62
De ingoo hoou o Zion
1 Au e dee hagapuni naa donu dogu ngudu i hiidinga o Zion,
au e dee tuu naa donu dogu basa i hiidinga o Jerusalem,
ga dae ai gi de sula age dono heohi bei de maalama o taiao,
dono hagaola e bei de lama gu haula laa.
2 Gai denga huaahenua e gidee naa doo heohi,
denga hodooligi alodahi e gidee naa doo mahamaha;
gai koe e kave naa dahi ingoo hoou,
go de ngudu donu o Tagi Maolunga e gaavadu doo ingoo.
3 Koe e bei naa de hau hodooligi mahamaha i lo te lima o Tagi Maolunga,
gai se hau hagauda i lo te lima o doo Maadua.
4 Gai koe gu dee hagabinga bolo go De ia gu Dilia,
gai doodou henua gu dee hagabinga bolo go Ngadi Dagodo.
Aagai koe e hagaingoo ange naa go Hephzibah,*Hephzibah i muna Hebrew e bei go de ia oogu e malangilangi ai.
gai doo henua e hagaingoo ange naa go Beulah;†Beulah i muna Hebrew e bei go de ia gu hai bodu.
go hiidinga Tagi Maolunga e malangilangi naa i de goe,
gai doo henua e bei naa de hine gu hai bodu.
5 Dahi dama daane e hai bodu ange gi dahi damaa hine,
gai e bei ai hogi au dama e hai bodu adu naa gi de goe.
Gai de Maadua e malangilangi naa hogi i de goe,
bei de malangilangi o tama daane i dono bodu.
6 Jerusalem, au gu dugu denga daane dagitilo i honga doo buibui;
gai gilaadeu e dee hagapuni naa donu olaadeu ngudu i de laangi ma boo.
Goodou e dalodalo ange laa gi Tagi Maolunga,
goodou aude damaa hagammabu donu,
7 gai gi dee dugua ange ia gi hagamabu ga dae ai gi dana hagaahe age Jerusalem,
ma de hai gi se mommee e tuhi hagadanuaa i henua i lalo.
8 Tagi Maolunga gu haalo dono lima madau
ma gu hagatoo donu i dono sauaa ma gu hagadaba,
“Au e dee ahe ange naa donu e gaavange oodou grain
e gai oodou hagadaumee,
gai de gau henua gee e dee aahe ange naa donu e unu uvaini hoou
oodou ne hagadaalea ange aagena;
9 aagai go dangada e hagihagia e gaina,
gai gilaadeu ga tuhi ai Tagi Maolunga;
gai go dangada e hagihagia denga grape e unumia uvaini
i lodo buibui o dogu mommee dabu.”
10 Ulu laa lodo, ulu laa lodo haitoga!
Hagadabena ina de haiava o dangada e ulu ai.
Hagaduulia age, hagaduulia age de haiava laumalie!
Aaua denga hadu;
hagaduulia age de hagailonga ange gi denga huaadangada.
11 Tilo, Tagi Maolunga gu hagailoo ange
gi luu bido o henua i lalo;
“Goodou hai ange gi tamaa hine o Zion:
Tilo, doodou Ia Hagaola gu humai!
Tilo, ia e gaamai ana hagaoanga madali ia,
ma mee e hagao ange ai alaadeu hegau.” *Isa 40.10; Mat 21.5; Rev 22.12
12 Gai gilaadeu e hagaingoo ange naa go de Gau Dabu,
go Dangada a Tagi Maolunga gu Hagaola;
gai koe e hagaingoo ange naa go de Aduhale e Saalaa,
se Aduhale e dee Dilia.