49
Tangada hai hegau o Tagi Maolunga
1 Denga modu, goodou nnoho mai hagalaangona,
denga huaadangada i mommee mmao, goodou hagalaangona de mee nei.
I mua dogu haanau, gai Tagi Maolunga ne hagahi au;
ia ne hagahi mai dogu ingoo i de masavaa oogu ne haanau ai.*Jer 1.5
2 Ia ne hai dogu ngudu gi kangi bei de gadilaasa,
gai ne haoli au i lalo de malu o dono lima;
ia ne hai hogi au gi bei dahi dao o de mee hholu gu hakaa ma gu kangi,
ma gu hhao gi lo te mommee hhao dao.*Heb 4.12; Rev 1.16
3 Gai ia ne hai mai gi de au, “Go koe dogu dangada hai hegau,
Israel, go koe e hagamahamaha ina au.”
4 Aagai au ne hagadaba, “Teai donu haigamaiana o agu hegau,
au ne moumou ogu mahi i hanu ngadi mee.
Gai go Tagi Maolunga e hagamodu ina dogu heohi,
gai go dogu Maadua e gaamai dogu hagaoanga.”
5 Gai iainei, e hagadaba Tagi Maolunga —
go de ia ne haia ga dahi au i de mommee o denga dama e hai ai dono dangada hai hegau,
e hagaahea mai ai Jacob gi de ia,
ma de hagabuni mai de gau Israel gi ono daha,
gai Tagi Maolunga gu hagadubu au i ono daha,
gai dogu Maadua ogu mahi —
6 ia e hagadaba, “Se mee dee dau dagu hai goe go dogu dangada hai hegau,
e hagaola ai denga aamuli o Jacob,
ma de hagaahe mai de gau Israel aagu ne hagaola.
Au e hai naa hogi goe gi se maalama ange gi denga huaahenua,
gai koe ga kave ai dagu hagaola gi de bido laa o henua i lalo.” *Isa 42.6; Luke 2.32; Acts 13.47; 26.23
7 E hagadaba Tagi Maolunga,
de Ia Hagaola o Israel, gai go dono Ia Dabu,
ange gi de ia e hagangadi mee ina ma de kino ai o denga huaahenua,
ma ange gi tangada hai hegau o denga dagi:
“Denga hodooligi e tuu age naa, i de masavaa alaadeu e gidee ai goe,
denga dagi o de henua e ino naa gi lalo, i delaadeu gidee goe,
go hiidinga Tagi Maolunga, go de ia e hai hegau i de muna abodonu,
gai go de Ia Hagaola ma de Ia Dabu ma o Israel, ne hilihilia goe.”
8 E hagadaba Tagi Maolunga:
“Au e basa adu naa gi dau dangidangi i de masavaa danuaa,
ma de bale adu goe i de laangi o de hagaola;
au e hagaloosi naa goe ma de hai goe
gi se hagatoo donu hagaheloongoi ange gi denga huaadangada,
ma de hagaahe adu doo henua,
ma de vaevae denga boolonga gu ngadi daakodo laa,*2 Co 6.2
9 ma de hai ange gi gilaadeu i lo te hale pono, ‘Goodou ssao mai!’,
gai e hai ange gi gilaadeu e nnoho i lo te gohu, ‘Ssao mai gi de maalama!’
Gilaadeu e bei naa denga ssiibi e gaimee i gaogao denga haiava,
ma de gidee mommee iai helii i honga duuduu.
10 Gilaadeu e dee hiikai naa donu be hieunu,
gai de vao hagavvela ma de madangi hagavvela
e dee hagammae naa donu gilaadeu.
Gai de ia e lodo aloha ange laa gi gilaadeu e dagi naa gilaadeu,
ga kave gi gaogao denga saalingaa vai.*Rev 7.16-17
11 Au e ulu iho naa agu mounga ga hai gi ni haiava,
gai agu haiava nnui e hhao age naa.
