40
De hagaaneane o dangada o de Maadua
1 E hagadaba doodou Maadua: Hagaaneane ina,
hagaaneane ina ogu dangada.
2 Hagamaamaane ina lodo o Jerusalem;
daalaa ange gi de aduhale laa
bolo gu odi ange dono masavaa hagaduasala,
gai ono baubau gu maatala;
Tagi Maolunga ne hai gi lua hanonga
e kii ange ai dono hagaduasala i ono haisala.
3 De leo o dahi e oo ma e hagadaba:
“Hagadabena ina de haiava o Tagi Maolunga i lodo henua;
hagasoea de haiava laumalie o taadeu Maadua i de vao.*Mat 3.3; Mark 1.3; John 1.23 *Luke 3.4-6
4 Haaoa age denga geelonga alodahi,
gai uluhia denga mounga ma duuduu alodahi;
gai hagassoea mommee e pigo,
gai haia gi baba mommee haduhadua.
5 Gai de mahamaha o Tagi Maolunga e hagasula mai naa,
gai dangada alodahi e gidee naa,
go hiidinga Tagi Maolunga gu lava i de tala muna nei.”
6 De leo o dahi e hagadaba, “Oo gi laumalie doo leo!”
Gai au ne ssili ange, “Aahee agu muna e oo e tala?”
“Dangada alodahi e bei dagodo o denga helii,
gai olaadeu mahamaha alodahi e bei denga huaala i lo te duu malaelae.*Jms 1.10-11; 1 Pe 1.24-25
7 Denga helii e mmae, denga huaala e malili,
i de masavaa o Tagi Maolunga e manava ange ai aagena.
Ni muna abodonu, dangada e bei dagodo o denga helii.
8 Denga helii e mmae, denga huaala e malili,
aagai muna a taadeu Maadua e daakodo ga hano ai.”
9 Zion, de ia e hagadele ina de longo danuaa,
koe gi hanage gi honga dahi mounga maolunga.
Jerusalem, go de ia e hagadele ina de longo danuaa,*Zion, de ia e hagadele ina de longo danuaa ... Jerusalem, go de ia e hagadele ina de longo danuaa, aabe daalaa ange gi Zion de longo danuaa; daalaa ange de longo danuaa gi Jerusalem.
koe gi oo i de leo laumalie.
Aude madagu, gai oo hai ange gi aduhale o Judah,
“Tilo, doo Maadua gu humai!”
10 Tilo, de Ia Aamua go Iahweh e humai naa i ssauaa,
gai ia ga hodooligi i dono lima mmahi.
Tilo, ia e gaamai ana hagaoanga madali ia,
ma mee e hagao ange ai alaadeu hegau.*Isa 62.11; Rev 22.12
11 Ia e tilo ange naa dana hagabuulingaa ssiibi bei tangada hagaloosi ssiibi,
ia e hagabudu naa ana ssiibi gauligi i luoono lima,
ma de saabai gilaadeu i ono hadahada;
gai ia e dagi maalie naa denga ssiibi e hanu laa alaadeu dama.*Ezk 34.15; John 10.11
E deai ange donu e bei de Maadua
12 Goai gu hagabaulia denga vai i lo tono lima,
aabe go de maaga de lahalaha o lo te langi?
Gai goai gu daohia denga gelegele o henua i lalo i lo te gede,
aabe go de hagahidi denga mounga i denga mee hagahidi,
ma de hagahidi denga duuduu?
13 Goai e dagudagu ina ange mee a de Hagasaalunga o Tagi Maolunga e hai,
aabe goai e balea ange ana hagasaele?*Rom 11.34; 1 Co 2.16
14 Goai aana ne ssili ange aagena dahi mee gi donu ange ai ia?
Gai goai gu agoagona ange ia i de haiava heohi?
Goai e agoago ina ange ia i de iloo mee,
aabe go de hagaago ange dono hai e donu ange ai?
15 Tilo, denga huaahenua e bei dagodo o dahi madaua i lo te bagede,
gilaadeu e bei denga mama i honga mee hagahidi;
ia e hagahidi denga modu bei dagodo o de mama.
16 Lebanon alodahi e dee dohu i de hai ai de ahi i de mommee o ssigidaumaha,
gai ono manu dolodolo e dee dohu i de hai dahi sigidaumaha dudu.
