1 De Hagasaalunga o de Ia Aamua go Iahweh gu hano iho gi ogu elunga,

go hiidinga Tagi Maolunga gu hagadabu au i de lolo,

gai au ga agoago ange ai de longo danuaa gi de gau hagaau aloha.

Ia ne hai au gi humai gi hagaieiangi ina dangada e daemaha olaadeu lodo,

ma de hai gi ilaage gilaadeu gu noonoodia,

ma de hagassao mai gilaadeu i lo te hale pono,*Mat 11.5; Luke 7.22 *Luke 4.18-19

2 ma de tala dagodo o de ngadau o de abodonu o Tagi Maolunga,

ma de laangi a taadeu Maadua e sui ange ai de baubau;

ma de hagaaneane ai lodo o dangada alodahi e hinangalosaa,

3 ma de gaavange gi gilaadeu e hinangalosaa i Zion

de hau mahamaha e sui ai lehu,

ma de lolo o de malangilangi,

e sui ai de hinangalosaa olaadeu lodo,

ma de hakahu gilaadeu i de tuhi,

e sui ai teai selaadeu tali.

Gai gilaadeu e hagaingoo ange naa go denga oak o de heohi,

a Tagi Maolunga ne doo laa e hagaago mai ai dono mahamaha.

4 Gilaadeu e aahe ange naa ga hagatuu age mommee gu maoha

ma gu ngadi daakodo i denga masavaa gu hulo;

gilaadeu e hagaahe age naa denga aduhale gu maoha laa,

ma gu ngadi daakodo mai i denga atangada gu hulo.

5 Gai de gau henua gee e hagaloosi oodou hagabuulingaa manu,

de gau henua gee e hagabalabala naa oodou veelenga,

ma de velevele oodou veelengaa grape.

6 Gai goodou e hagaingoo ange naa go de gau haimeedabu o Tagi Maolunga,

gai e hagabinga naa bolo go de gau hai hegau o taadeu Maadua.

Goodou e gaimee naa i de lava o denga huaahenua,

ma de tala tuhi naa doodou kave olaadeu goloa.

7 Goodou e kave naa tuuhanga e lua hanonga e kii ange ai

e sui ai doodou hagadookaa ina.

Gilaadeu e malangilangi naa i olaadeu boolonga

e sui ai delaadeu hagangadi mee ina;

gai delaadeu gelegele i de henua e hai naa ga lua hanonga e kii ange ai,

gai delaadeu malangilangi e deai donu se ngado mai.

8 Gai au, go au go Iahweh, e lodo i de hagamodu muna heohi,

au e kino i de gaiaa ma de baubau.

Gai au e hagao ange naa alaadeu hegau i hiidinga dogu hai hegau i de mee abodonu,

ma de hai dahi hagatoo donu hagaheloongoi dee ngado mai madali gilaadeu.

9 Gai denga huaahenua e iloo naa dagodo o olaadeu aamuli,

gai denga huaadangada e iloo naa dagodo o olaadeu hagadiilinga.

Dangada alodahi e gidee gilaadeu e iloo naa

bolo gilaadeu go de huaadangada a Tagi Maolunga gu hagamanuuia.

10 Au gu malangilangi mmao i Tagi Maolunga,

dogu hagasaalunga e lodo danuaa mmao i dogu Maadua.

Go hiidinga ia gu hakahu mai au i de hagaola,

ma de saabini au i de heohi bei de malo laa daha,

bei de hai a taane e hagahai bodu e gahu hagadanuaa ai laa bei tangada haimeedabu

gai bei de hai a de hine e hagahai bodu e dau ai laa denga hadu hagamogomogo.*Rev 21.2

11 Gai e bei de hai e matili age ai laa denga manu ssomo i honga de gelegele

gai de veelenga e hai gi ssomo denga golee,

gai e bei ai hogi, de Ia Aamua go Iahweh e hai gi sula age de heohi ma de tuhi

i madamada o denga huaahenua alodahi.