1 Tilo, dahi hodooligi e dagi naa i de heohi,

gai dagi o de henua e dagi naa i de hagamodu heohi.

2 Gai dahi ma dahi e bei naa de mommee

e buibui ai dangada i de ssau de madangi,

gai e bei denga saalingaa vai i de vao,

e bei de malu i lalo dahi hadu laumalie i de henua e deai manu e ssomo ai.

3 Gai ganomada o dangada e gidee laa gu dee pono donu,

dalinga o dangada e langona laa e hagallongo naa donu.

4 Gai maanadu a tangada e moolau ono lodo e donu ange naa,

tangada e lau dono alelo e tala ana muna ga tonu ange dangada aagena.

5 Gai tangada lodo senga e dee hagabinga bolo se dangada maolunga,

gai tangada e daahanga ina dangada e dee hagadubu.

6 Go hiidinga tangada lodo senga e basa senga,

ono lodo e hagasaele de hai de baubau;

ana hegau e dee bei lodo o de Maadua,

ia e hagadele muna hhadu i dagodo o Tagi Maolunga;

ia e dee haangai ange gilaadeu e hiikai,

ma tee hagaunu ange gilaadeu e hieunu.

7 Haingaa mee a tangada vaivai dagodo e baubau,

ia e hadu age denga hagatau baubau

e daa ai gi maakau de gau hagaau aloha i ana muna hhadu,

e dee galemu donu tangidangi a de gau hagaau aloha e heohi.

8 Aagai tangada abodonu e hai denga hagatau abodonu;

gai ia e duudagi de abodonu.

9 Goodou denga haahine e duadonu laa,

hiihidi age hagalaangona agu muna;

goodou denga haahine e nnoho paba laa,

nnoho mai hagalaangona agu muna!

10 E dahi ange naa donu huu ngadau ma hanu mee,

gai goodou e nnoho paba naa e bolebole naa;

i hiidinga gu deai donu grape e hagihagi,

gai gu deai hogi se hagihagi o denga huamanu ange laa.

11 Goodou denga haahine duadonu e bolebole naa;

goodou denga damaa hine nnoho paba e maatagu naa!

Goodou e hagaui oodou malo,

gai ga nnoa oodou ungaalodo i malo daladala.

12 Hagailiilihia oodou hadahada i hiidinga o denga veelenga danuaa,

ma denga grapevine hhua lagolago,

13 ma hiidinga o de henua o ogu dangada

gu ssomo ai daladala ma manu duiduia —

uaa, goodou tangi i hiidinga o hale alodahi oodou nogo malangilangi ai laa,

aama hiidinga o de aduhale hagalongaa nei.

14 Denga hale danuaa e ngadi daakodo naa,

de aduhale nogo hagalongaa laa e deai naa dangada iai;

denga hale buibui makaga ma hale dagitilo e hai naa ga se vao, ga hano ai,

gai se mommee e malangilangi ai denga donkey,

ma de mommee e haangai ai denga hagabuulingaa ssiibi;

15 ga dae ai gi de hano iho o de Hagasaalunga o de Maadua i de mommee maolunga,

gai de vao e hai naa ga se gelegele danuaa e ssomo ai manu,

gai gelegele danuaa e ssomo ai manu e hai naa ga se lodo mee muimui.

16 Gai de hagamodu muna heohi e dagodo i de vao,

gai de heohi e gidee naa i de mommee iai de gelegele danuaa.

17 De hagaodi o hegau o de heohi go de baba,

gai de haigamaiana o de heohi go de daudonu

ma de nnoho paba ga hano ai.

18 Ogu dangada e nnoho paba naa i olaadeu mommee,

gai e dee manavasaa olaadeu lodo.

19 Gai ga too iho naa donu denga dibadibaa haisi ga oha lodo henua,

gai de aduhale e oha ga odi,

20 gai goodou e manuuia naa donu,

i de doo gaogao denga saalingaa vai alodahi,

ma de dugu oodou kaau ma oodou donkey gi hulo saele.