63
De sui ange de baubau ma de hagaola
1 Goai e humai nei i Edom ma Bozrah,
ma de gahu malo e mmea?
Goai deenei, gu gahu hagadanuaa nei
ma de seesee mai i de kona dono mmahi?
“Go au donu deenei, au e tala de mee heohi
gai e mmahi i de hagaola.” *Isa 34.5-17; Jer 49.7-22; Ezk 25.12-14; 35.1-15; Amos 1.11-12; Oba 1-14; Mal 1.2-5
2 Gai gu aha gu mmea ai naa oo malo,
bei malo o dangada e dagadagahia denga grape i de mommee kumi uvaini?
3 “Go au donu huu ne dagadagahi denga grape i de mommee kumi uvaini;
gai teai donu se dangada mai i de huaadangada madali au.
Au ne dagadagahi gilaadeu i dogu lili
ma de hagaduasala gilaadeu gi lalo i dogu bole;
gai olaadeu dodo ne ssii age gi ogu malo,
gai ogu malo alodahi gu baalau hogi i dodo.*Rev 14.20; 19.13, 15
4 Gai au ne maanadu bolo gu dae mai de laangi e sui ange ai de baubau,
gai de ngadau aagu e hagaola ai gu dae mai.
5 Au ne galogalo saele ga tilo, aagai e deai donu se dangada e balea mai au.
Au ne lele ogu mouli i teai se dangada e balea;
gai go ssauaa o dogu lima ne hagahai hegau ina dagu hagaola,
gai dogu bole ne bale mai au.*Isa 59.16
6 Au ne dagadagahi denga huaahenua i dogu lili,
gai ne hai gilaadeu gi ssenga i dogu bole;
au ne llingi olaadeu dodo gi honga de gelegele.”
De abodonu o Tagi Maolunga
7 Au e tala dagodo de abodonu o Tagi Maolunga,
ma hegau e heohi laa de tuhi ai ia,
i hiidinga hegau alodahi a Tagi Maolunga ne hai mai gi gidaadeu,
ma mee danuaa aana ne hai ange gi de gau Israel,
bei dagodo o dono lodo aloha ma dono abodonu laumalie.
8 Gai ia ne hagadaba, “Ni muna abodonu, gilaadeu go ogu dangada donu,
gai ni dama e dee hai hegau i de hagasenga;”
gai ia gu hai ai delaadeu Ia Hagaola.
9 Ia ne hagaduasala hogi i olaadeu hagaduasala alodahi,
gai tangada de langi i mada luoono mada ne hagaola gilaadeu.
Gai ia ne hagaola gilaadeu i dono aloha ma dono abodonu;
ia ne saabai gilaadeu i honga luoono eu mai i denga laangi gu hulo.
10 Aagai gilaadeu ne hagamaanege,
ma de hagadaemaha dono Hagasaalunga Dabu.
Gai ia gu sui ga se hagadaumee niiolaadeu,
gai ia ga hebagi ange gi gilaadeu.
11 Gai ono dangada e manadua naa denga masavaa madagidagi
go laangi o Moses ma ono dangada —
i hee iai de ia ne dagina mai gilaadeu laa lo te vai,
madali de gau hagaloosi o dana hagabuulingaa ssiibi?
Gai i hee iai de ia ne dugua ange
dono Hagasaalunga Dabu gi olaadeu magavaa,
12 gai go de ia ne hagahai hegau ina
dono lima sauaa i daho Moses,
ma de vvae lua de vai i olaadeu mada i mua,
ga hagamaolunga ai dono ingoo ga hano ai?*Exo 14.21
13 Ia ne dagi gilaadeu laa lo te vai gelo.
Gilaadeu e bei dagodo o de hoosa lodo henua,
gilaadeu tee baakuu donu.
14 Gai de Hagasaalunga o Tagi Maolunga ne hai gilaadeu gi hagammabu,
e bei denga manu haangai e loiho laa gi lo te geelonga.
Deenei dau hai ne dagi ai oo dangada,
gai koe ga hagamahamaha ai doo ingoo.
Dangidangi i de degi ma de bale
15 Koe gi galo iho i de langi ma gi diiloo,
ma mai i doo nohoanga maolunga, i de dabu ma de mahamaha.
I hee iai doo lodo mmahi ma doo sauaa?
Koe gu daohi doo abodonu ma doo lodo aloha i gimaadeu.
16 Aagai go koe demaadeu Damana,
e dee galemu donu Abraham e dee iloo gimaadeu,
gai Israel e dee madea gimaadeu.
Tagi Maolunga, go koe donu demaadeu Damana,
gai go koe demaadeu Ia Hagaola mai loo madagidagi.
17 Tagi Maolunga, gu aha gu dugu mai ai naa goe gimaadeu gi hulo gee i oo haiava
ma de hagamakaga omaadeu lodo, gimaadeu gu dee maatagu i de goe?
Ahe mai i hiidinga o oo dangada hai hegau,
go denga aamuli gu bolo adu gi de goe.
18 Oo dangada ne kave doo mommee dabu
i dahi masavaa bodobodo,
aagai iainei omaadeu hagadaumee gu oha doo mommee dabu.
19 Gimaadeu gu bei donu dangada e dee go koe ne dagina i mua loo;
gai gu bei dangada e dee hagaingoo i doo ingoo.