17 Denga huaahenua alodahi e bei donu teai i ono daha,
gilaadeu e bei donu mee e deai haigamaiana,
gai e kii mai ange donu tee haigamaiana.
18 Gai goai oodou e hagahedae ange de Maadua aagena?
Gai goai oodou e hagadulagi ange ia aagena?*Acts 17.29
19 Dagodo o dahi diinonga, de labagau o denga baalanga e hagadagodo,
gai de labagau o denga goolo ma selevaa ga haoli i goolo,
ma de hai hanu seeini selevaa e dau ange aagena.
20 Tangada hagaau aloha e dee maua i de hai dahi sigidaumaha bee nei,
gai ia e hili dahi laagau e dee moolau laa de bobo.
Gai ia ga ssala dahi labagau
gi hagaduulia dahi diinonga e dee maua laa gi baguu.
21 E aha, goodou tigi iloo naa donu?
E aha, goodou tigi langona naa donu?
E aha, tigi ai naa donu ne daalaa adu gi goodou mai i taamada age?
E aha, goodou tigi tonu ange naa donu mai i taamada age de hai o henua i lalo?
22 Ia e noho i honga de moana e holiagina laa henua i lalo,
gai dangada e nnoho i kilaa e bei dagodo o denga itebuubuu.
Ia e hhola gi madoha de langi bei dagodo o de hale malo,
ma de doha mee nei bei dagodo o de hale malo e nnoho ai dangada.
23 Ia e hai dagi o de henua gi ni ngadi mee,
gai e hai de gau hagamodu muna i henua i lalo gi deai olaadeu haigamaiana.
24 De masavaa donu huu olaadeu ne doo ai,
de masavaa donu huu i dua delaadeu doo,
de masavaa donu huu o olaadeu aga ne ssomo ai i lo te gelegele,
gai ia ga busi gilaadeu, gai gilaadeu gu mmae,
gai de madangi ga ili gilaadeu ga kave bei lau o denga grain.
25 “Gai goai oodou e hagahedae ange au aagena?
Aabe goai e bei ogu dagodo?”
go de Ia Dabu e hagadaba.
26 Dangage age galo age gi lo te langi:
goai ne haia mee nei alodahi?
Go de ia ne haia denga hagabuulingaa heduu,
ga gaavange olaadeu ingoo.
Gai go dono sauaa laumalie ma ono mmahi ne hai mee nei,
teai donu se gilaadeu ne dee maleva.
27 Jacob, gu aha gu hagadaba ai naa goe,
Israel, gu aha gu nanu ai naa goe ma e hagadaba,
“Tagi Maolunga e dee gidee donu ogu dagodo;
gai dogu Maadua e dee anga ange mai donu gi dogu heohi”?
28 E aha, goodou tigi iloo naa donu?
Goodou tigi langona naa donu?
Tagi Maolunga de Maadua, e deai sono daamada be se hagaodi,
go ia ne haia henua i lalo alodahi.
Ia e dee dalea donu aabe e deai ono mahi,
gai e deai donu se dangada e daea dono donu ange.
29 Ia e hagammahi gilaadeu gu deai olaadeu mahi,
ma de hai gi kii ange de mmahi olaadeu gu baageaa.
30 Denga dama daane e daalea donu hogi ma odi olaadeu mahi,
denga dama daane e baakuu donu;
31 aagai gilaadeu e haia Tagi Maolunga
go delaadeu tali hagalodolodo e mahi loa.
Gilaadeu e hagamaalanga age naa i bakau bei dagodo o denga igele;
gilaadeu e saavini gai e dee daalea,
gilaadeu e seesee gai e dee baageaa.
*40:3 Mat 3.3; Mark 1.3; John 1.23
*40:3 Luke 3.4-6
*40:6 Jms 1.10-11; 1 Pe 1.24-25
*40:9 Zion, de ia e hagadele ina de longo danuaa ... Jerusalem, go de ia e hagadele ina de longo danuaa, aabe daalaa ange gi Zion de longo danuaa; daalaa ange de longo danuaa gi Jerusalem.
*40:10 Isa 62.11; Rev 22.12
*40:11 Ezk 34.15; John 10.11
*40:13 Rom 11.34; 1 Co 2.16
*40:18 Acts 17.29