin i kilaa,

dua dana hagasoe de gelegele;

ia e dee doo ange laa denga wheat gi dono duulanga,

barley i dono hagatauanga,

gai spelt i dono mommee?

26 I hiidinga dono Maadua e tala ange ana mee e hai,

ma de agoago ange ia i de mee heohi.

27 Denga dill e dee duuduu donu i de mee duuduu,

denga cummin e dee hai dahi hada iai hagasii gi savini laa ono elunga,

aagai denga dill e hagailiili i laa manu,

gai denga cummin e hagailiili i dahi laagau.

28 Denga grain e mmili e hai ai denga pelaoaa,

aagai tangada e dee duuduu denga hua gi daulooloa.

Ia e hai denga hagasii o dana hada duuduu gi hano laa ono elunga,

aagai ana hoosa e dee balabalasi huamanu laa.

29 De mee nei ne humai hogi i daho Tagi o denga hagabuulinga hebagi,

se ia e haia hagasaele ma de honu i de iloo mee.