39
De gau sui mai i Babylon
(2 Ki 20.12-19)
De masavaa laa gai Merodak-Baladan, tama daane a de hodooligi o Babylon go Baladan, ne gaamai hanu leda ma dahi mee ngadi gaavange gi Hezekiah, go hiidinga ia gu langona bolo ia nogo magi gai gu ieiangi. Gai Hezekiah ga abodonu ange gi gilaadeu, ga hagaago ange gi gilaadeu goloa alodahi i lodo ono hale doange goloa: go selevaa, ma goolo, ma mee manongi, ma lolo danuaa, ma dono mommee doange goloa hebagi alodahi, go mee alodahi i lodo ono hale doange. Teai donu se mee i dono hale aabe go dono nohoanga hodooligi a Hezekiah tee hagaago ange gi gilaadeu.
Dua mee laa gai de pelaabisi go Isaiah ne humai gi daho de hodooligi go Hezekiah, ga hai ange gi de ia, “Aahee muna a denga daane laa ne hai adu gi de goe? Gai go hee olaadeu ne loomai ai laa?”
Gai Hezekiah ga hai ange, “Gilaadeu ne loomai i de henua mmao go Babylon.”
Gai Isaiah ne ssili ange, “Ni aha alaadeu ne gidee laa i doo hale?”
Gai Hezekiah ne hai ange, “Gilaadeu ne gidee mee alodahi i dogu hale; teai donu se mee daudahi i lodo ogu mommee doange, aagu tee hagaago ange gi gilaadeu.”
Gai Isaiah ga hai ange gi Hezekiah, “Noho mai hagalaangona muna a Tagi o denga hagabuulinga hebagi: Tilo, dahi laangi naa huu gai mee alodahi i doo hale, ma goloa alodahi a oo dubuna ne hagabudu laa ga doange ga dae mai ai gi anailaa nei, e moolia naa ga gaavee gi Babylon. Gai e deai naa donu se mee daudahi e doe, go Tagi Maolunga e hagadaba. Gai hanu au dama daane ne hagadili e gaavee gee naa hogi, ga hai ai denga eunuch i de hale o de hodooligi o Babylon.” *Dan 1.1-7; 2 Ki 24.10-16; 2 Ch 36.10
Gai Hezekiah ga hai ange gi Isaiah, “Muna a Tagi Maolunga aau gu tala mai naa e danuaa.” Go hiidinga Hezekiah ne maanadu, “Taulooloa o dogu mouli gai de henua e nnoho paba.”

*39:7 Dan 1.1-7; 2 Ki 24.10-16; 2 Ch 36.10