1 Nnoho mai hagalaangona agu muna, goodou e hai hegau i de heohi,

ma goodou e saalaa Tagi Maolunga:

goodou kalo ange diiloo de baba oodou ne hoda mai ai laa,

ma de baba oodou ne tuu mai ai;

2 goodou kalo ange diiloo doodou dubuna madagidagi go Abraham,

ma Sarah, ne hanaua naa goodou.

De masavaa aagu ne hagahi ai Abraham, gai ia e dahi donu huu,

gai au ne hagamanuuia ia ga hai gu soa ono hagadiilinga.

3 Tagi Maolunga e hagaaneane naa donu Zion,

ma de lodo aloha ange gi ono mommee alodahi gu oohaa laa;

ia e hai naa ono vao gi bei Eden,

gai ono lodo henua gi bei de veelenga a Tagi Maolunga.

De malangilangi ma de lodo danuaa e dagodo naa i kilaa,

aama de hagaahe ange de abodonu ma de leo o taahili.

4 “Ogu dangada, goodou hagalaangona agu muna;

dogu huaahenua, nnoho mai hagalaangona:

de hainga se mee mai i ogu daha,

gai dagu hagamodu heohi e hagamaalama naa denga huaahenua.

5 Dogu heohi e moolau naa donu de dae mai,

dagu hagaola gu dae mai donu;

ssauaa o dogu lima e hagamodu naa muna o denga huaahenua i de heohi.

Mommee i tagudai e kalo mai naa gi de au,

ma de tali mai ssauaa o dogu lima mmahi.

6 Goodou kalo age diiloo lo te langi,

ma de tilo honga henua i lalo;

de langi e lilo naa bei de useahi,

gai henua i lalo e hano naa ga duai bei de malo,

gai dangada i kilaa e maakau naa bei denga lango.

Aagai dagu hagaola e dagodo naa donu huu ga hano ai,

dogu heohi e dee maoha naa donu.

7 Goodou e iloo de mee heohi, hagalaangona agu muna,

goodou de huaadangada e daohia agu hainga i oodou lodo:

goodou aude maatagu i de hagabaubau a dangada goodou,

aabe gi manavasaa i delaadeu hagadookaa goodou.

8 Go hiidinga de lengisi e gai naa gilaadeu bei dahi malo,

gai de ilo e gai naa gilaadeu bei malo e hai laa i huluhulu o denga manu.

Aagai dogu heohi e dee ngado mai donu,

gai dagu hagaola e dagodo i denga atangada alodahi.”

9 De lima o Tagi Maolunga, alahage, alahage!

Hakahu ina goe i de mahi,

alahage, bei oo dagodo i denga laangi gu hulo,

bei au hegau i denga atangada madagidagi.

E aha, e dee go koe e duuduudia de Rahab ga too dagidahi

ma de velo de manu laumalie*de manu laumalie, aabe go de dragon. laa?

10 E dee go koe ne haia ga masa tai,

ma denga vai o de moana gelo;

e dee go koe ne haia dahi haiava i lo te lausedi,

e seesee ai gilaadeu aau gu hagaola?

11 Gilaadeu a Tagi Maolunga gu hagaola e aahe mai naa.

Gilaadeu e loomai naa ga ulu i Zion ma de daahili;

gai de lodo danuaa e dee odi laa go de hau i honga olaadeu biho.

Gai gilaadeu e kona naa i de lodo danuaa ma de malangilangi,

gai taemaha ma de daalea gu hano gee mai i olaadeu daha.

12 “Go au, go au donu de ia e hagaaneane ina goe.

Gai go koe goai, gai koe ga madagu ai i tangada e magau laa,

gai go dama a dangada, e bei laa dagodo o denga helii?

13 E aha, koe gu ngalo laa bolo go Tagi Maolunga ne haia goe,

go de ia ne hoolaa gi daha de langi,

ma de hagatuu dagelo o henua i lalo,

gai koe ga noho ai naa ga madagu i laangi alodahi

i hiidinga de bole o tangada e vaivai haia dangada,

go de ia e noho laa e oohaa mee?

Gai i hee iai de lili o de ia e vaivai haia dangada?

14 Dangada gu hhao gi lo te hale pono gu dai ssao mai naa;

gilaadeu e dee maakau naa donu i lo te hale pono,

aabe e deai alaadeu gai.

15 Go au donu go Iahweh doodou Maadua,

go au ne saugalo ina lo te moana ga hai gi beabeau;

dogu ingoo go Iahweh o denga hagabuulinga hebagi.

16 Au gu hhao agu muna gi lo too ngudu,

ma de haoli goe i de malu o dogu lima;

go au donu ne hagaduulia de langi, ma henua i lalo i olaau mommee,

go au ne hagadagodo denga dagelo o henua i lalo,

gai go au ne hai ange gi Zion, ‘Go goodou ogu dangada.’ ”

17 Alahage, alahage!

Jerusalem, hidi age,

koe gu unu mee mai i de lima o Tagi Maolunga,

go de ubu o dono bole,

koe gu unu ma gu masa mee i ono lodo,

go de ubu e haia ga ssee saele dangada.*Rev 14.10; 16.19

18 Gai gu deai dangada e dagina ia

i magavaa o ana dama ne haanau;

aabe go dahi gilaadeu aana ne haele

e boogia dono lima ga dagi ai ia.

19 E lua mee hai ngadaa gu hai adu gi de goe —

gai goai naa e hagaaneane ina goe?

Koe gu oohaa ma gu ngadi dagodo, i de onge ma de gadilaasa —

gai goai naa donu e hagaaneane ina goe?

20 Au dama gu deai olaadeu mahi;

gilaadeu e daakodo saele i dege o denga haiava

bei de antelope gu lave laa i lo te galauna.

Gilaadeu gu langona iho de bole o Tagi Maolunga,

ma de hagasee a doodou Maadua gilaadeu.

21 Deenei ai, goodou gu hagaduasala ina, hagalaangona muna nei,

goodou gu ssenga, gai tee senga i uvaini:

22 e hagadaba doo Ia Aamua go Iahweh,

gai go doo Maadua, e balea ange laa ono dangada:

“Tilo, au gu kave gee mai i lo too lima

de ubu oodou ne unu ai ga ssenga;

goodou e dee aahe ange naa donu ga unu i de ubu nei,

go de ubu o dogu bole.

23 Gai au e gaavange naa de ubu laa gi gilaadeu ne vaivai haia goodou gi unu ai,

go gilaadeu ne hai adu gi goodou,

‘Goodou daakodo gi lalo,

gai gimaadeu ga seesee i honga oodou dua.’

Oodou dua gu bei honga de gelegele,

gai e bei honga haiava o dangada e seesee ai laa.”