64
1 Mee naa koe gi saea de langi ga iho mai gi lalo,
gi ngalungaalue ai denga mounga i mada luoo mada!
2 Bei de hai a de ahi e haula ai denga laa manu vaaligiligi,
ma de hai gi kai denga vai,
haia hogi gi iloo e oo hagadaumee dagodo ssauaa o doo ingoo,
ma de hai gi maatagu denga huaahenua i mada luoo mada!
3 De masavaa aau ne hai ai denga mee hagamaatagu amaadeu tee iloo bolo e hai,
koe ne hano iho, gai denga mounga gu ngalungaalue i oo mada i mua.
4 Mai madagidagi gai dangada tigi langona, be gu tonu ange aagena,
aabe gu gidee dahi Maadua bei oo dagodo,
ia e balea ange gilaadeu e daalia ange ia.*1 Co 2.9
5 Koe e abodonu ange gi tangada e malangilangi i de hai de mee heohi,
ma gilaadeu e manadua au hai haingaa mee.
Aagai ga daulooloa huu demaadeu haisala ange gi mee nei, gai koe gu lili.
Dee hee ai naa demaadeu hai e ola ai?
6 Gimaadeu alodahi gu bei tangada e dee gilimalali laa,
amaadeu hegau heohi alodahi e bei donu huu denga bido malo hakino gee;
gimaadeu alodahi gu bei de lau manu gu mmae,
gai omaadeu baubau gu bei dagodo o de madangi, e hagalleva saele gimaadeu.
7 E deai donu se dangada e hagahia adu doo ingoo,
aabe e hagammahi e ssala goe;
koe gu hagammuni luoo mada i gimaadeu,
gai gu dugu ange omaadeu baubau gi hagaduasala ina gimaadeu.
8 Gai iainei, Tagi Maolunga, go koe demaadeu Damana.
Gimaadeu go denga bela pigi, gai koe go de ia hai gumedi hadu;
gimaadeu alodahi ni mee niiau ne hai.
9 Tagi Maolunga, koe gi dee lili i gimaadeu;
koe gi dee manadua omaadeu baubau ga hano ai.
Gimaadeu e dangidangi adu, galo mai gi gimaadeu,
gimaadeu alodahi go oo dangada.
10 Oo aduhale dabu gu hai ma gu se vao,
Zion gu bei hogi dagodo o dahi lodo henua,
gai Jerusalem gu ngadi dagodo.
11 Demaadeu temple dabu ma de mahamaha,
go de mommee omaadeu maadua ne tuhi ai goe, gu dudu i de ahi;
gai omaadeu goloa hagamogomogo alodahi gu maoha ma e daakodo ai.
12 Tagi Maolunga, koe e noho naa donu huu ga dee muu
i dua mee nei alodahi?
E aha, koe ga noho naa donu huu e dee muu,
ma de hai gi kii ange demaadeu duasala?