1 Bel gu ino gi lalo, Nebo gu duuduli;

olaadeu diinonga e hagauda i honga manu dolodolo ma manu haangai.

Gai mee nei e kave saele ma de hagauda

ma e hagadaemaha ai denga manu.

2 Gilaadeu e ino gi lalo ma de duuduli alodahi;

gu dee maua i de hagaola de mee alaadeu e hagauda laa,

gilaadeu e noonoodia hogi ga gaavee gee gi dahi henua gee.

3 Dangada o Jacob, goodou hagalaangona agu muna,

goodou dangada alodahi o Israel e doe,

go goodou aagu ne hagauda mai i de masavaa oodou ne hagadili,

ma de saabai goodou mai i de masavaa oodou ne haanau ai;

4 Go au donu de ia e diiloo adu goe,

go au ne haia goe ma de saabai goe;

ga dae ai loo gi de masavaa oou e madumaatua ai ma de sinaa doo biho,

go au e balea adu goe ma de hagaola goe.

5 Goai oodou e hagataba bolo e bei ogu dagodo,

gai goai oodou e hagahedae ange au aagena,

ma de hagataba bolo gimaadeu e dagodo daudahi?

6 Hanu dangada e llingi denga goolo i lodo alaadeu beagi,

ga hagahidi denga selevaa i honga denga mee hagahidi,

ga hagao ange dahi labagau o denga goolo gi haia dahi maadua;

gai gilaadeu ga ino ga daumaha ange aagena.

7 Gilaadeu e hagauda delaadeu diinonga

ma de saabai i honga olaadeu eu;

ga kave ga hagaduu i dono mommee gi duu ai,

gai e dee maua donu i de ngalue gee i dono duulanga.

Gai ga dalodalo ange naa donu dahi dangada aagena, aagai e dee basa ange donu,

aabe maua i de hagaola tangada mai i ono hai ngadaa.

8 Goodou manadua ma de hagasaele de mee nei,

gai hagamaanadu i de mee nei, goodou de gau baubau.

9 Manadua mee ne hai madagidagi;

go au donu de Maadua, e deai ange donu;

go au donu de Maadua, e deai ange donu e bei ogu dagodo.

10 Mai i taamada age gai au ne tala gi iloo mee e hai i de hagaodi,

gai madagidagi loo, gai au ne tala mee tigi tae mai.

Au e hagadaba, “Agu hagatau e dee haisala donu,

gai au e hagassula naa donu mee alodahi oogu e lodo ai.”

11 Au e hagahi naa dahi manu lele alasala mai i dua,

se daane mai i dahi henua mmao, gai ia ga hagasula ina dagu hagatau.

Gai be ni aha naa huu aagu gu tala, gai au e hai naa donu gi bei;

gai be ni aha naa huu aagu gu hagatau, gai au e hai naa donu.

12 Goodou de gau makaga oodou lodo,

nnoho mai hagalaangona agu muna;

go goodou e mmao gee i de mee heohi:

13 au e hai gi baa mai dogu heohi,

gai e dee mmao donu;

gai dagu hagaola mai e dee mmule donu.

Au e hai dagu hagaola gi dagodo i Zion,

gai dogu mahamaha i Israel.