1 Loomai, goodou alodahi e hieunu,

loomai gi de vai;

gai goodou e deai oodou sseene,

loomai, hagao ina ma gi gaina!

Loomai hagao ina uvaini ma vai uu

e dee hagao i sseene, gai e deai sono hagaoanga.*Rev 21.6; 22.17

2 Gu aha gu moumou ai oodou sseene i mee e dee ni gai,

ma de moumou oodou mahi i mee oodou e dee boobosu ai?

Nnoho mai hagalaangona agu muna, ma de gai mee danuaa,

gi malangilangi ai goodou i denga gai mammami.

3 Huugea oodou dalinga, gai loomai gi de au;

goodou hagalaangona agu muna, gi mouli ai goodou.

Au e hai naa dahi hagatoo donu hagaheloongoi dee ngado mai madali goodou,

i hiidinga dogu hai hegau i de muna abodonu,

aama dogu aloha gu hagatoo donu ange laa gi David.*Acts 13.34

4 Tilo, au ne hai ia gi se ia tala hagadonu ange gi denga huaadangada,

gai se dagi e daalaa ange mee a denga huaadangada e hai.

5 Tilo, koe e hagahi naa denga huaahenua aau e dee iloo,

gai denga huaahenua e dee iloo goe e hagamoolau naa ga loomai gi oo daha,

i hiidinga o Tagi Maolunga doo Maadua,

go de Ia Dabu o Israel,

go hiidinga ia gu hagamahamaha goe.

6 Saalaa Tagi Maolunga i de masavaa e maua ai gi gidee ia;

dalodalo ange gi de ia i de masavaa oona e baa mai ai.

7 Tangada baubau gi dilia ana dahulinga baubau,

gai tangada dee heohi gi dilia ana maanadu dee heohi.

Gai ia gi ahe mai gi Tagi Maolunga, gai ia ga lodo aloha ange gi de ia;

ia gi ahe mai gi taadeu Maadua, gai ia ga degi ange gi de ia.

8 Go hiidinga agu maanadu e dee bei oodou maanadu,

ogu haiava e dee bei oodou haiava,

9 De langi e maolunga ange i henua i lalo,

e bei ai hogi, agu haiava e maolunga ange i oodou haiava,

agu maanadu e maolunga ange i oodou maanadu.

10 Agu muna e bei de langi ma snow

e loiho laa i de langi

aagai e dee aahe age ange gi de langi,

gai e hagamaluulu honga de henua

ga hai gi matili age denga manu ssomo,

gai gi hanu ai golee a tangada doo mee ma pelaoaa a tangada e gai;*2 Co 9.10

11 gai e bei ai hogi, muna e tala i dogu ngudu

e dee ngadi aahe mai donu gi de au,

aagai e hagassula ogu mee e lodo ai,

ma de hai gi bei mee alodahi aagu gu tala ange gi haia.

12 Gai goodou e ssao naa ga hulo i de malangilangi,

ma de dagina ga hulo i de baba;

denga mounga ma duuduu

e oo naa ga daahili i oodou mada i mua,

gai denga manu ssomo alodahi o de henua

e baabaa naa olaadeu lima.

13 Gai gu dee ni manu daladala e ssomo ai, gai gu ni pine;

gu dee ni manu dabeo e ssomo ai, gai gu ni myrtle.

De mee nei se mee e hagamaanadu ai de ingoo o Tagi Maolunga,

gai se hagailonga e dee ngado mai,

gai e dee haihai naa donu ga lilo.