30
De huaahenua hagamanege
1 E hagadaba Tagi Maolunga,
“E vakaa naa denga dama hai alaadeu hai,
e haia laa hanu hagatau gai e dee bei agu hagatau,
gilaadeu e hagaheloongoi ma denga huaahenua
aagai e dee hai hegau i ssauaa o dogu hagasaalunga,
gai gilaadeu e hagalagolago olaadeu haisala.
2 Gilaadeu ne loiho gi Egypt
aagai tee hagatuu mai donu gi de au;
gilaadeu ne ssala de bale mai i daho Pharaoh,
ma de mmuni i lalo de malu o Egypt!
3 Aagai goodou e dookaa naa i doodou buibui i daho Pharaoh,
gai goodou e hagangadi mee ina naa i doodou buibui i daho Egypt.
4 Gai e dee galemu naa donu de nnoho o olaadeu dagi i Zoan,
gai olaadeu dangada sui e hulo ga tae gi Hanes,
5 gai gilaadeu alodahi e dookaa naa donu,
go hiidinga o dahi huaadangada e deai haigamaiana ange gi gilaadeu,
gilaadeu e dee bale ange donu gilaadeu
aabe e haigamaiana ange gi gilaadeu.”
6 Muna hagadaemaha i dagodo o denga manu dolodolo i Negev:
De gau sui e loomai naa gi de henua hai ngadaa ma de hagaduasala,
go de mommee iai de laiono gauligi ma de laiono mmahi, de labodo hagammau ma de labodo lele.
Gilaadeu e hagauda mai naa olaadeu lava i honga denga donkey,
gai olaadeu goloa hagamogomogo i honga denga gamelo,
gi de henua e deai ono haigamaiana ange gi gilaadeu,
7 go Egypt e deai laa ono haigamaiana, gai e deai mee iai.
Deelaa ai, au e hagaingoo ange ia go
“Rahab, de ia ngadi noho.”
De huaadangada dee hagallongo i muna
8 Hannoo siia ange muna nei gi honga dahi hadu baabaa i olaadeu madamada,
gai siia ange hogi gi lo te beebaa mulo,
gi daakodo ai i laangi e loomai
e hagadonu ai mee nei ga hano ai.
9 Go hiidinga de gau nei ni dangada hai alaadeu hai, gai ni dama e hadu muna,
gilaadeu ni dama e dee llodo e hagallongo agoago a Tagi Maolunga.
10 Gilaadeu e hai ange gi dangada e gidee mee tigi loomai,
“Goodou e dee hai gi gidee e goodou denga midi hagaago ange!”
gai e hai ange gi denga pelaabisi,
“Goodou aude pasa pelaabisi mai gi gimaadeu i de heohi!
Aagai daalaa donu huu amaadeu e llodo e hagallongo,
go muna pelaabisi e dee ni muna abodonu.
11 Goodou hulo gee i de haiava nei,
daa gee i de haiava nei,
goodou aude daalaa mai muna a de Ia Dabu o Israel!”
12 Deenei ai, e hagadaba de Ia Dabu o Israel,
“Go hiidinga goodou ne kino i muna nei,
gai ne hagadonusia hagatau a dangada
e vaivai haia ma de daahanga ina goodou,
13 deelaa ai, de baubau nei e bei naa dahi buibui maolunga
gu mahangahanga laa ma gu puu mai denga hadu iai,
gai e daa hagalele naa donu de maoha ga odi iho.
14 Gai e maoha naa bei dahi ssaa hadu ga ssii dagaligiligi;
gai e deai naa donu se dalaa mee e doe
e maua i de taa age ai hanu maga ahi i de mommee o de ahi,
aabe go de asu age ai vai i lo te mee hhao vai.”
15 E hagadaba de Ia Aamua go Iahweh, de Ia Dabu o Israel,
“Noo goodou e daahuli mai oodou lodo gi de au
ga hagammabu i ogu daha, gai goodou e ola;
i hiidinga go doodou hagammabu ma de hagadonu au oodou e mmahi ai.
Aagai goodou e dee llodo.
16 Goodou e hagataba, ‘E deai, gimaadeu e kage naa i honga hoosa e saavini ai ga hulo gee.’
Deenei ai, goodou e saavini naa ga hulo gee!
Goodou e hagataba, ‘Gimaadeu e saavini naa ga hulo
i denga honga hoosa kemo.’
Deelaa ai, gilaadeu e dolohia goodou ni dangada kemo mmao!
