65
De hagaduasala ma de hagaola
1 “Au gu baba ange e hagaago ange au gi dangada e tee siilia ogu dagodo;
gai gilaadeu tee saalaa au e gidee naa e gilaadeu au.
Gai au e hai ange naa gi de huaahenua
tee dalodalo i dogu ingoo, ‘Deenei au, deenei au!’ *Rom 10.20-21
2 Au ne haalo ange luoogu lima mai i taiao ga boo ai,
gi dahi huaadangada e makaga olaadeu lodo,
gai ni dangada e seesee i denga haiava dee danuaa,
ma de daudali i alaadeu maanadu donu huu.
3 Gilaadeu ni dangada e hagadaemaha ina ogu lodo i masavaa alodahi,
gilaadeu e hai denga sigidaumaha i lodo veelenga,
ma de dudu mee maanongi i honga mommee o ssigidaumaha e hai i hadu.
4 Gilaadeu e nnoho i magavaa daanunga i de boo
ma e hai ai alaadeu daumaha hagammuni;
gilaadeu e gai kano o denga biigi,
gai lodo alaadeu anibada iai vai o denga manu hakino gee.
5 Gilaadeu e hai mai, ‘Koe gi hano gee mai i kinei, aude humai gi hagabaa mai,
go hiidinga au e kii ange de dabu i de goe!’
De gau bee nei e bei de useahi i lodo luoogu bongaa usu,
ma de ahi e gaa laa i taiao ga boo ai.
6 Tilo, gu lava i de sisi i ogu mada i mua:
au e dee noho naa donu huu ga dee muu,
au e sui ange naa donu alaadeu hegau alodahi.
Au e hagao ange naa donu alaadeu hegau,
7 go oodou baubau ma baubau o oodou dubuna,
go Tagi Maolunga e hagadaba.
Go hiidinga gilaadeu ne dudu denga sigidaumaha i honga denga mounga
ma de hai baasi mai gi de au i honga duuduu,
au e hagabau ange naa gi gilaadeu
de hagaoanga o alaadeu hegau i mua.”
8 E hagadaba Tagi Maolunga,
“De masavaa e hanu ai vai huamanu i lodo gau looloa grape,
gai dangada e hagataba, ‘Aude oha de mee naa,
go hiidinga e hanu manuuia iai,’
gai e bei ai hogi dagu hai e hai ai ogu dangada hai hegau;
au e dee daa naa donu gilaadeu alodahi gi maakau.
9 Au e hai naa gi hanu hagadiilinga o Jacob,
ma hagadiilinga o Judah gi henua i ogu mounga;
gai dangada aagu e hili e henua naa i de mommee laa,
gai ogu dangada hai hegau e nnoho naa i kilaa.
10 Sharon e hai naa ga se mommee iai helii ange gi denga hagabuulingaa ssiibi,
gai de geelonga o Achor gu se mommee hagammabu niio denga manu,
ange gi ogu dangada e saalaa mai au.*Josh 7.24-26
11 Aagai goodou gu dilia laa Tagi Maolunga,
ma de ngalo dogu mounga dabu,
gai e hagadabena dahi deebele ange gi tiinonga go Gad,*Gad go dahi diinonga gu tala laa bolo e hai ga duadonu tangada.
ma de hhao denga ubu uvaini gu hilo ange gi tiinonga go Meni;†Meni go dahi diinonga e hilihilia mee e hai i laangi e loomai.
12 au e hagadabena adu naa gi goodou de gadilaasa,
gai goodou alodahi e ino ange naa gi de ia e daia gi maakau;
go hiidinga au ne hagaagahi, aagai goodou tee pasa mai,
au ne basa adu, aagai goodou tee hagallongo.
Goodou ne hai de baubau i mada luoogu mada,
ma de hilihili mee oogu e dee malangilangi ai.”
