66
De hagaduasala ma de tali hagalodolodo
1 E hagadaba Tagi Maolunga:
“De langi go dogu nohoanga,
gai henua i lalo go de mommee e dugu ange aagena luoogu vae.
Gai i hee iai de hale oodou e hagaduu moogu?
Gai i hee iai dogu mommee e hagamabu ai?*Mat 5.34, 35; 23.22 *Acts 7.49-50
2 E aha, e dee go dogu lima ne haia mee nei alodahi,
deenei ai, gu hanu mee nei alodahi?
go Tagi Maolunga e hagadaba.
Deenei tangada aagu e hagadubu:
go tangada e lodo maolalo ma de dahuli abodonu ono lodo,
ma de bolebole i dono madagu i agu muna.
3 Aagai tangada e daia dahi kaau e hai ai ssigidaumaha,
e bei hogi tangada e daia tangada ga magau;
tangada e haia ssigidaumaha i dahi ssiibi gauligi,
e bei hogi tangada e milo laa de ua o dahi gaaduu;
tangada e haia ssigidaumaha i denga grain,
e bei hogi tangada e sigidaumaha i dodo o de biigi,
gai tangada e haia ssigidaumaha hagamaanadu o mee maanongi,
e bei hogi tangada e daumaha ange gi dahi diinonga.
Gilaadeu ne hilihili de hai donu huu olaadeu lodo,
gilaadeu ne malangilangi i olaadeu diinonga hakino gee;
4 deelaa ai, au e hilihili naa hogi de hai gi vaivai haia gilaadeu,
ma de hai gi tuu ange gilaadeu gi mee olaadeu e maatagu ai.
Go hiidinga de masavaa aagu ne hagaagahi ai, aagai teai ne basa mai;
de masavaa oogu ne basa ai, aagai tee hagalaangona.
Aagai gilaadeu ne hai de baubau i mada luoogu mada,
ma de hilihili mee oogu e dee malangilangi ai.”
5 Hagalaangona muna a Tagi Maolunga,
goodou e bolebole i doodou maatagu i ana muna:
“Oodou daina e kino i goodou,
ma de vvae gee goodou i hiidinga dogu ingoo, gu hagataba:
‘Goodou hagamahamaha ina Tagi Maolunga,
gi gidee ai e gimaadeu doodou malangilangi!’
Aagai gilaadeu e dookaa naa donu.
6 Hagalaangona adu de hellumi o dangada i de aduhale,
hagalaangona adu de hagalongaa o dangada i de temple!
Go de leo o Tagi Maolunga e suuia ange hegau a ono hagadaumee.
7 I mua de hai ono hagalangona,
gai ia gu haanau;
gai i mua ono hagammae,
gai ia gu haanau dahi dama daane.*Rev 12.5
8 Gai goai donu gu langona de hai dahi mee bee nei?
Goai gu gidee dahi hegau bee nei?
E maua i de hai gi dahi henua i dahi laangi daudahi,
aabe e maua dahi huaahenua gi haanau i dahi masavaa bodobodo donu huu?
Gai de masavaa donu huu o Zion ne hai ai ono hagalangona,
gai ia gu haanau ana dama.
9 E aha, e maua e au i de hai gi dae de masavaa o de hagalangona
gai e dee hai gi haanau dahi dama?
go Tagi Maolunga e hagadaba.
E aha, e maua e au i de pono de mommee o denga dama,
i de masavaa aagu e hagahaanau ai?
go doo Maadua e hagadaba.
10 Malangilangi madali Jerusalem, ma de lodo danuaa i ono hiidinga,
goodou alodahi e aaloha i de aduhale laa;
goodou gi malangilangi mmao madali Jerusalem,
goodou alodahi e hinangalosaa i ono hiidinga.
11 Goodou e bei naa dagodo o de gaagaa gu haau ma gu bosu
ma de hagaaneane i de gaanuunu o dono dinana;
goodou e unuunu naa ga boobosu
ma de malangilangi i mee lagolago o aduhale laa.”
