5
Haisala o Jerusalem ma Judah
1 “Goodou saavini saele naa i honga denga haiava o Jerusalem,
ma de ssala naa i lo te aduhale be e gidee dahi dangada.
Noo goodou e gidee dahi dangada daudahi
e hai hegau i de heohi ma de ssala de muna abodonu,
gai au ga degi ange gi de aduhale nei.
2 Gai ga hagataba naa donu gilaadeu,
‘Gimaadeu e hagatoo donu i de mouli o Tagi Maolunga’,
aagai gilaadeu e dee hagatoo donu i de muna abodonu.”
3 Tagi Maolunga, e aha, e dee go de muna abodonu aau e ssala?
Koe ne hagailiili gilaadeu, aagai gilaadeu tee langona iho de mmae;
koe ne hagahai ngadaa gilaadeu, aagai gilaadeu tee llodo e hai de mee heohi.
Gilaadeu ne hagamakaga olaadeu lodo bei de hadu,
ma tee llodo e daahuli olaadeu lodo.
4 Gai au ne hagadaba, “De gau nei ni dangada hagaau aloha;
gilaadeu e llodo ssenga;
go hiidinga gilaadeu e dee iloo haiava o Tagi Maolunga,
ma hainga a delaadeu Maadua.
5 Gai au e hano naa gi daho de gau maolunga
e basa ange ai gi gilaadeu;
gilaadeu e iloo donu haiava o Tagi Maolunga,
ma lodo o delaadeu Maadua.”
Aagai gilaadeu ne hagabuni ga hadihadi
ana laagau hagahai hegau,
ma de duuduu denga mee noonoa.
6 Deenei ai, dahi laiono mai i lodo mee muimui e daa naa gilaadeu ga maakau,
dahi wolf e hangahanga naa gilaadeu,
dahi leopard e dagitilo naa i gaogao olaadeu aduhale
e hangahanga dangada alodahi e ssao mai i kilaa,
i hiidinga gilaadeu gu kona de hagamaanege
gai ne lagolago olaadeu hanonga ne aahe dua ai.
7 “Dee hee dagu hai e degi adu ai gi de goe?
Au dama gu daahuli gee i de au
gai gu hagatoo donu i denga diinonga e dee ni maadua abodonu.
Au ne haangai ange gilaadeu ga boobosu,
aagai gilaadeu ne dagodo haisala
ma de daga ga hulo gi hale o de gau hai be ni manu.
8 Gilaadeu e bei denga hoosa e boobosu danuaa laa,
gai e llodo ange gi denga hoosa haahine,
dahi ma dahi e sae ange gi de bodu o tangada ange laa.
9 E aha, au e dee hagaduasala naa gilaadeu i hiidinga o mee nei?
go Tagi Maolunga e hagadaba.
E aha, au e dee sui ange naa hegau a de huaahenua e haia mee nei?
10 Hannoo laa lodo ana veelengaa grape ga oohaa ai,
aagai e dee oha gi odi.
Aaua gi odi iho ono laa,
go hiidinga gilaadeu e dee nii Tagi Maolunga.
11 Dangada o Israel ma dangada o Judah
e dee hai hegau mai gi de au i de muna abodonu,”
go Tagi Maolunga e hagadaba.
12 Gilaadeu tee tala de muna abodonu i dagodo o Tagi Maolunga,
gilaadeu ne hagataba, “E deai naa donu ana mee e hai!
E deai ange naa donu se hai ngadaa e duu mai gi gimaadeu;
gimaadeu e dee gidee naa donu de gadilaasa aabe go de onge.
13 Denga pelaabisi e bei donu huu de madangi,
gai ana muna e dee i olaadeu daha;
alaadeu muna e tala gi aahe ange donu huu gi gilaadeu!”
14 Deenei ai, e hagadaba Tagi Maolunga, de Maadua o denga hagabuulinga hebagi:
“Go hiidinga goodou gu tala muna nei,
tilo, au e hai naa agu muna oodou e tala gi se ahi,
gai de gau nei go lahhie e dudu laa i de ahi.
15 Tilo, dangada o Israel, au e hai naa gi humai dahi huaahenua
i de mommee mmao gi hebagi adu gi goodou,
go Tagi Maolunga e hagadaba.
