52
Tagi Maolunga e hagaola naa Jerusalem
1 Zion, alahage, alahage,
hagammahi ina goe.
Jerusalem, de aduhale dabu,
gahu i oo malo mahamaha.
Gai de gau tigi tuu dagaholiage ma gilaadeu e dee gilimalali
e dee aahe e ulu i de aduhale.*Rev 21.2, 27
2 Jerusalem, dahidahia oo gelegele,
mage hidi age, noho i honga doo nohoanga.
Tamaa hine o Zion gu noonoodia laa ma gu gaavee gee,
hagauia seeini i oodou ua.
3 E hagadaba Tagi Maolunga,
“Koe ne hagao gi daha, gai tee hagao i sseene,
gai e dee ni sseene hogi e hagaola ai goe.”
4 Gai e hagadaba de Ia Aamua go Iahweh,
“Taamada gai ogu dangada ne hulo gi Egypt e nnoho,
gai iainei de gau Assyria gu hagaduasala gilaadeu.
5 Gai ni aha gu hai nei i kinei?
go Tagi Maolunga e hagadaba.
Ogu dangada gu gaavee gee, gai tee hagao,
gai dangada e dagina gilaadeu e pasa hagamaolunga,
go Tagi Maolunga e hagadaba.
Mai i taiao ga boo ai
gai dogu ingoo e hagangadi mee ina.*Rom 2.24
6 Deenei ai, ogu dangada e iloo naa dogu ingoo;
de laangi laa gai gilaadeu e tonu ange naa
bolo go au donu ne daalaa de mee nei.
Uaa, go au donu deenei.”
7 Ga dae laa de mahamaha i honga denga mounga
vae o dangada e gaamai de longo danuaa,
go de ia e daalaa dagodo o de nnoho paba,
ma de gaamai denga longo danuaa
ma de tala dagodo o de hagaola,
ma de hai ange gi Zion,
“Go doo Maadua e hodooligi!” *Nah 1.15; Rom 10.15; Eph 6.15
8 Hagalaangona adu! Oodou dangada dagitilo e hevaalogi;
gilaadeu alodahi gu hevaalogi i delaadeu malangilangi.
Go hiidinga gilaadeu gu gidee i olaadeu ganomada
de masavaa o Tagi Maolunga e ahe mai ai gi Zion.
9 Denga mommee i Jerusalem gu ngadi daakodo laa,
goodou alodahi hevaalogi daahili i de malangilangi,
go hiidinga Tagi Maolunga gu hagaaneane lodo o ono dangada;
ia gu hagaola Jerusalem.
10 Tagi Maolunga e hagaabo naa dono lima dabu,
i madamada o denga huaahenua alodahi,
gai henua i lalo alodahi e gidee naa
de hagaola a taadeu Maadua.
11 Goodou hulo gee, goodou hulo gee, hulo gee mai i kilaa!
Goodou aude poo ange gi dahi mee hakino gee!
Goodou ssao hulo gee mai i kilaa gai gi gilimalali ai goodou,
go goodou e hagauda ina goloa hai hegau o Tagi Maolunga.*2 Co 6.17
12 Gai goodou e dee hagamoolau naa donu e hulo,
aabe e saavini e hulo,
go hiidinga Tagi Maolunga e hano naa i oodou mada i mua,
gai de Maadua o Israel e buibui naa oodou dua.
De hagaduasala o tangada hai hegau o Tagi Maolunga
13 Tilo, dogu dangada hai hegau
e hai hegau naa i de iloo mee;*e hai hegau naa i de iloo mee, aabe e hagadagadaga age.
ia e hagaamua ina naa, ma de hagadubulia,
ma de maolunga mmao.
14 Dangada soa ne llele mouli i ono dagodo —
dono angaanga e kona de lagolagohia,
gu dee dagodo be se angaanga dangada,
gai dono angaanga gu dee madea ange
bolo se angaanga dangada —
15 gai ia e hai naa ga llele mouli denga huaahenua soa,
denga hodooligi e pono naa olaadeu ngudu i ono hiidinga.
Gilaadeu e gidee naa mee tee tala ange gi gilaadeu,
gai e tonu ange naa gi mee alaadeu tee langona.*Rom 15.21