12 Tilo, gilaadeu nei e loomai naa i mommee mmao —
hanu mai i ngaiho, hanu mai i dai,
gai hanu mai i Syene.” *Syene e bei go Aswan, se mommee i de bido gi ngaage o Egypt.
13 De langi, malangilangi! Henua i lalo, lodo danuaa!
Denga mounga, hevaalogi ma gi malangilangi!
Go hiidinga Tagi Maolunga gu hagaaneane ono dangada,
ma de lodo aloha ange gi ono dangada gu vaivai haia laa.
14 Aagai Zion e hagadaba, “Tagi Maolunga gu tili au,
gai de Ia Aamua gu ngalo donu au.”
15 E aha, e maua e dahi dinana gi ngalo dana dama ne haau,
aabe gi dee lodo aloha ange gi dana dama ne haanau?
Gai ga ngalo naa donu e ia dana dama,
aagai au e dee ngalo donu goe!
16 Tilo, au gu maaga ange goe gi honga luoogu alohi lima,
gai au e daumada doo buibui i masavaa alodahi.
17 Oo dangada hagaduu e moolau naa donu de aahe mai,
gai gilaadeu ne oohaa de aduhale e hulo gee mai naa i oo daha.
18 Dangage age ma gi diiloo;
au dama alodahi gu hagabuni mai gi oo daha.
Au e hagatoo donu i dogu mouli,
go Tagi Maolunga e hagadaba,
“Koe e hai naa gilaadeu alodahi bei mee hagalaagii aau e dau laa;
koe e dau naa gilaadeu bei mee hagalaagii o de hine gu dai hai bodu.
19 Gai e dee galemu naa donu doo henua
gu maoha ma gu ngadi daakodo,
gai iainei de henua gu dee dohu ai oo dangada,
gai gilaadeu ne oohaa goe e hai naa gi mmao gee mai i de goe.
20 Au dama ne hagadili i de masavaa oou ne hagaduasala ai,
e tala adu naa gi langona e goe, ga hai adu,
‘De mommee nei e dee dohu ai gimaadeu;
gaamai ange hanu mommee e nnoho ai gimaadeu.’
21 Gai koe e hagadaba naa i oo lodo,
‘Goai ne hanaua mai dama nei gi de au?
Au ne buliaamou ma teai agu dama;
au ne gaavee gi dahi henua gee ma de dilia.
Gai goai ne haelea age dama nei?
Tilo, go au donu huu e doe;
aagai go hee ne loomai ai dama nei?’ ”
22 E hagadaba de Ia Aamua go Iahweh,
“Tilo, au e aloalohagi ange naa denga huaahenua,
ma de hagaduu age dahi hagailonga gi gidee e denga huaadangada;
gai gilaadeu e hagauda mai naa oodou dama i olaadeu aloalo,
ma de saabai mai oodou damaa hine i honga olaadeu eu.
23 Denga hodooligi e tilo adu naa goodou,
gai denga haahine hodooligi e haele naa goodou.
Gilaadeu e ino gi honga de gelegele i oodou mada i mua,
gilaadeu e samusamu laa gelegele i oodou vae.
Gai gi iloo ai e goodou bolo go au donu go Iahweh;
gilaadeu e haia au go delaadeu tali hagalodolodo e dee dookaa naa donu.”
24 E aha, e maua e dahi i de kave gee goloa o taane mmahi,
be go de hagaola de gau dee kii mai i tangada mmahi?
25 Aagai e hagadaba Tagi Maolunga,
“Uaa, de gau dee kii e kave gee naa mai i daho denga daane mmahi,
gai denga goloa ne hai gi de mahi e kave gee naa i daho taane alasala;
au e hebagi ange naa gi tangada e hebagi adu gi goe,
gai au e hagaola naa au dama.
26 Au e hai naa gilaadeu ne vaivai haia goodou gi gaina olaadeu kano donu;
gilaadeu e unu naa olaadeu dodo bei denga uvaini maimai.
Gai gi iloo ai e dangada alodahi
bolo go au donu go Iahweh, doo Ia Hagaola,
go au ne hagaola ina goe, go au de Ia Mmahi o Jacob.”