29
E vakaa naa Jerusalem
1 E vakaa naa goe, Ariel, Ariel,
de aduhale o David nogo noho ai!
Goodou e hai oodou daonga i ngadau alodahi
i denga masavaa gu hagailonga.
2 Aagai au e gaamai naa dahi hai ngadaa gi Ariel,
dangada iai e tangi naa ma de hinangalosaa;
gai au e hai naa de aduhale laa gi bei Ariel.*Ariel e dagu bei de muna Hebrew de mommee o ssigidaumaha.
3 Au e duuli naa luu baasi de aduhale alodahi;
au e duuli naa luoo baasi i denga hale dagitilo
ma de hagatuu denga mee oha e hebagi adu ai gi de goe.
4 Gai koe e baguu naa gi honga de gelegele,
ma de dagodo i lo te gelegele ga basa ai.
Doo leo e basa age naa i lo te gelegele oou gu dagodo ai laa,
au muna e musumusu e loage naa i lodo gelegele.
5 Aagai oo hagadaumee soa e bei naa mama o de gelegele,
gai de gau daa dangada e loomai nei bei gili grain e ilihia laa ga gaavee gee.
Gai e daa hagalele naa donu huu,
6 gai Tagi o denga hagabuulinga hebagi e humai naa
bei de hatuli ma de ngalungalue o de henua ma de leo mmahi,
madali denga ssio ma de madangi aama de ahi e dudu ai mee alodahi.
7 Gai dangada soa o denga huaadangada alodahi e hebagi ange laa gi Ariel,
ma de hebagi ange gi de aduhale ga oha ono hale buibui makaga ga duuli luu baasi,
e bei naa donu dagodo o dahi midi,
ma dahi midi hagaago ange i de boo —
8 bei tangada saalohia e midi ange laa bolo ia e noho ma e gaimee,
aagai ga alahage huu ia, gai ia goi saalohia donu huu;
aabe go tangada hieunu e midi laa bolo ia e noho ma e unu;
aagai ia e hieunu dono huu i dono alahage, tigi helui donu dono hieunu.
Gai e bei ai hogi dagodo o hagabuulinga soa o denga huaahenua alodahi
e hebagi ange laa gi de mounga go Zion.
9 Goodou gi llele mouli, ma de ssenga ange,
haia gi dee kide goodou ma tee gidee;
goodou gi ssenga, aagai e dee ssenga i denga uvaini;
goodou gi ssee saele, aagai e dee ssenga i mee mmahi.
10 Tagi Maolunga gu hai goodou gi bei tangada seni magau:
ia gu haoli oodou ganomada (bei denga pelaabisi),
ia gu haoli oodou biho (bei dangada e daalaa mee e loomai).*Rom 11.8
11 Gai adu gi goodou, de midi hagaago ange nei e bei donu muna e sisi laa i lo te beebaa mulo gu hagamakaga laa. Gai noo dahi e gaavange gi tangada e maua i de dau, ga hai ange, “Aude haihaia, daulia de beebaa nei,” gai ia e hai ange naa, “Au e dee maua, i hiidinga gu hagamakaga.” 12 Gai noo de beebaa nei e gaavange gi dahi dangada e dee iloo de dau, ga hai ange, “Daulia de beebaa nei,” gai ia e hai adu naa, “Au e dee iloo i de dau.”
13 Gai e hagadaba de Ia Aamua:
“De huaadangada nei e hagapaa mai gi de au i olaadeu ngudu,
ma de hagadubu donu huu au i alaadeu muna e tala,
aagai olaadeu lodo e mmao gee donu i de au.
Alaadeu hai daumaha mai gi de au,
e daudali i dahulinga ne ago mai i daho dangada.
14 Deenei ai, au e ahe ange naa e hai gi llele mouli
de gau nei, i mee hagalele mouli lagolago;
gai de iloo mee o de gau iloo mee e dee maaleva naa,
gai de heiangi o de gau heiangi e lilo naa hogi.” *1 Co 1.19
15 E vakaa naa gilaadeu e hagammahi laa
e hagammuni alaadeu hagatau i Tagi Maolunga,
gilaadeu e hai alaadeu hegau i lo te gohu, ma de hagataba,
“Goai naa donu e gidee gidaadeu? Gai goai naa donu e iloo?”
16 Goodou e llui gee denga mee,
goodou e hai tangada hai gumedi gi bei dagodo o bela pigi!
Gai e maua e mee ne hai i luu lima o tangada hai gumedi i de hagadaba,
“E dee go ia donu ne haia nei au”?
Gai e maua e de gumedi hadu i de hagadaba i tangada ne haia ia,
“Ia e deai donu ana mee e iloo”?*Isa 45.9
17 E aha, e dee se masavaa bodobodo naa donu huu,
gai Lebanon gu se gelegele danuaa,
gai de gelegele danuaa laa e hai naa ga bei dagodo o lodo mee muimui?
18 De laangi laa gai de gau longoduli e langona naa muna i lo te beebaa mulo laa,
gai gilaadeu e dee kide ma de nnoho i lo te gohu
e aala naa olaadeu ganomada ga gidee.
19 Gai de gau daudonu e aahe ange naa ga malangilangi i Tagi Maolunga;
de gau hagaau aloha e malangilangi naa i de Ia Dabu o Israel.
20 Tangada e vaivai haia dangada e lilo naa donu,
gai de gau doo mee e dee maaleva naa hogi,
gai dangada alodahi e maanadu de hai de baubau e daa naa gi maakau —
21 gilaadeu e hagabuu ange ssala gi tangada i alaadeu muna,
ma de hai gi dee sula de hagamodu muna soe i de haitoga o de aduhale,
gai alaadeu muna hhadu e hai gi dee heohi de hagamodu muna o tangada heohi.
22 Deenei ai, Tagi Maolunga ne hagaola ina laa Abraham, e hagadaba i dagodo o dangada o Jacob:
“Jacob e dee ahe ange naa donu ga dogaa,
gai luoono mada e dee mada tea naa donu i dono dogaa.
23 Gai ga gidee naa huu e gilaadeu alaadeu dama,
go gilaadeu aagu ne hai i olaadeu magavaa,
gai gilaadeu ga hagadabu dogu ingoo;
gilaadeu e tala naa bolo de Ia Dabu o Jacob e dabu,
gai gilaadeu e maatagu naa i de Maadua o Israel.
24 Dangada gu haisala laa e aahe ange naa ga tonu ange;
gilaadeu e nnanu laa e hagallongo naa agu agoago.”