47
De hagaduasala o Babylon
De bua moe go Babylon,
iho ma gi noho i lo te gelegele;
tamaa hine a de gau Babylon,
noho i honga de gelegele e dee go de nohoanga o de hodooligi,
Gai koe gu dee hagabinga bolo se damaa hine somo danuaa
ma de balabala doo angaanga.*Isa 13.1—14.23; Jer 50.1; 51.64
Haia denga hadu mmili ga mmili ai denga grain gi lligi;
hagauia de malo e haoli ai luoo mada.
Langaa age oo malo, gi ssula mai ai luoo gauanga,
gai koe ga seesee laa lodo saalingaa vai.
Gai dangada e gidee naa doo gilisau,
gai koe e dogaa naa i de hagaui oo malo;
au e sui adu naa oodou hegau baubau,
gai au e dee dugu naa donu dahi goodou gi ola.
 
Demaadeu Ia Hagaola, dono ingoo go Tagi o denga hagabuulinga hebagi,
gai go de Ia Dabu o Israel.
 
Noho mage dee muu, ma de noho i lo te gohu,
tamaa hine a de gau Babylon;
koe gu dee hagabinga bolo go de hine hodooligi o denga nohoanga hodooligi.
Au ne lili i ogu dangada,
ga hai gi dee se mee dabu dogu boolonga;
au ne dugu adu goe gi hagadee kii ina gilaadeu,
gai koe tee lodo aloha ange gi gilaadeu.
Koe ne hagahai hegau kona donu hogi de gau madumaatua.
Koe ne hagadaba, “Au se hine hodooligi
ga hano ai e dee ngado mai.”
Aagai koe tee hagasaele donu dagodo o mee nei,
aabe ne maanadu dagodo o de hagaodi o au hegau.
 
Deenei ai, noho mai hagalaangona, de hine e haia donu huu ono mee e lodo ai,
ma de noho baba,
gai koe e hagadaba i oo lodo,
“Go au donu huu, e deai ange donu e bei au.
Au e dee haihai naa donu ga see hine gu magau dono bodu,
aabe gu maakau agu dama.” *Rev 18.7-8
Gai luu mee nei ngaadahi e hai adu naa gi de goe
i de masavaa daa hagalele, i dahi laangi daudahi:
au dama e maakau naa, gai gu magau doo bodu.
Mee nei e hai adu naa donu gi de goe
e dee galemu donu dau hai denga huuhuaa mee lagolago,
ma de mmahi au helau alodahi.
10 Gai dau tali go au hegau baubau,
gai koe e hagadaba, “E deai donu dangada e gidee agu mee e hai.”
Doo iloo mee ma doo heiangi gu hagasenga goe;
gai koe e hagadaba i oo lodo,
“Go au donu huu, e deai ange donu e bei au.”
11 De hai ngadaa e dae mai naa donu gi de goe,
gai koe e dee maua donu i de hagaola goe.
Dahi hai ngadaa e duu adu naa gi de goe
gai koe e dee maua naa donu gi ola mai ai,
gai de hai ngadaa aau e dee gidee laa
e daa hagalele naa donu de hai adu gi de goe.
 
12 Duudagi ina de haia au helau
ma au huuhuaa mee lagolago,
go mee aau gu hai hegau mai loo i doo gauligi.
Agu made koe e hagadagadaga age naa,
agu made koe e hai naa ga maatagu dangada.
13 Koe gu goso i de hagallongo muna bale lagolago;
gilaadeu gi hiihidi age mage hagaola ina goe;
gilaadeu e diiloo mee i lo te langi gi loomai,
ma gilaadeu e diiloo denga heduu
ma gilaadeu e daalaa adu gi goodou
mee e loomai i de duu de maasina i dai.
14 Tilo, gilaadeu e bei donu denga lau manu mmasa,
e dudu laa ga odi i de ahi.
Gilaadeu e dee maua i de hagaola gilaadeu
mai i de ula o de ahi mmahi.
De ahi nei e dee se maga ahi e hagamahanahana ai,
gai e dee se ahi e noho tangada i ono gaogao.
15 Gai de gau bee nei, go gilaadeu nogo hai hegau madali goe,
ma de hulo saele madali goe mai i doo gauligi,
gilaadeu alodahi e duudagi donu de hulo gee i de haiava,
gai e deai donu se gilaadeu e maua i de hagaola goe.

*47:1 Isa 13.1—14.23; Jer 50.1; 51.64

*47:8 Rev 18.7-8