38
De magi o Hezekiah ma dono ieiangi
(2 Ki 20.1-11; 2 Ch 32.24-26)
1 De masavaa laa gai Hezekiah ne magi ga dai magau. Gai de pelaabisi go Isaiah, tama daane a Amoz ne humai gi ono daha, ga hai ange gi de ia, “E hagadaba Tagi Maolunga: Hagadabena ina mee i doo hale, go hiidinga koe e dee ieiangi naa donu gai e magau.”
2 Gai Hezekiah ga dige ga huli ange gi de baasi o de hale, ga dalodalo ange gi Tagi Maolunga, ga hai ange, 3 “Tagi Maolunga, au e dangidangi adu koe gi manadua bolo au ne hai hegau adu gi de goe i de muna abodonu i ogu lodo alodahi, ma de hai hegau i de heohi i mada luoo mada.” Gai Hezekiah ne kona mmao dono dangi.
4 Gai Tagi Maolunga ga hagaago ange ana muna gi Isaiah, ga hai ange, 5 “Hannoo hai ange gi Hezekiah, ‘E hagadaba Tagi Maolunga, de Maadua o doo dubuna go David: Au gu langona dau dalodalo, gai au gu gidee oo loimada; tilo, au e dugu adu naa goe gi mouli i e madaangahulu ma lima ange ngadau. 6 Gai au e hagaola naa goe ma de aduhale nei mai i de hodooligi o Assyria, ma de buibui de aduhale nei.
7 Gai deenei de hagailonga a Tagi Maolunga e hagadonu ai bolo Tagi Maolunga e hagassula naa donu ana muna gu tala: 8 Au e hai naa de goohunga o de laa i honga de gaagenga, gu hano iho laa i honga de gaagenga o Ahaz, gi ahe age ange gi honga e madaangahulu vae gaagenga.’ ” Deelaa ai, de goohunga o de laa ne ahe age ange i honga e madaangahulu vae gaagenga, i dua de hano ga ui gi lalo.
9 Hanu mee a de hodooligi go Hezekiah ne sisi i dua dono magi, gai muli mai gu ieiangi.
10 “Au ne hagadaba: E aha, lo te madohi lua donu huu o dogu mouli,
gai au e ulu i haitoga o de magau,
au gu dee daea adu denga ngadau e doe i dogu mouli?
11 Au ne hagadaba: Au e dee gidee ange naa donu Tagi Maolunga,
i de henua o dangada e mouli laa;
au gu dee ahe ange e gidee dahi dangada,
aabe e nnoho madali dangada e nnoho i henua i lalo nei.
12 Dogu mommee noho gu aau gee
bei de hale malo o dahi dangada hagaloosi ssiibi.
Dogu mouli gu tuu bei hegau a tangada langa mee;
ia gu aau gee au mai i de laagau langa mee;
de laangi ma de boo gai koe e hai gi hagadagadaga iho dogu mouli.
13 Au ne tali de dae mai o taiao,
aagai ia ne hadihadi ogu ivi alodahi bei tagodo o de laiono,
mai i de laangi ga dae ai gi de boo,
gai koe e hai gi odi dogu mouli.
14 Au e goo naa bei de swallow, ma de crane,
au e goo naa bei de manu kono.
Luoogu mada gu daalea i de galo age gi de langi,
dogu Ia Aamua, au gu duasala, balea mai au!
15 Aagai aahee agu muna e maua i de tala adu?
Ia gu tala mai mee nei gi de au, gai go ia donu ne haia de mee nei.
Au e seesee i de lodo maolalo i ngadau alodahi oogu e mouli ai,
i hiidinga de kona de duasala ogu lodo.
16 De Ia Aamua, dangada e mouli i mee nei,
go mee nei hogi a dogu hagasaalunga e gidee ai de mouli.
Koe gu hagaieiangi au
ma de dugu mai au gi mouli.
17 Tilo, ne hanu donu haigamaiana
de kona dogu hagaduasala i de mee nei.
Koe ne aloha i de au ga daohi dogu mouli
mai i de mommee o de gau maakau;
koe gu huli ange doo dua gi ogu haisala alodahi.
18 De mommee o de gau maakau
e dee maua i de hagaahe adu de abodonu gi de goe;
gilaadeu gu loiho gi de mommee o de gau maakau
e dee maua i de tali hagalodolodo adu gi doo hai hegau i de mee abodonu.
19 Go tangada e mouli, go tangada e mouli, e hagaahea adu de abodonu gi de goe,
bei ogu dagodo anailaa nei;
go denga damana e daalaa ange gi alaadeu dama
dagodo o doo hai hegau i de muna abodonu.
20 Tagi Maolunga e hagaola donu au;
gai gimaadeu e daahili naa ma de tale mee hagadangidangi iai daula,
i taulooloa omaadeu laangi e mouli ai,
i de hale o Tagi Maolunga.”
21 Isaiah ne hai ange, “Haia hanu fig mmasa ma gi hulu ina ange gi doo hagahoa, gi ieiangi ai goe.”
22 Gai Hezekiah ne ssili ange, “Dee hee de hagailonga e hagadonu ai bolo au e hanage gi de hale o Tagi Maolunga?”