12 Gai e hagadaba Tagi Maolunga,
“Tilo, au e hai naa gi noho baba Jerusalem bei dagodo o dahi saalingaa vai,
gai de lava o denga huaahenua e hhao naa ga honu Jerusalem bei ssaalingaa vai gu honu baabaa laa;
gai goodou e haau naa ma de saabai i honga dono dege,
aama de viivii i honga luu vae.
13 Au e hagaaneane naa goodou
bei de hagaaneane a dahi dinana dana dama;
gai goodou e hagaaneane ina naa i Jerusalem.”
14 Goodou e malangilangi naa i de masavaa oodou e gidee ai mee nei,
gai oodou ivi e ssomo danuaa naa bei denga helii;
gai Tagi Maolunga e hai naa gi iloo e ono dangada hai hegau dagodo o dono sauaa,
aagai ia e hai naa gi iloo e ono hagadaumee dagodo o dono lili.
15 Tilo, Tagi Maolunga e humai naa madali de ahi,
gai ono hada hebagi e bei dahi sio;
ia e hagahai hegau naa dono lili i dono bole,
gai dana hagasee e hai naa madali de ahi ula.
16 Gai Tagi Maolunga e hagaduasala naa
dangada alodahi i de ahi ma dana gadilaasa,
gai e soa naa dangada a Tagi Maolunga e daa ga maakau.
17 “Gilaadeu gu vvae gee laa ma gu hagagilimalali gilaadeu e hulo gi lodo veelenga, ma e daudali ange ai i dahi diinonga i lo te ungaalodo, ma e gai kano o denga biigi ma gimoo, aama mee hakino gee ange laa — gilaadeu e maakau naa donu alodahi, go Tagi Maolunga e hagadaba.
18 Gai au e iloo dagodo o alaadeu hegau ma maanadu i olaadeu lodo; gai e dae mai naa de masavaa e hagabuni mai ai denga huaahenua alodahi ma dangada e pasa i muna henua gee. Gai gilaadeu e loomai naa ga gidee dogu mahamaha.
19 Au e hagaduu ange naa dahi hagailonga i olaadeu magavaa, ma de hai hanu gilaadeu ne ola gi hulo gi denga huaahenua: go Tarshish, ma Put,*Put, aabe go Pul i muna Hebrew, e bei go Libya. ma Lud, go dangada e mmau i de tili mee hholu, ma Tubal ma de gau Greek, ma mommee i tagudai tigi langona e gilaadeu ogu longo aabe gidee dogu mahamaha. Gilaadeu e tala ange gi denga huaahenua dagodo o dogu mahamaha. 20 Gai gilaadeu e hagaahe mai naa oodou daina i denga huaahenua alodahi gi dogu mounga dabu, e hai ai ssigidaumaha ange gi Tagi Maolunga. Gilaadeu e loomai naa i honga denga hoosa ma hada hebagi, ma honga hada ange laa, ma honga denga donkey ma gamelo, bei de hai a de gau Israel e gaamai ai laa alaadeu sigidaumaha grain i lodo gumedi gilimalali gi de hale o Tagi Maolunga, go Tagi Maolunga e hagadaba. 21 Gai au e hili naa hanu gilaadeu ga hai ai de gau haimeedabu ma dangada de aamuli o Levi, go Tagi Maolunga e hagadaba.
22 De langi hoou ma henua i lalo hoou aagu e hai e dee llilo naa donu, go Tagi Maolunga e hagadaba; gai e bei ai hogi doo hagadiilinga ma doo ingoo.*Isa 65.17; 2 Pe 3.13; Rev 21.1 23 Mai i de duu o de maasina i dai ga dae ai gi de ahe ange ga duu, ma mai i dahi Sabbath ga dae ai gi dahi Sabbath, gai dangada alodahi e loomai naa ga daumaha mai gi de au, go Tagi Maolunga e hagadaba. 24 Gilaadeu e hulo naa ga tilo angaanga o de gau maakau ne hai baasi mai gi de au; denga ilo i olaadeu angaanga e dee maakau naa donu, gai de ahi e dee diinei naa hogi, gai gilaadeu alodahi e hai naa ga ni mee hakino gee ange gi dangada alodahi.” *Mark 9.44, 46, 48