53
1 Goai e hagadonusia amaadeu muna gu tala?
Gai goai a Tagi Maolunga gu hagaago ange aagena ssauaa o dono lima?*John 12.38; Rom 10.16
2 Ia ne somo age i mada luu mada o Tagi Maolunga
bei de uli o dahi manu somo,
gai e bei de aga o dahi manu e somo laa i lo te gelegele e deai vai iai.
Ia e deai donu sono mahamaha aabe se hagadubu
e haia gi llodo gidaadeu e tilo ia,
e deai hogi se mahamaha o dono angaanga
e haia gi llodo gidaadeu i de ia.
3 Ia ne hagangadi mee ina ma de kino ai o dangada,
se dangada e lagolago ono hagammae,
ma de donu ange gi dagodo o de hagaduasala.
Dangada e kino i de kalo ange e tilo ia;
ia ne hagangadi mee ina, gai gidaadeu tee hagadubu ia.
4 Ni muna abodonu, ia ne kave odaadeu baageaa
ma de hagauda odaadeu daemaha;
gai gidaadeu ne maanadu bolo de Maadua ne hagaduasala ia,
ia ne hagailiilia, ma de hagammae.*Mat 8.17
5 Aagai ia ne hagalagohia i hiidinga odaadeu haisala,
ia ne hagammae i hiidinga odaadeu baubau;
ia ne hagaduasala gi maua ai e gidaadeu de baba,
gai ono maanuga ne hagaieiangi gidaadeu.*1 Pe 2.24-25
6 Gidaadeu alodahi e bei denga ssiibi, gu ssenga saele laa,
dahi ma dahi gu hano donu huu i dono haiava;
gai Tagi Maolunga gu hagauda ange gi de ia
odaadeu baubau alodahi.
7 Ia ne vaivai haia ma de hagaduasala,
aagai ia tee hhanga donu dono ngudu;
ia ne dagina bei dahi ssiibi gauligi
e kave laa gi de mommee e daa ai denga manu,
ia e bei ssiibi e dee muu laa i mada i mua, o dangada e duuduudia ono huluhulu,
gai ia tee hhanga donu dono ngudu.*Rev 5.6 *Acts 8.32-33
8 Ia ne gaavee ga vaivai haia ma de hagaduasala,
gai goai e maua i de hagasaelea dagodo o dono atangada?
Ia ne daa ga magau ga kave gee mai i daho dangada;
ia ne hagailiilia i hiidinga haisala o ogu dangada.
9 Gilaadeu ne hai dono daanunga madali de gau baubau,
gai dono mommee ne danu ai madali dahi daane lava,
e dee galemu donu teai donu ono baubau,
aabe ia ne tala dahi muna hagasenga i dono ngudu.*1 Pe 2.22
10 Aagai se hagatau nii Tagi Maolunga, de hagammae ia ma de hagaduasala ia,
gai dono mouli ne hai ai ssigidaumaha o tagasala.
Deelaa ai, ia e gidee naa ono hagadiilinga soa, ma de lagolago ono laangi e mouli ai;
gai de hagatau a Tagi Maolunga e hagasula naa i ono daha.
11 Gai ia e malangilangi naa i dana gidee
hua o de hagaduasala o dono mouli,
gai de iloo mee o dogu dangada hai hegau heohi e hai naa ga heohi dangada soa,
gai ia e hagauda naa olaadeu baubau.
12 Deenei ai, au e vvae ange naa gi de ia dahi duuhanga madali de gau maolunga,*madali de gau maolunga, aabe madali dangada soa.
gai ia e vaevae naa denga goloa o de hebagi madali denga daane mmahi;
go hiidinga ia ne dugu ange dono mouli gi de magau;
ia gu dau madali de gau haisala.
Ia ne hagauda haisala o dangada soa,
aama de dalodalo i hiidinga o de gau haisala.*Mark 15.28; Luke 22.37