1 Aagai iainei, Tagi Maolunga e hagadaba —

de ia ne hagadau ina goe, Jacob,

gai go de ia ne hagahua ina goe, Israel:

“Aude madagu, go hiidinga au gu hagaola goe;

au gu hagahi adu goe i doo ingoo, koe niiagu.

2 De masavaa oou e hano ai laa lo te vai,

gai au madali goe;

gai ga seesee naa donu goe i lodo saalingaa vai,

gai koe e dee maua donu gi abulu,

gai de masavaa oou e seesee ai i lo te ahi,

gai koe e dee maua donu gi vela,

gai de ula o de ahi e dee maua donu i de dudu goe.

3 Go au donu go Iahweh, doo Maadua,

de Ia Dabu o Israel, gai go doo Ia Hagaola;

au ne gaavange Egypt e hagaola ai goe,

gai Ethiopia ma Seba e sui ai goe.

4 Go hiidinga au e hagamogomogo goe, ma de hagadubu goe,

gai go hiidinga au e aloha i de goe,

au e gaavange dangada e sui ai goe,

ma denga huaadangada e hagaola ai doo mouli.

5 Aude madagu, go hiidinga au madali goe;

au e gaamai naa oo hagadiilinga mai i dua,

ma de hagabuni mai goodou i dai.

6 Au e hai ange naa gi denga henua i ngaiho, ‘Dugu gilaadeu gi loomai!’

Au e hai ange naa gi henua i ngaage, ‘Goodou aude daohia gilaadeu.’

Hagaahea mai agu dama daane

ma damaa hine mai i henua i lalo alodahi —

7 dangada alodahi e hagaingoo i dogu ingoo,

go gilaadeu aagu ne hai e hagamahamaha ai au,

gai go gilaadeu aagu ne hagaholi aama de hai.”

8 Dagina mai gilaadeu e hanu olaadeu ganomada, aagai e dee kide,

ma gilaadeu e hanu olaadeu dalinga, aagai e longoduli.

9 Denga huaahenua alodahi gu hagabuni mai

gai dangada alodahi gu hagabuni.

Gai goai i olaadeu magavaa e maua i de tala mee nei,

ma de hagailoo mai gi gidaadeu mee gu hai i mua?

Gilaadeu gi gaamai dangada e daalaa olaadeu heohi,

gi langona ai e dangada gai gilaadeu ga hagataba, bolo gilaadeu e heohi!

10 E hagadaba Tagi Maolunga, “Go goodou ogu dangada hagadonu,

gai go dogu dangada hai hegau aagu gu hili,

gai gi iloo ai e goodou ma de hagadonu,

aama de tonu ange bolo go au donu deenei.

E deai ange donu se maadua gu humai i ogu mua,

aabe se maadua e humai i ogu dua.

11 Go au, go au donu go Iahweh,

gai e deai ange donu se Ia Hagaola bei au.

12 Au gu hagaago adu, ma de hagaola, aama de tala adu gi goodou —

go au donu, e dee go dahi diinonga i oodou magavaa.

Go koe dogu dangada hagadonu,

gai go au donu de Maadua.

13 Uaa, go au donu de Maadua, mai iainei ga hano ai, go au donu go ia.

Gai e deai donu se dangada e maua i de hagaola dahi mai i de au.

Gai goai e maua i de buibui au

i de masavaa aagu e hai ai dahi hegau?”

14 E hagadaba Tagi Maolunga,

doodou Ia Hagaola, go de Ia Dabu o Israel:

“Au e aalu naa gi Babylon ga oha mee hagamakaga o denga haitoga

ma de hagauda mai de gau Babylon alodahi gu hagadee kii laa,

i denga vaga olaadeu e hagassoenga ai laa.

15 Go au donu Tagi Maolunga, doodou Ia Dabu,

de ia ne hagadau ina Israel, go doodou Hodooligi.”

16 E hagadaba Tagi Maolunga,

go de ia ne haia dahi haiava i lo te tai,

ma de haiava i lodo vai mmilo,

17 gai go de ia ne dagina mai denga hada hebagi ma hoosa,

ma denga hagabuulinga hebagi soa ma denga daane dau o de hebagi;

gilaadeu ne daakodo i kilaa, gu dee hiihidi age ange;

gilaadeu gu maamade bei de wick gu diinei laa:

18 “Goodou hagangalo ina mee gu hai i mua;

gai gi dee hagamaanadu i mee madagidagi.

19 Tilo, au e hai dahi mee hoou!

Gai gu sula age donu; e aha, goodou tigi tonu ange laa aagena?

Au e hai naa dahi haiava i de vao,

ma denga saalingaa vai i de mommee e deai vai iai.

20 Denga manu lodo henua

bei jackal ma ostrich e hagadubu au,

go hiidinga au e hai gi hanu vai i de vao,

ma saalingaa vai i de mommee e deai vai iai,

e hagaunu ai ogu dangada, go gilaadeu aagu ne hili,

21 go dangada aagu ne hai e hai ai ogu dangada,

gai gilaadeu ga tala ai dogu tuhi.*1 Pe 2.9

22 Aagai Jacob, koe tee hagahi mai au;

Israel, koe gu goso i de au.

23 Koe tee gaamai gi de au hanu ssiibi e hai ai denga sigidaumaha dudu;

aabe ne hagadubu au i au sigidaumaha.

Au tee hagadaemaha goe i denga sigidaumaha,

aabe ne hagadalea goe i sigidaumaha o denga frankincense.

24 Koe tee hagao mai hanu calamus maanongi maagu,

aabe ne hagamalangilangi au i au sigidaumaha moomuna.

Aagai koe ne hagadaemaha ogu lodo i oo haisala,

gai oo baubau gu hai au ma gu dalea.

25 Go au, go au donu e sooloa gi deai oo haisala i hiidinga o dogu ingoo;

au e dee ahe ange naa donu e maanadu oo haisala.

26 Ahe ange hagamaanadu ina mai gi de au mee gu hai i mua,

gai gidaadeu ga hagadaumee ai;

daalaa de mee oou e hai baasi ai,

gi iloo ai bolo koe e heohi.

27 Doo dubuna i taamada ne haisala;

oodou dagi ne haisala mai gi de au.

28 Gai au e hagangadi mee naa denga dagi o doo mommee dabu,

ma de hai gi oohaa Jacob,

ma de hai gi hagangadi ina Israel.