Se huaahenua gu dahi madagidagi gai gu daulooloa,
gai se henua niiodou e dee iloo alaadeu muna
aabe e tonu ange gi alaadeu muna.
16 Alaadeu mee hhao dao e bei dahi daanunga e mahuge laa;
gai gilaadeu alodahi ni daane dau i de hebagi.
17 Gai gilaadeu e gai naa oodou huamanu gu hagihagi ma oodou gai,
ma de hai ga deai oodou dama daane ma damaa hine.
Gilaadeu e ngole naa oodou hagabuulingaa ssiibi ma kaau,
ma de gai hua o oodou grapevine ma oodou fig.
Gai alaadeu gadilaasa e oha naa
denga aduhale buibui oodou e tali ange naa aagena.
18 Aagai ga hai naa donu mee nei i laangi laa, go Tagi Maolunga e hagadaba, gai au e dee daa donu goodou gi odi. 19 Gai de masavaa naa huu a oodou dangada e hagataba ai, ‘Gu aha Tagi Maolunga taadeu Maadua gu hai mai ai mee nei alodahi gi gidaadeu?’ gai koe ga hai ange, ‘Goodou ne tili au gai ga daumaha ange gi denga diinonga i doodou henua donu, deenei ai, goodou e hai hegau ange naa gi de gau henua gee i dahi henua gee.’
20 Daalaa ange mee nei gi dangada o Jacob,
ma de hagailoo ange gi dangada o Judah:
21 Goodou hagalaangona muna nei, e de gau llodo ssenga ma de ssenga,
goodou e hanu oodou ganomada, aagai e dee gidee,
goodou e hanu oodou dalinga, aagai e dee langona.*Isa 6.9-10; Ezk 12.2; Mark 8.18
22 E aha, goodou e dee maatagu naa i de au?
go Tagi Maolunga e hagadaba.
E aha, goodou e dee maatagu i de tuu i mada luoogu mada?
Goodou e dee bolebole i doodou tuu i ogu mada i mua?
Au ne hai de gelegele dea go de ngaadonga o tai,
gai se buibui e dagodo gai tai e dee maua i de hano gi ui ai.
Denga beau e hadihadi mai, aagai e dee maua i de oha;
denga beau e hagangolo mai, aagai e dee maua i de hulo gi ui ai.*Job 38.8-11
23 Aagai de huaadangada nei e makaga olaadeu lodo ma de hagamaanege;
gilaadeu gu huuhuli ma gu hulo gee.
24 Gai gilaadeu e dee hagataba i olaadeu lodo,
‘Gidaadeu ga maatagu i Tagi Maolunga taadeu Maadua,
go de ia ne gaamai de langi i de hagaodi ma taamada o de ngadau i de masavaa gu dugu,
gai go de ia ne gaamai gi gidaadeu denga uvigi o de hagihagi.’
25 Gai hegau baubau gu daohi mee nei gi dee loomai;
oodou haisala gu daohi mee danuaa i goodou.
26 E hanu dangada baubau i magavaa o ogu dangada,
e nnoho ma e tali bei dangada e mmuni laa e dada denga manu llele i ssele,
ma dangada e dugu laa denga sele e dada ai dangada.
27 Olaadeu hale e hoohonu i hegau hagasenga,
bei buibui e hoohonu laa i denga manu llele;
gilaadeu gu kona de lava ma de mmahi,
28 gai gu pedi ma de malali olaadeu gili.
E deai donu se tuu mai o alaadeu hegau baubau;
gilaadeu e dee hagamodu muna o denga gauligi gu deai olaadeu damana i de heohi
gai gilaadeu e dee tala hagadonu heohi o de gau hagaau aloha.
29 E aha, e dee heohi dagu hagaduasala gilaadeu i hiidinga o mee nei?
go Tagi Maolunga e hagadaba.
E dee heohi dagu sui ange hegau a dahi huaahenua bee nei?
30 Dahi hegau hagalele mouli ma de baubau
gu hai i honga de henua:
31 denga pelaabisi e hadu muna i delaadeu pasa pelaabisi,
gai de gau haimeedabu e dagi i olaadeu sauaa donu huu;
gai ogu dangada e malangilangi donu i mee nei!
Aagai ni aha naa oodou ga hai i dua mee nei?