1 De vao ma de gelegele e deai vai iai e lodo danuaa naa,

gai lodo henua e malangilangi naa

ma de aala ai denga huamanu bei de crocus,

2 gai ono hua manu e aala naa;

gai e oo naa ga malangilangi ma de lodo danuaa.

Gai e mahamaha naa bei Lebanon,

ma de maolunga o Carmel ma Sharon.

Gai dangada e gidee naa de mahamaha o Tagi Maolunga,

ma de maolunga o taadeu Maadua.

3 Hagammahi ina oodou lima gu ngadi daudau naa,

gai hagammahi ina oodou duli gu baageaa naa;*Heb 12.12

4 hai ange gi gilaadeu e manavasaa olaadeu lodo,

“Goodou llodo mmahi, goodou gi dee maatagu;

tilo, doodou Maadua e humai naa e sui ange de baubau,

doodou Maadua e hagao ange naa alaadeu hegau,

ia e humai naa ga hagaola goodou.”

5 De masavaa laa gai de gau dee kide e gidee naa,

gai de gau longoduli gu langona.*Mat 11.5; Luke 7.22

6 Gai de gau balagelage e ssobo naa ga llele bei dahi dia,

gai tangada lau de alelo e daahili i de malangilangi.

Denga vai e ssali age naa i lodo henua,

gai e hanu naa saalingaa vai i de vao.

7 Gai de mommee iai gelegele vvela e hai naa ga se vai,

de gelegele e deai vai iai e lagolago naa vai e ssali age ai.

Gai mommee nogo nnoho ai denga jackal,

e ssomo ai naa denga madila aama papyrus.

8 Gai e hai naa dahi haiava laumalie i kilaa,

gai e hagaingoo ange naa go de Haiava Dabu.

De gau hakino gee e dee maua donu i de seesee i de haiava laa,

gai de haiava laa se mee ange gi gilaadeu e seesee ai,

aagai de gau llodo senga e dee maua donu i de seesee i kilaa.

9 E deai naa hogi laiono i kilaa,

be ni manu alasala e loage gi ono elunga;

mee nei alodahi e dee gidee naa donu i kilaa.

Aagai gilaadeu donu huu gu hagaola e seesee i kilaa,

10 dangada a Tagi Maolunga gu hagaola e aahe mai naa.

Gilaadeu e loomai naa ga ulu i Zion ma de daahili;

gai de malangilangi e dee odi go de hau i honga olaadeu biho.

Gilaadeu e hoohonu naa i de lodo danuaa ma de malangilangi,

gai taemaha ma de daalea gu hano gee mai i olaadeu daha.