1 E vakaa naa goe, de ia e oohaa denga henua,

gai tigi ai donu dangada ne oohaa ina goe!

E vakaa naa goe, tangada e dee hai hegau i de mee abodonu,

gai tigi ai donu dangada ne hagasengalia goe!

De masavaa naa huu aau e tuu ai de oha

gai koe e oohaa naa donu hogi;

de masavaa naa huu aau e tuu ai de hagasenga dangada,

gai koe e hagasengalia naa donu hogi.

2 Tagi Maolunga, koe gi abodonu mai gi gimaadeu;

gimaadeu e tali adu donu huu goe.

Go koe omaadeu mmahi i daiao alodahi,

ma demaadeu hagaola i de masavaa omaadeu e hai ngadaa ai.

3 Doo leo mmahi e hai ga saavini dangada ga hulo;

denga huaahenua e mavaevae saele i doo hidi age.

4 Denga huaahenua, oodou goloa ne hai gi de mahi,

gu odi i de gai a denga itebuubuu gauligi;

gai dangada e hai gi de mahi naa mee nei

bei hegau a denga hagabuulingaa itebuubuu.

5 Tagi Maolunga gu hagaamua, go hiidinga ia e noho i de mommee maolunga;

ia e hhao naa Zion i de hagamodu soe ma de mee heohi.

6 Gai ia e hai naa go doo dagelo makaga i de laangi laa,

ma de hagaola laumalie, ma de heiangi, aama de iloo mee.

De madagu i Tagi Maolunga se mee hagamogomogo mmao.

7 Tilo, alaadeu daane mmahi e oo naa ga tangi i honga denga haiava,

gai de gau sui e haia ga nnoho paba dangada e tangi see naa.

8 Denga haiava nnui gu ngadi daakodo,

gu deai dangada e hulo saele i honga denga haiava.

Gai de hagatoo donu hagaheloongoi gu maoha,

denga aduhale gu hagangadi mee ina;

gai gu deai donu se hagadubu o dangada.

9 De henua gu hagaaloha ono dagodo ma de ngadi dagodo,

Lebanon gu dogaa gai gu mmae;

Sharon gu bei dagodo o de vao,

gai Bashan ma Carmel gu bei denga manu ssomo gu malili laa olaadeu lau.

10 E hagadaba Tagi Maolunga,

“Iainei gai au ga hidi age nei;

iainei gai au e hagaamua naa;

iainei gai au e hai naa ga maolunga.

11 Goodou ne hai tama i denga ngadi gili grain,

gai ne haanau denga lau manu mmasa;

gai de madangi i oodou manava e dudu naa goodou bei de ahi.

12 De huaadangada e dudu naa ga bei lehu,

ma de dudu i de ahi, bei manu daladala gu duuduu laa.”

13 Goodou dangada i mommee mmao,

hagalaangona dagodo o agu mee gu hai;

goodou e nnoho i mommee e paa mai,

goodou gi tonu ange gi dagodo o ogu mahi!

14 De gau haisala i Zion gu maatagu mmao;

dangada e dee hai lodo o de Maadua gu bolebole:

“Goai de gidaadeu e maua i de noho madali de ahi e duungia laa mee?

Gai goai de gidaadeu e maua i de noho i de mommee iai de ahi e ula laa ga hano ai?”

15 Tangada e seesee i de heohi,

ma de tala de muna abodonu,

gai e kino i goloa e maua i de hai gi de mahi,

gai ia e dee kave mee ngadi gaavange hagasenga,

gai se dangada e dee hagalaangona denga hagatau e daa ai dangada gi maakau,

aama tee tilo denga dahulinga baubau —

16 deenei tangada e nnoho i mommee maolunga,

gai dono mommee mmuni go lodo hadu o de mounga.

Gai ana gai e gaavange naa gi de ia,

gai e deai donu se odi ana vai.

17 Gai koe e gidee naa de mahamaha o de hodooligi,

ma de tilo de ngaadonga o de henua i de mommee mmao.

18 Koe ne manadua de mee hagamaatagu gu hai i mua, ⌊ga hagadaba,⌋

“I hee iai tangada dau?

I hee iai tangada hagahidi sseene?

I hee iai tangada e daulia denga hale dagitilo?”

19 Gai koe e dee gidee ange naa donu gilaadeu e vaivai haia dangada,

ma dangada pasa i muna oou e dee donu ange laa aagena,

alaadeu muna e pasa ai e deai e tonu ange aagena.

20 Galo ange diiloo Zion, de aduhale o adaadeu daonga gu hagailonga;

koe e gidee naa Jerusalem,

de mommee iai de baba, gai se hale malo e dee hagangalue;

ono laagau hagamakaga e dee dada age naa donu,

gai ono daula e dee moomodu hogi.

21 Aagai go kilaa iai Tagi Maolunga taadeu Ia Maolunga.

De mommee laa e bei dahi mommee iai leevaa nnui ma saalingaa vai.

Gai e deai donu se vaga iai hoe e hulo ai,

e deai hogi vaga mmahi e dele i kilaa.

22 Gai Tagi Maolunga go demaadeu ia hagamodu muna,

Tagi Maolunga go demaadeu ia hai hainga,

Tagi Maolunga go demaadeu hodooligi;

gai go ia e hagaola ina gimaadeu.

23 Denga uga o saiolo gu daudau age,

de bou e dee hagamakaga,

gai ssaiolo tigi hagaduu e doha.

Gai denga goloa lagolago ne maua i de hebagi e duha naa;

tangada balagelage e kave naa hogi goloa aana ne gaiaa.

24 Gai e deai naa donu se dangada e noho i kilaa e hagadaba, “Au gu magi;”

gai ia e degi ange naa gi haisala o dangada e nnoho i kilaa.