1 Dangada o Jacob, goodou hagalaangona muna nei,

go goodou gu hagaingoo ange go Israel,

gai ne hagadili i daho Judah,

goodou e hagatoo donu i de ingoo o Tagi Maolunga,

ma de dagudagu de Maadua o Israel,

aagai e dee se muna abodonu aabe e hai i de heohi.

2 Goodou e hagataba bolo goodou ni dangada e dau ange gi de aduhale dabu,

gai goodou e dau ange gi de Maadua o Israel;

dono ingoo go Tagi o denga hagabuulinga hebagi.

3 Au ne tala mee i mua madagidagi loo,

au ne tala ma de hai gi iloo mee nei;

gai ne daa hagalele dagu hagahai hegau mee nei, ga hagassula mee nei.

4 Gai au e iloo bolo koe e makaga oo lodo;

doo ua e makaga bei iron,

gai doo lae e makaga bei bronze.

5 Deenei ai, au ne tala adu mee nei madagidagi loo,

gai au ne tala adu mee nei gi de goe i mua de hai,

gi dee hagadaba ai goe,

“Go dogu diinonga ne haia mee nei;

gai go denga diinonga laagau ma diinonga baalanga ne hagasauaa ina mee nei.”

6 Koe gu langona mee nei; galo ange diiloo mee nei alodahi,

gai koe gi daalaa hagadonu mee nei.

Mai iainei gai au e tala adu hanu mee hoou,

ma mee e hagammuni gai koe e dee iloo.

7 Mee nei ne hai donu iainei, e dee go madagidagi;

gai koe tee langona donu mee nei i mua,

gi dee hagadaba ai goe,

“Uaa, au gu iloo donu mee nei.”

8 Koe tigi langona naa donu aabe gu donu ange;

mai loo i mua gai luoo dalinga tigi maahuge donu.

Gai au e iloo dagodo o doo dee hai hegau i de mee heohi,

gai koe ne hagaingoo ange bolo se dangada hagamanege mai i doo haanau.

9 Au ne daohi dogu bole i hiidinga o dogu ingoo;

au ne daohi dogu lili i de goe, gi duuhia ai au,

gi dee hagalilo ina ai e au goe.

10 Tilo, au gu hagagilimalali goe, gai tee hagagilimalali bei denga selevaa;

au ne hagagilimalali goe i lo te ahi o de hagaduasala.

11 Go ogu hiidinga, go ogu hiidinga donu aagu ne hai ai de hegau nei.

Dee hee dagu hai e dugu ange ai dahi gi hagangadi mee ina dogu ingoo?

Au e dee dugu ange naa donu dogu mahamaha gi dahi dangada gee.

12 Jacob, noho mai hagalaangona agu muna,

Israel, de ia aagu ne hagahi:

go au donu deenei;

go au taamada, gai go au de hagaodi.*Isa 44.6; Rev 1.17; 22.13

13 Go luoogu lima ne haia henua i lalo,

gai dogu lima madau ne hhola de langi;

de masavaa aagu ne hagahi ai luu mee nei,

gai gilaau ga tuu age i ogu mada i mua.

14 Hagabuni mai, goodou alodahi, ma gi hagalaangona;

goai dahi diinonga ne daalaa mee e loomai?

Tagi Maolunga ne hili Cyrus,

gai ia ga hagassula ana hagatau e hai baasi ange gi Babylon;

dono lima e hai baasi ange naa gi de gau Babylon.

15 Go au, go au donu ne daalaa mee nei;

go au ne hagahia Cyrus.

Au e hai naa ia gi humai,

gai ia ga hagassula de hegau gu gaavange ia gi haia.

16 Loomai gi paa mai goodou gi de au, mage hagalaangona muna nei:

Mai i taamada gai au tee tala hagammuni dahi mee,

de masavaa ne hai ai mee nei, gai au i kilaa.

Iainei gai de Ia Aamua go Iahweh

ma dono Hagasaalunga gu hai au gi humai.

17 E hagadaba Tagi Maolunga,

doo Ia Hagaola, de Ia Dabu o Israel:

“Go au donu Tagi Maolunga doo Maadua,

go au e agoagona adu de mee danuaa adu gi de goe,

ma de dagi goe i de haiava e heohi doo hano ai.

18 Mee naa koe ne anga ange ga hagallongo agu muna,

gai doo noho baba e bei dagodo o ssaalingaa vai,

gai doo heohi ne bei dagodo o denga beau o de moana.

19 Gai oo hagadiilinga e soa naa bei de lagolago o denga gelegele,

gai au dama e soa naa hogi bei de lagolago o gelegele malili;

olaadeu ingoo e dee llilo naa donu,

aabe aau gee mai i mada luoogu mada.”

20 Goodou hulo gee mai i Babylon,

gai saavini hulo gee mai i daho de gau Babylon!

Hagailoo ina de mee nei ma de oo i de malangilangi,

hagadele ina de longo nei gi dae gi de bido laa o henua i lalo;

hai ange, “Tagi Maolunga gu hagaola

dono dangada hai hegau go Jacob.” *Rev 18.4

21 Gilaadeu tee hieunu i de masavaa olaadeu ne hulo saele ai i de vao;

ia ne hai denga vai gi ssali mai lo te baba;

ia ne hhanga de baba

gai denga vai gu ssali mai ai.

22 “E deai donu se noho paba o de gau baubau,”