1 Denga mommee i tagudai, goodou nnoho mage dee muu!

Gai denga huaadangada alodahi gi haia gi mmahi gilaadeu.

Gilaadeu gi hagapaa mai gi daalaa alaadeu muna;

gai gidaadeu ga hagabuni e hagamodu.

2 Goai ne hai gi humai dahi i dua,

ma de hagahi ia gi haia ana hegau i dono heohi?

Ia ne gaavange denga huaahenua gi de ia,

ma de hagadee kii denga hodooligi i ono mada i mua.

Ia e hai gilaadeu gi bei de mama o de gelegele i dana gadilaasa,

gai dana mee hholu e hai gilaadeu bei de mama a de madangi e ili laa ga kave.

3 Ia e doolohi gilaadeu ma de hano ga ui tee lagohia,

gai ne hano i dahi haiava oona tigi hano ai i mua.

4 Goai ne haia ma de hagasula de mee nei,

ma de hagahi denga atangada mai i taamada?

Go au, Iahweh — go au taamada,

gai go au de hagaodia — go au donu go ia.

5 Denga mommee i tagudai ne gidee de mee nei, gai gilaadeu gu maatagu;

gai henua i lalo alodahi gu bolebole.

Gai gilaadeu ne hagabuni ga loomai ai;

6 dahi ma dahi e hagammahi ange tangada e baa ange,

ma e hai ange gi dono daina, “Hagammahi!”

7 Dahi labagau e hagammahi ange de labagau o denga goolo,

gai tangada e haia gi soe ina i de haamaa

e hagammahi ange naa tangada e dugidugia.

Ia e hagadaba i dagodo o de mee hagapigi, “Gu danuaa.”

Gai gilaadeu ga tugi gi makaga dahi diinonga gi dee ngalungalue ai.

8 Israel, go koe dogu dangada hai hegau,

Jacob, go de ia aagu ne hili,

goodou go hagadiilinga o dogu soa go Abraham.*2 Ch 20.7; Jms 2.23

9 Au ne gaamai goodou i de bido laa o henua i lalo,

ma de hagahi mai goodou i de mommee mmao.

Gai au e hai adu, “Go koe dogu dangada hai hegau;”

au gu hili goe, gai tee tili donu goe.

10 Gai koe gi dee madagu, go hiidinga au madali goe,

aude manavasaa oo lodo, i hiidinga go au donu doo Maadua.

Go au e hagammahi ina goe, ma de bale adu goe;

go au donu e daohia age goe i dogu lima madau i de heohi.

11 Tilo, dangada alodahi e llili i de goe

e dookaa naa ma de hagangadi mee ina;

gilaadeu e hai baasi adu gi de goe

e hai naa ga deai aama de maakau.

12 Gai ga ssala naa donu e goe gilaadeu e hai baasi adu gi de goe,

aagai koe e dee gidee gilaadeu.

Gilaadeu e hebagi adu gi de goe

e llilo naa donu ga deai.

13 Go hiidinga go au donu go Iahweh, doo Maadua,

au e poo naa doo lima madau,

ma de ga hai adu gi de goe, “Aude madagu,

go au donu e balea adu goe.”

14 De ilo go Jacob, aama Israel damaa mee,

koe gi dee madagu,

i hiidinga go au donu e bale adu goe,

15 Tilo, au e hai naa goe gi bei de baabaa duuduu grain,

e hoou laa ma de kangi, gai e lagolago niho iai.

Koe e duuduu naa denga mounga ga ulu iho,

ma de hai denga duuduu gi bei denga gili grain.

16 Koe e nonu naa mee nei i de madangi,

gai de madangi e ili naa ga kave gee,

de madangi mmahi e hagassii saele naa gilaadeu.

Gai goodou e malangilangi naa i Tagi Maolunga,

goodou e hagamahamaha naa de Ia Dabu o Israel.

17 De gau hagaau aloha ma gilaadeu e duasala e sala vai unu,

aagai gu deai donu vai;

olaadeu hakii gu mmasa gee naa i delaadeu hieunu.

Aagai au, Tagi Maolunga, e basa ange naa gi alaadeu dalodalo,

go au, de Maadua o Israel, au e dee tili donu gilaadeu.

18 Au e hai naa gi hanu saalingaa vai e ssali iho laa i denga mommee maolunga,

ma vai e ssali age i lalo de henua i lodo geelonga.

Au e hai naa de vao gi se mommee iai denga vai,

gai de mommee mmasa gi ssali age ai vai i lalo de henua.

19 Au e hai naa gi ssomo de cedar i de vao,

ma de acacia, ma de myrtle, aama de olive;

au e hai naa hogi gi ssomo denga pine i de vao,

madali denga fir, aama cypress,

20 gi gidee ai e dangada ma de iloo,

gai gi maua ai e gilaadeu i de hagasaele ma de tonu ange

bolo go de lima sauaa o Tagi Maolunga donu ne haia de mee nei,

gai go de Ia Dabu o Israel ne haia gi hanu de mee nei.

21 Tagi Maolunga e hai ange gi denga diinonga,

“Daalaa mai oodou tonu;

daalaa oodou mee e hai baasi mai ai gi de au,”

22 Gaamai oodou diinonga gi daalaa mai mee gu dai hai.

Daalaa mai gi gimaadeu dagodo o mee ne hai madagidagi,

gai gimaadeu ga hagasaele olaadeu dagodo,

gi iloo ai e gimaadeu mee e hai i de hagaodi,

ma de tala mai gi gimaadeu dagodo o mee e loomai.

23 Daalaa mai gi gimaadeu mee e loomai i muli mai,

gi iloo ai e gimaadeu bolo goodou ni maadua abodonu.

Haia hanu hegau danuaa aabe ne hegau baubau,

gi manavasaa ai gimaadeu ma de maatagu.

24 Tilo, goodou denga diinonga ni ngadi mee donu

oodou hegau e deai donu haigamaiana;

gai tangada e hilihilia de daumaha adu gi goodou e hakino gee.

25 Au gu hagangalue naa lodo o dahi mai i ngaiho, gi humai;

gai ia e humai i de mommee e sobo age ai de laa, ga hagahi i dogu ingoo.

Ia e dagadagahi naa denga hodooligi bei dagodo o denga bela,

ma tangada hai gumedi hadu e dagadagahia laa denga gelegele pigi.

26 Goai ne daalaa mee nei i taamada age, gi iloo ai e gidaadeu,

aabe ne daalaa mee nei i mua de hai,

gai gidaadeu ga hagataba ai, “Ne heohi donu ana muna”?

Teai donu se dangada ne daalaa de mee nei,

teai hogi ne daalaa de mee nei i mua de hai,

gai teai donu se dangada ne langona dau tala mee nei.

27 Go au hugadoo ne hai ange gi Zion i taamada, “Tilo, aanei gilaadeu!”

Au ne hai gi humai gi Jerusalem dahi dangada e hagailoo ina longo danuaa.

28 Au ne ssala, gai teai donu sagu dangada ne gidee —

teai donu se dangada hagasaele i olaadeu magavaa,

teai hogi ne maua i de basa mai gi agu muna ssili.

29 Tilo, gilaadeu alodahi ni ngadi mee,

alaadeu hegau e deai donu haigamaiana,

olaadeu diinonga baalanga e bei de ngadi madangi.