1 “Tagi Maolunga e hai ange gi de ia aana gu hagadabu i de lolo,

go Cyrus, go de ia aagu e poo dono lima madau

e hagadee kii ai denga huaahenua i ono mada i mua,

ma de hai ia gi gaavee goloa hebagi o denga hodooligi;

ma de hhuge denga haitoga i ono mada i mua,

gai denga haitoga o de aduhale e dee pono naa donu:

2 Au e hano naa i oo mada i mua

ga ulu iho denga mounga;

gai au e oha naa denga haitoga bronze,

ma de duuduu olaadeu baalanga hagamakaga.

3 Gai au e gaavadu naa gi de goe

denga goloa hagamogomogo e daakodo laa i de mommee gohu,

ma goloa lagolago i de mommee e dee gidee laa,

gi iloo ai e goe bolo go au donu go Iahweh,

de Maadua o Israel, ne hagahia adu goe i doo ingoo.

4 Au e hagahi adu goe i doo ingoo

i hiidinga o Jacob, dogu dangada hai hegau,

ma Israel, de ia aagu gu hili,

ma de gaavadu gi de goe dahi ingoo hagadubu

e dee galemu donu koe e dee iloo au.

5 Go au donu go Iahweh, e deai ange donu,

gai e deai ange donu se Maadua e bei ogu dagodo;

au e hagammahi naa goe,

e dee galemu donu koe tee iloo au;

6 gi iloo ai e dangada alodahi

mai i de sobo age o de laa ga dae ai gi de danu,

bolo e deai ange donu se Maadua bei au;

gai go au donu go Iahweh, e deai ange donu.

7 Au ne hagaholi de maalama ma de hagadau de gohu;

go au e haia de nnoho paba ma de hai ngadaa;

go au go Iahweh, ne haia mee nei alodahi.

8 De langi i lunga, haia gi hano iho de heohi

bei de langi pala mai i denga hagausinga.

Gai henua i lalo gi huugea ono haitoga,

gi somo age ai de hagaola

gai de heohi gi matili age hogi;

go au, go Iahweh ne haia de mee nei.

9 E vakaa naa tangada e hagadaumee ange gi de ia ne haia ia,

ia e bei dahi gumedi hadu i magavaa denga gumedi e hai i gelegele pigi!

E aha, e maua e denga gelegele pigi i de hai ange gi tangada hai gumedi,

‘Se aha aau e hai naa?’

aabe e hai ange, ‘Dau gumedi e hai naa e deai donu ono gau!’?*Rom 9.20

10 E vakaa naa tangada e hai ange gi dono damana,

‘Se dangada bee hee aau ne hagadili naa?’

aabe go de hai ange gi dono dinana,

‘Se aha aau ne haanau naa?’

11 E hagadaba Tagi Maolunga,

de Ia Dabu o Israel, gai go de ia ne haia Israel:

E aha, koe e ssili naa dagodo o agu dama,

ma dagodo o mee e loomai,

aabe e tala mai agu hegau e hai?

12 Go au donu ne haia henua i lalo,

ga hagadau dangada e nnoho ai.

Go luoogu lima ne hoolaa de langi,

ma de tala ange gi mee i lo te langi alaadeu mee e hai.

13 Go au ne hagasula ina Cyrus i dogu heohi

gai au e hai naa gi ssoe ono haiava alodahi.

Gai ia e hagaduu age ange naa dogu aduhale,

ma de hagaola ogu dangada gu gaavee laa,

aagai e dee hagao aabe e sui ange,”

go Tagi o denga hagabuulinga hebagi e hagadaba.

“Goloa o Egypt ma goloa a Ethiopia e hagao,

ma denga doa o Seba —

gilaadeu e loomai naa gi goodou

gai goodou e kave naa olaadeu goloa;

gilaadeu e noonoodia naa i denga seeini

ga daudali mai ai i oodou dua.

Gilaadeu e duuduli naa i oodou mada i mua,

ga dangidangi adu naa, ga hai adu,

‘Ni muna abodonu, de Maadua e noho i oodou daha,

gai e deai ange donu se maadua abodonu.’ ”

15 Ni muna abodonu, koe se Maadua e hagamuunia goe,

go koe de Maadua ma de Ia Hagaola i Israel.

16 Alodahi e haia denga diinonga e dookaa naa, ma de hagangadi mee ina;

gilaadeu alodahi e ssenga ange naa.

17 Aagai Tagi Maolunga e hagaola naa Israel

i de hagaola e deai se hagaodi;

gai goodou e dee dookaa naa donu aabe e hagangadi mee ina

ga hano ai e dee ngado mai.

18 Gai e hagadaba Tagi Maolunga,

go de ia ne haia de langi,

go ia donu go de Maadua,

gai go ia ne hagadulagi henua i lalo

ga hai gu dahi,

gai ia tee hagaduu henua i lalo gi se ngadi mommee,

aagai ne hagaduu gi nnoho ai dangada —

ia ne hagadaba:

“Go au donu go Iahweh, e deai ange donu.

19 Au tee tala hagammuni mee nei

aabe ne tala i lo te gohu;

au tee hai ange gi hagadiilinga o Jacob,

‘Saalaa au i dahi ngadi mommee.’

Go au Iahweh, au e tala de muna abodonu;

au e tala de mee heohi.

20 Goodou loomai hagabuni i dahi mommee;

goodou e doe i denga huaahenua, hagabuni mai.

Gilaadeu e gaavee saele olaadeu diinonga laagau ni dangada ssenga,

gilaadeu e dalodalo ange gi denga diinonga e dee maua laa i de hagaola.

21 Goodou daalaa ma de gaamai oodou tonu,

gai gilaadeu gi hagabuni gi hagasaele.

Goai ne hagailoo ina mee nei madagidagi loo?

Gai goai ne daalaa mee nei i denga masavaa gu hulo?

E dee go au, Tagi Maolunga?

Gai e deai ange donu se maadua, go au donu huu,

au se Maadua heohi gai go de Ia Hagaola;

e deai ange donu, go au donu huu.*Mark 12.32

22 Henua i lalo alodahi, daahuli mai gi de au, gi ola ai goodou;

i hiidinga go au donu huu de Maadua, e deai ange donu.

23 Au gu hagatoo donu i dogu ingoo,

gai au gu tala muna nei i de heohi,

gai e dee haihai naa donu ga hagaahe dua:

Dangada alodahi e duuduli naa ga ino i mada luoogu mada;

gai gilaadeu alodahi e hagatoo donu naa i dogu ingoo.*Rom 14.11; Php 2.10-11

24 Gilaadeu e hagataba naa,

‘Go Tagi Maolunga donu huu e heohi gai e mmahi.’ ”

Gilaadeu alodahi e kino i de ia,

e loomai naa gi de ia, gilaadeu gu dookaa naa.

25 Aagai go daho Tagi Maolunga a denga aamuli o Israel

e gidee ai de hagaheohi ma de kii.