6
De duuli ina luu baasi o Jerusalem
1 “Dangada o Benjamin, goodou saavini mage hulo mmuni!
Gai saavini hulo gee mai i Jerusalem!
Ilihia de hanga manu i Tekoa!
Gai dahu ina dahi ahi hagailonga i honga o Beth Hakkerem!
Go hiidinga de hai ngadaa gu humai i ngaiho,
gai se mee e haia de oha laumalie.
2 Au e oha naa de aduhale mahamaha,
go tamaa hine o Zion.
3 De gau hagaloosi ma alaadeu ssiibi*de gau hagaloosi ma alaadeu ssiibi go hagadaumee o Jerusalem ma olaadeu hodooligi.
e loomai naa e hebagi ange gi de aduhale;
gilaadeu e hagatuu naa olaadeu hale malo i luu baasi,
dahi ma dahi e hagaloosi naa i dono mommee.”
4 ⌊Gilaadeu e hagataba,⌋ “Hagadabena e hebagi ange gi de aduhale!
Hiihidi age, gidaadeu ga hebagi i de hualaangi!
Aagai gu baubau, de laa ga danu nei,
gai ga danu nei donu de laa.
5 Hiihidi age, gidaadeu ga hebagi i de boo
e oha ai denga hale danuaa!”
6 Gai e hagadaba Tagi o denga hagabuulinga hebagi:
“Selea iho denga manu ssomo i kilaa
ma de hagatuu age mee e oha ai Jerusalem.
De aduhale nei e hagaduasala naa donu;
go hiidinga e honu i dangada e vaivai haia dangada.
7 De aduhale nei e honu malingilingi i de baubau,
bei de vai geli e honu baabaa laa i vai.
De alasala ma de oha mee e hai i kilaa;
gai au e gidee dagodo o dono magi
ma ono maanuga i masavaa alodahi.
8 Jerusalem, koe gi kana ange,
au kana huli gee i de goe i dogu lili
ga hai doo henua gi ngadi dagodo,
gai gu deai dangada e nnoho ai.”
9 E hagadaba Tagi o denga hagabuulinga hebagi:
“Gilaadeu gi ogohia dangada o Israel e doe
bei de hagihagi ga odi hua o de grapevine ;
gai aahe ange hagihagia hua e doe i honga ono laa,
bei hegau a tangada e hagihagia denga grape.”
10 Goai aagu e basa ange aagena ma de hagakana ange?
Gai goai naa e hagalangona agu muna?
Tilo, olaadeu dalinga gu pono,
gai gilaadeu gu dee maua i de hagallongo.
Tilo, muna a Tagi Maolunga gu ni mee hakadanga i olaadeu daha;
gilaadeu e dee malangilangi ai donu.
11 Aagai au gu honu i de bole o Tagi Maolunga,
au gu dee maua i de golomagi dogu bole.
⌊Gai e hagadaba Tagi Maolunga,⌋
“Haia gi hano iho lili gi denga gauligi i honga de haiava,
ma denga dama daane gu hagabuni laa;
gai e duu ange naa hogi gi taane ma dono bodu,
ma de gau maatua, aama de gau madumaatua.
12 Olaadeu hale e gaavange naa gi hanu dangada gee,
madali olaadeu alahenua ma olaadeu bodu;
go hiidinga au e hagaabo naa dogu lima
e hai baasi ange ai gi dangada e nnoho i honga de henua,*Jer 8.10-12
go Tagi Maolunga e hagadaba.
13 Mai i tangada maolalo ga dae ai gi tangada maolunga,
go gilaadeu alodahi e nnoo ange laa gi mee e maua i hegau dee heohi;
gai mai i denga pelaabisi ga dae ai gi de gau haimeedabu,
gilaadeu alodahi e hai hegau i de hadu muna.
14 Gilaadeu e saabini maanuga o ogu dangada
e dagodo be e dee ni maanuga kona.
Gilaadeu e hagataba, ‘Nnoho paba, nnoho paba,’
aagai e deai donu se nnoho paba.*Ezk 13.10
15 E aha, gilaadeu e dee dookaa laa donu i alaadeu hegau hakino gee?
E deai, gilaadeu e dee dookaa donu;
gilaadeu e dee iloo donu be se aha de dookaa.
