1 E hagadaba Tagi Maolunga,

“I hee iai de beebaa maavae a doodou dinana,

aagu ne gaavadu ga hai ai ia gi hano gee?

Gai goai aagu ne hagao ange goodou aagena

e hagao ai agu muli?

Tilo, go hiidinga oodou haisala oodou ne hagao ai gi daha,

gai go oodou haisala ne hidi mai ai de hano gee o doodou dinana.

2 Gai gu aha gu deai ai laa dangada i de masavaa oogu ne humai ai?

Gai gu aha gu deai ai laa dangada e pasa mai, i de masavaa aagu ne hagaagahi ai?

E aha, gu kona laa de bodobodo dogu lima, gu dee maua i de hagaola goodou?

Aabe gu deai ogu mahi e hagaola ai goodou?

Tilo, au ne hagasee tai gu masa,

au ne hai denga saalingaa vai ga se vao;

denga mamu i kilaa gu pilo i teai dai

ma de maakau i delaadeu hieunu.

3 Au e hai gi gohu lo te langi

bei tangada e gahu i malo daladala.”

4 De Ia Aamua go Iahweh gu gaamai gi de au de alelo o tangada gu agoagona,

gi iloo ai e au muna e hagammahi ai gilaadeu e daalea.

Ia e hhango mai au i daiao alodahi,

ma de hhuge luoogu dalinga gi langona ai e au

bei dagodo o tangada e agoagona.

5 De Ia Aamua go Iahweh gu hhuge luoogu dalinga,

gai au tee hagamanege, aabe ne huli gee i de ia.

6 Au ne dugu ange au gi gilaadeu e hagailiilia dogu dua,

gai e huli ange luoogu galaahuu gi gilaadeu e vele ina dogu gumigumi;

gai au tee haoli luoogu mada

i de hagadogaa ma de saavale.*Mat 26.67; Mark 14.65

7 De Ia Aamua go Iahweh ne bale mai au,

deelaa ai, au e dee hagangadi mee ina naa donu;

deenei ai, au gu soe donu dagu maanadu,

gai au e iloo bolo au e dee dogaa naa donu.

8 De ia e daalaa dogu heohi e baa mai donu gi de au.

Gai goai ai naa e hagabaubau ina au?

Gidaadeu ga hagadau gaavange i de mommee hagamodu muna.

Goai e lodo e hagabaubau au?

Gai ia gi humai.*Rom 8.33-34

9 Tilo, go de Ia Aamua go Iahweh e bale mai au,

gai goai ai naa e hagahaisala ina au?

Tilo, gilaadeu alodahi e bei naa de malo duai

a de lengisi e gai laa ga odi.

10 Goai i oodou magavaa e madagu i Tagi Maolunga,

ma de hagallongo ange gi muna a dono dangada hai hegau?

Tangada e seesee i lo te gohu

e deai laa se maalama iai,

gi hagadonusia de ingoo o Tagi Maolunga

ma de tali hagalodolodo ange gi dono Maadua.

11 Tilo, goodou alodahi e haulasia dahi ahi,

ma de kave denga lama e haula laa,

goodou seesee i de maalama o oodou ahi,

ma denga lama oodou gu haula laa.

Deenei dagu hai e hai ai goodou:

goodou e daakodo gi lalo i doodou mmae.