42
Tangada hai hegau o Tagi Maolunga
1 Tilo, deenei dogu dangada hai hegau, go ia aagu e bale ange;
go ia aagu gu hili, gai go ia oogu e malangilangi ai.
Au gu hai dogu Hagasaalunga gi hano iho gi ono elunga;
gai ia ga hagamodu ai muna o denga huaahenua i de heohi.*Mat 3.17; 17.5; Mark 1.11; Luke 3.22; 9.35 *Mat 12.18-21
2 Ia e dee oo be ue age dono leo,
aabe e hai gi langona e dangada dono leo i honga denga haiava.
3 Ia e dee hhadi naa donu de aalege gu dai hadi laa,
aabe diinei de wick gu dai made laa.
Gai ia e hagamodu muna i de mee abodonu.
4 Ia e dee vasega naa donu aabe baageaa ono lodo,
ga dae ai gi dana hagaduu gi makaga de hagamodu muna heohi i henua i lalo.
Gai dangada e nnoho i tagudai
e tali hagalodolodo go ana hainga.
5 Aanei muna a de Maadua, Tagi Maolunga e tala,
go de ia ne hagadau ina de langi ga doha gi daha,
gai go ia ne hoolaa henua i lalo ma mee alodahi ne loomai ai,
ma de hai gi manavanava dangada e nnoho ai,
ma de gaavange de manava o de mouli gi dangada i kilaa:*Acts 17.24-25
6 “Go au go Tagi Maolunga, au ne hagahi goe i de heohi,
au e poo naa donu doo lima.
Au e tilo adu goe, ma de hai goe gi se hagatoo donu hagaheloongoi ange gi dangada,
gai gi se maalama ange gi denga huaahenua;*Isa 49.6; Luke 2.32; Acts 13.47; 26.23
7 e hhuge ai ganomada o dangada e dee kide laa,
ma de hagassao mai ai gilaadeu e nnoho i lo te hale pono ma lo te gohu.
8 Go au go Iahweh; deenei dogu ingoo!
Au e dee gaavange naa donu dogu mahamaha gi dahi dangada gee,
aabe e gaavange dogu tuhi gi denga diinonga.
9 Tilo, mee gu i mua gu hai ma gu lava,
iainei gai au e tala mee hoou gu dai hai;
au e tala adu mee nei gi goodou i mua de hai.”
Daahili duuhia Tagi Maolunga
10 Daahili ange gi Tagi Maolunga i taahili hoou,
duuhia ia i henua i lalo alodahi,
go goodou e loiho gi tai, ma mee alodahi i ono lodo,
goodou denga mommee i tagudai, ma mee alodahi e mouli i kilaa.
11 Lodo henua ma ono aduhale gi daahili,
gai denga aduhale vaaligiligi o de gau Kedar e nnoho ai gi malangilangi.
Dangada o Sela gi daahili i delaadeu lodo danuaa,
gilaadeu gi hevaalogi i ulu denga mounga.
12 Gilaadeu gi hagamahamaha ina Tagi Maolunga,
ma de tala dono tuhi i mommee i tagudai.
13 Tagi Maolunga e humai naa bei taane dau i de hebagi,
ia e bei naa taane hebagi e hagammahi laa ia;
ia e oo i de masavaa o de hebagi,
ma de hagadee kii ono hagadaumee.
14 Gu daulooloa dogu noho ga dee muu;
au ne hagapuni dogu ngudu ma de golomagi ogu lodo.
Aagai iainei au gu bei dagodo o de hine gu dai haanau,
au e dangi, au e mahi bodo ma de gonogono.
15 Au e ulu iho naa denga mounga ma duuduu,
ma de hai gi mmae manu ssomo alodahi;
au e hai naa denga saalingaa vai gi ni modu,
ma de hai gi maamasa mommee iai vai.
16 Au e dagi naa gilaadeu e dee kide i dahi haiava alaadeu tigi iloo,
ma de dagi gilaadeu i denga dao haiava olaadeu tigi hulo ai;
au e sui naa de gohu gi se maalama i olaadeu mada i mua,
ma de hai denga mommee haduhadua gi ssoe.
Aanei agu mee e hai ange gi gilaadeu,
gai e dee tili naa donu gilaadeu.
17 Dangada e hagadonusia denga diinonga
ma de hai ange gi denga diinonga laagau ma diinonga baalanga,
“Go goodou omaadeu maadua,”
e aahe dua naa ma de dookaa.
Israel e dee kide ma de longoduli
18 “Goodou de gau longoduli, nnoho mai hagalaangona;
goodou de gau dee kide, kalo ange diiloo!
19 Goai e dee gide, e dee go dogu dangada hai hegau?
Gai goai e longoduli bei tangada hagailoo aagu ne hai gi hano?
Goai e dee gide bei tangada gu vvae mai gi de au,
ma tee gide bei tangada hai hegau o Tagi Maolunga?
20 Gu lagolago au mee gu gidee, aagai koe e dee anga ange aagena;
luoo dalinga e maahuge, aagai koe e dee langona.”
21 Tagi Maolunga ne malangilangi
i de hai ana hainga gi maolunga ma de mahamaha,
i hiidinga ia e heohi.
22 Aagai de huaadangada nei gu gaiaadia ma de haia gi de mahi olaadeu goloa;
gilaadeu alodahi gu nnoho i lodo haonga
ma de pono ange i lodo hale pono.
Gilaadeu gu gaiaadia olaadeu goloa,
gai e deai donu se dangada e hagaola ina gilaadeu;
gilaadeu gu bei goloa e maua i de hebagi,
gai e deai donu se dangada e hagadaba, “Hagaahea mai gilaadeu!”
23 Goai i oodou daha e hagalaangona muna nei,
aabe noho e hagalaangona i laangi e loomai?
24 Goai ne gaavange Jacob bei goloa e maua i de hebagi,
ma de dugu ange Israel gi de gau gaiaa?
E aha, e dee go Tagi Maolunga,
de ia odaadeu gu haisala ange laa aagena?
Go hiidinga gilaadeu tee llodo e daudali i ono haiava,
gilaadeu tee llodo e hagallongo ange gi ana hainga.
25 Deelaa ai, ia ne gaamai gi de ia de hagaduasala i de kona dono lili,
ma de hebagi laumalie.
Gai ne duuli luoono baasi i de ahi ula, aagai ia tee donu ange aagena;
de ahi ne dudu ia, aagai gilaadeu tee maanadu dagodo o mee laa.