Gai gilaadeu e maakau naa hogi madali gilaadeu gu maakau laa;
gilaadeu e hagadee kii naa i de masavaa aagu e hagaduasala ai gilaadeu,”
go Tagi Maolunga e hagadaba.
16 E hagadaba Tagi Maolunga,
“Goodou tuu i sugusuguinga o denga haiava diiloo ai,
gai ssili be i hee denga haiava madagidagi,
ma de ssili be i hee de haiava danuaa,
gai goodou ga seesee i ono lodo,
gi maua ai e oodou hagasaalunga i de hagamaabunga.
Aagai goodou e hagataba, ‘Gimaadeu e dee seesee donu i de haiava laa.’
17 Au ne hili hanu dangada dagitilo moodou, ga hai ange,
‘Goodou hagalaangona de ili o de hanga manu!’
Aagai goodou e hagataba, ‘Gimaadeu e dee hagallongo donu.’
18 Deenei ai, denga huaahenua, goodou hagalaangona;
de hagabuulingaa dangada, goodou gi iloo mee e hai ange gi gilaadeu.
19 Henua i lalo, goodou hagalaangona;
tilo, au e hai naa gi humai dahi hai ngadaa gi de huaadangada nei,
e sui ange ai hua o alaadeu hagatau,
go hiidinga gilaadeu tee hagallongo mai gi agu muna;
gai gilaadeu ne kino i agu hainga.
20 Ni haigamaiana aha denga frankincense mai i Sheba,
aabe go laagau maanongi mai i dahi henua mmao?
Au e dee malangilangi i oodou sigidaumaha dudu;
gai oodou sigidaumaha e dee ni mee niiogu e malangilangi ai.”
21 Deenei ai, e hagadaba Tagi Maolunga,
“Tilo, au e dugu naa hanu mee e haia ga baakuu de huaadangada nei.
Denga damana ma denga dama e laavea ai naa ga baakuu;
gai dangada e paa ange gi gilaadeu ma olaadeu soa e maakau ai naa.”
22 E hagadaba Tagi Maolunga,
“Tilo, dahi hagabuulingaa dangada
e loomai naa i dahi henua i ngaiho;
dahi huaahenua mmahi gu hiihidi age
i de bido laa o henua i lalo.
23 Gilaadeu gu dau alaadeu mee hholu ma olaadeu dao;
gilaadeu e vaivai hai dangada ma tee llodo aaloha.
Delaadeu loomai i honga hoosa
e bei de hadihadi mai o denga beabeau;
gilaadeu e hagatau hugadoo i olaadeu hagabuulinga hebagi,
e hebagi adu gi de goe, tamaa hine o Zion.”
24 Gimaadeu gu langona olaadeu longo,
gai omaadeu lima gu pole.
Gimaadeu gu dee paba mmao omaadeu lodo,
gimaadeu gu mmae bei de hine gu hai ono hagalangona.
25 Goodou aude ssao gi hulo gi tua de aduhale
aabe gi seesee i honga denga haiava,
go hiidinga de hagadaumee e poo dana gadilaasa,
gai gu hagamaatagu mommee alodahi.
26 Ogu dangada, goodou kahu i malo daladala,
ma de tige saele i lodo lehu;
goodou tangi ma de tangi see
bei doodou tangi i dahi dama dagidahi,
go hiidinga e moolau naa donu
de dae mai o tangada e oohaa gidaadeu.
27 “⌊Jeremiah,⌋ au gu hai goe gi se dangada
e hagavaivai ina denga baalanga,
gai denga ore go ogu dangada;
gai koe ga tilo ai ma de hagatale ai dagodo o alaadeu hegau.
28 Gilaadeu alodahi ni dangada makaga olaadeu lodo ma de hagamaanege,
gai e hulo saele ma e hai samu i dangada.
Gilaadeu e makaga bei denga bronze ma iron;
gilaadeu alodahi e hai hegau hakino gee.
29 Denga mee ili ahi,
e hai ga mmahi de ahi e dudu ai gi deai lead,
aagai e deai haigamaiana de duudagi de hagadanuaa mee nei;
go hiidinga de gau baubau e dee maua donu i de hai gi gilimalali.
30 Gilaadeu gu hagaingoo ange bolo ni selevaa gu tili,
i hiidinga Tagi Maolunga gu tili gilaadeu.”