13 Deenei ai, e hagadaba de Ia Aamua go Iahweh,
“Tilo, ogu dangada hai hegau e gaimee naa ga boobosu,
aagai goodou e hiikai;
ogu dangada hai hegau e unu naa ga boobosu,
aagai goodou e hieunu,
ogu dangada hai hegau e malangilangi naa,
aagai goodou e hagadookaa ina naa.
14 Tilo, ogu dangada hai hegau e hevaalogi naa ga daahili
i de malangilangi olaadeu lodo,
aagai goodou e tangi naa
ma de daemaha oodou lodo,
ma de heehee ga tangi i de mmae oodou lodo.
15 Gai doodou ingoo e hai naa ga se mee hagamalaia
ange gi dangada aagu gu hili;
gai de Ia Aamua go Iahweh e daa naa goodou ga maakau,
aagai ia e gaavange naa dahi ingoo hoou moo ogu dangada hai hegau.
16 Gai be goai naa huu e hagamanuuia ina dahi i honga de henua,
gai ia e hai de mee nei i de ingoo o de Maadua abodonu;
gai tangada e haia dahi hagatoo donu i honga de henua,
e hagatoo donu naa i de ingoo o de Maadua abodonu.
Gai mee hai ngadaa gu hai i mua e ngalo naa,
gai gu haoli gi dee gidee e au.
De langi hoou ma henua i lalo hoou
17 “Tilo, au e hai naa de langi hoou
ma henua i lalo hoou.
Denga mee madagidagi e hagangalo naa,
dangada e dee manadua naa donu.*Isa 66.22; 2 Pe 3.13; Rev 21.1
18 Aagai goodou llodo danuaa ma de malangilangi ga hano ai,
i mee aagu gu hai;
tilo, au e hai naa Jerusalem gi malangilangi,
gai ono dangada gi llodo danuaa.
19 Au e malangilangi naa i Jerusalem,
ma de lodo danuaa i ogu dangada;
gai e deai naa donu se tangi aabe se tangi see
e langona i lo te aduhale.*Rev 21.4
20 Gai e deai ange naa donu se gaagaa daudahi i kilaa
e sogoisi ono laangi e mouli ai,
aabe se dangada madumaatua e tuu mai ono ngadau e mouli ai;
tangada e mouli laa ga dae ai gi de lau ono ngadau
e hagabinga naa bolo goi gauligi donu huu,
gai tangada e dee duu laa de lau ono ngadau
e hagabinga naa bolo gu malaia.
21 Gai dangada e hagatuu naa olaadeu hale ga nnoho ai,
ma de doo alaadeu veelengaa grape ga gai olaadeu hua.
22 Gilaadeu gu dee hagatuu denga hale, aagai ni dangada gee e nnoho ai,
aabe e doo denga manu, aagai ni dangada gee e gaina olaadeu hua.
Gai taulooloa laangi o dahi manu ssomo,
go taulooloa hogi laangi o ogu dangada;
dangada aagu ne hili e hagadanuaa naa donu
i mee olaadeu gu hai hegau ange aagena.
23 Alaadeu hegau gu dee ni ngadi hegau,
aabe alaadeu dama e haanau e tuu ange gi de hai ngadaa;
gai gilaadeu e hai naa go hagadiilinga a Tagi Maolunga e hagamanuuia,
go gilaadeu alodahi ma olaadeu hagadiilinga.
24 I mua delaadeu hagaagahi mai au, gai au e basa ange gi gilaadeu,
gai de masavaa alaadeu goi tala ai alaadeu muna gai au ga hagallongo.
25 De wolf ma ssiibi gauligi e gaimee naa i de mommee daudahi,
gai de laiono e gai naa denga helii bei dagodo o de kaau;
aagai de labodo hagammau e gai naa mama o de gelegele.
Gai gilaadeu e dee hagalagohia naa donu dahi,
aabe e oha dahi mee i honga dogu mounga dabu,” *Isa 11.6-9
go Tagi Maolunga e hagadaba.