54
De mahamaha o Zion i muli mai
1 “Oo ma gi daahili, de hine dee hua,
gai go de hine tee haanau;
oo ma gi daahili, oo ma gi malangilangi,
de hine tigi ai ono hagalangona;
go hiidinga dama a de hine gu dilia e dono bodu
e soa ange naa i dama a de hine e dahi ono bodu,*Gal 4.27
go Tagi Maolunga e hagadaba.
2 Hagalaumalie ina de mommee o doo hale malo,
gai doohaa gi madoha malo buibui o doo hale,
aude daohia mai,
gai hagatolo ina gi daha oo daula,
ma de hagatuu gi makaga oo laagau hagamakaga.
3 Gai koe e hagalahalaha naa gi de madau ma de masui,
oo hagadiilinga e hagadee kii naa denga huaahenua,
gai gilaadeu ga nnoho i lodo olaadeu aduhale gu ngadi daakodo laa.
4 Koe gi dee madagu; koe e dee hagadogaa ina naa donu.
Koe gi dee manavasaa i doo hagangadi mee ina; koe e dee hagamaolalo ina.
Gai koe e ngalo naa doo hagadogaa ina i de masavaa oou e gauligi ai,
gai koe e dee manadua naa donu doo hagadogaa ina i teai soo bodu.
5 Go hiidinga doo bodu go ia ne haia goe,
dono ingoo go Tagi o denga hagabuulinga hebagi;
gai de Ia Dabu o Israel go doo Ia Hagaola,
ia e hagaingoo ange go de Maadua o henua i lalo alodahi.
6 Gai Tagi Maolunga gu hagahi adu goe
bei de hine gu dilia ma de daemaha ono lodo,
bei de hine e hai bodu i dono masavaa se damaa hine ai,
gai gu dilia, go doo Maadua e hagadaba.
7 Au ne tili goe i dahi masavaa bodobodo,
aagai au e hagaahe mai naa goe i hiidinga dogu lodo aloha laumalie.
8 Au ne kona mmao dogu lili
gai au ga haoli luoogu mada gi dee gidee e goodou i dahi masavaa bodobodo,
aagai au e abodonu adu gi de goe ga hano ai
ma de lodo aloha adu naa gi de goe,
go Tagi Maolunga doodou Ia Hagaola e hagadaba.
9 Gai de mee nei e bei dagodo laangi o Noah,
i de masavaa aagu ne hagatoo donu ai
bolo denga vai e dee aahe ange naa donu e haoli henua i lalo.
Gai e bei ai hogi, au gu hagatoo donu bolo au e dee lili ange naa donu i goodou,
gai au e dee hagasee ange naa donu goodou.*Gen 9.8-17
10 Gai ga aau naa donu ga deai mounga,
gai denga duuduu gu hagangalue gee,
aagai dogu abodonu adu gi goodou e dee ngalungalue donu,
dagu hagatoo donu hagaheloongoi i de nnoho baba e dee tuu naa donu,
go Tagi Maolunga e hagadaba, go de ia e lodo aloha adu gi de goe.
11 De aduhale gu hagaduasala ina, ma de oohaa i de madangi, gai tee hagaaneane ina,
tilo, au e ahe ange naa e bae age goe i hadu hagamogomogo,
ma de hagadagodo oo dagelo i denga sapphire.*Rev 21.18-21
12 Au e hai naa oo hale maolunga i denga agate
gai e hai oo haitoga i denga jewel malamalama,
gai oo buibui alodahi i denga hadu hagamogomogo.
13 Gai au dama alodahi e agoago naa i daho Tagi Maolunga,
gai au dama e laumalie naa delaadeu nnoho paba.*John 6.45
14 De aduhale e hagaduu naa i de heohi,
gai de hagaduasala e mmao gee naa donu,
gai goodou e dee maatagu naa donu i dahi mee daudahi.
De mee hagamaatagu e kave naa donu gi mmao gee i goodou;
e dee dai baabaa adu naa donu gi goodou.
15 Noo dahi dangada e hebagi adu gi goodou, gai e dee go au ne haia de mee nei;
gai tangada e hebagi adu gi goodou e magulu naa donu.
16 Tilo, go au ne hagadau ina de labagau o denga baalanga,
go tangada e iliilihia denga maga ahi gi ula,
ma de hai dahi goloa hebagi gi heohi ange gi ono hai hegau.
Gai go au hogi ne hagadau ina tangada e oohaa laa gi oohaa mee;
17 aagai e deai naa donu se goloa hebagi e hai baasi adu gi goodou e kii,
gai goodou e kii naa i gilaadeu e hagabaubau ina goodou.
Deenei de boolonga o de gau hai hegau o Tagi Maolunga,
gai deenei dagu hai e hagaheohi ai gilaadeu,”
go Tagi Maolunga e hagadaba.