17 E mano goodou e saavini naa ga hulo gee
i doodou maatagu i dahi dangada sogosogo;
e dogolima dangada e hai goodou alodahi
gi saavini gi hulo i doodou maatagu,
ga dae ai gi doodou bei dagodo o dahi laagau e duu laa i ulu de mounga,
aabe go dahi hagailonga i honga dahi mounga.”
18 Aagai Tagi Maolunga e tali e abodonu adu gi goodou,
ia e baba ange e lodo aloha adu gi goodou.
Go hiidinga ia se Maadua e hagamodu muna i de heohi.
E manuuia gilaadeu alodahi e daalia ange ia.
Tagi Maolunga e abodonu
19 Dangada o Zion, e nnoho laa i Jerusalem, goodou e tuu naa doodou tangi. Ia e abodonu adu naa donu gi goodou i doodou tangi ange ia gi balea adu goodou. De masavaa naa donu huu aana e langona ai, gai ia ga basa adu gi goodou. 20 Gai ga gaavadu naa donu e de Ia Aamua gi goodou de hai ngadaa ma de hagaduasala, aagai doodou Ia Agoago e dee mmuni donu i goodou; gai goodou e gidee naa doodou Ia Agoago. 21 Gai noo goodou e taa gi de madau aabe e taa gi de masui, gai goodou e langona naa dahi leo i oodou dua e hai adu, “Deenei de haiava, goodou seesee ai.” 22 Gai goodou e oha naa oodou diinonga gu haoli i selevaa, ma oodou diinonga gu haoli i goolo; gai goodou e tili naa mee nei bei de malo hakino gee e hai ai laa magi haahine, ga hai ange, “Hannoo i kinaa!”
23 Gai ia e hai naa gi pala iho de langi, e hagamaluulu ai oodou golee e doo i lo te gelegele, gai e maua mai i honga de gelegele e moomuna naa ma de lagolago. De laangi laa gai oodou manu haangai e gaimee naa i mommee iai helii lau kohu. 24 Denga kaau daane ma donkey e hagabalabala ina de gelegele, e gai mee danuaa gu lava laa i de doha i ssavolo ma de poogo. 25 De laangi naa huu o de hebagi e daia ai laa dangada soa, ma de maoha ai de hale dagitilo maolunga, gai honga denga mounga ma duuduu maolunga iai naa denga mommee e ssali ai vai. 26 Gai de maalama o de maasina e mmahi naa bei de maalama o de laa, gai de laa e hidu naa hanonga e kii ange ai de maalama, gu bei de mmahi o de laa i e hidu laangi, i de laangi a Tagi Maolunga e saabini ai mommee maaguluaa o ono dangada, ma de hagaieiangi olaadeu mee lagolagohia aana ne hai laa ga lagolagohia.
27 Tilo, de ingoo o Iahweh e humai naa i dahi mommee mmao;
dono lili e ula bei de ahi ma de buu ai de useahi;
luoono malaungudu e hagalloa i dono bole,
gai dono alelo e bei de ahi mmahi.
28 Gai de madangi o dana manava e bei de mee mmilo,
e hanage laa ga dae age gi de ua.
Ia e luuluu naa denga huaahenua i lo te mee nonu e oohaa mee,
ia e velo ange naa gi lodo ngudu o denga huaadangada de baalanga,
ga dagi ai gilaadeu i de haiava dee heohi.
29 Aagai goodou e daahili naa
bei doodou daahili i de boo oodou e hai ai dahi daonga dabu;
goodou e malangilangi naa
bei de masavaa o dangada e ili ai denga flute,
ga daga age ai gi de mounga o Tagi Maolunga,
go de Baba makaga o Israel.
30 Gai Tagi Maolunga e hai naa gi langona e dangada dono leo maolunga,
ma de gidee de hagaabo dono lima i dono bole,
ma de ahi ula mmahi e duungia laa mee,
madali de langi pala, ma de madangi, aama dibadibaa haisi.
31 De leo o Tagi Maolunga e hai naa ga maatagu de gau Assyria;
i dana hagaili gilaadeu i dono dogo hodooligi.
32 Gai hanonga alodahi a Tagi Maolunga e hagailiili ai gilaadeu
i dana laagau hagaduasala,
gai e hai gi bei hagadangidangi o denga tambourine ma harp,
gai ia e hagaabo dono lima e hebagi ange ai gi gilaadeu.
33 Madagidagi laa gai dahi mommee gu hagadabena e dudu ai;
gai ne hagadabena ange gi de hodooligi o Assyria.
Dono geelinga ne geli gi maolalo ma de mada laumalie,
madali de ahi laumalie ma lahhie lagolago;
gai de madangi o de manava o Tagi Maolunga
e bei de maga ahi o de ahi e haia laa ga ula.