4
1 “Israel, noo koe e lodo e ahe mai gi de au,
gai ahe mai,
go Tagi Maolunga e hagadaba.
Noo koe e aau gee oo diinonga hakino gee i mada luoogu mada,
gai goodou e dee aahe ange e hulo gee,
2 gai noo koe e hagatoo donu i de mee abodonu, ma de hagamodu heohi aama de heohi, ga hagadaba,
‘Au e hagatoo donu i de mouli o Tagi Maolunga,’
gai au e hai naa ga manuuia denga huaahenua,
gai gilaadeu ga tuhi ai au.”
3 Gai Tagi Maolunga e hai ange gi denga daane o Judah ma Jerusalem:
“Hagabalabala ina oodou gelegele tigi hagabalabala laa,
gai goodou aude dooa oodou manu i magavaa o denga manu daladala.*Hos 10.12
4 Goodou gi tuu dagaholiage ange gi Tagi Maolunga,
gai tuu dagaholiage ina oodou lodo,
goodou e dangada o Judah ma dangada o Jerusalem;
kana humai dogu bole bei de ahi ula e dee maua laa i de diinei,
i hiidinga o oodou hegau baubau.
De hai ngadaa mai i ngaiho
5 “Hagailoo ina i Judah gai daalaa i Jerusalem, hai ange:
‘Ilihia de hanga manu i honga de henua alodahi!’
Gai oo ma gi hagadaba:
‘Hagabuni ina dangada!
Gidaadeu ga ulu gi lodo aduhale buibui!’
6 Hagaduulia de hagailonga e hulo ai gi Zion!
Goodou aude nnoho, gai saavini mage hulo mmuni!
Go hiidinga au e hai naa gi humai dahi hai ngadaa i ngaiho,
gai se mee e haia de oha laumalie.”
7 Dahi laiono gu sao mai i lodo mee muimui;
gai de ia e oohaa denga huaahenua gu sao e humai.
Ia gu dugu dono mommee
gai ia ga oha ai gi maoha doo henua.
Oo aduhale e ngadi daakodo naa,
gu deai dangada e nnoho ai.
8 Gai goodou gahu i malo daladala
ma de hinangalosaa ma de tangi,
go hiidinga de bole laumalie o Tagi Maolunga
e dee hano gee naa donu i gidaadeu.
9 E hagadaba Tagi Maolunga, “De laangi laa
gai de hodooligi ma dagi o de henua e lodo baageaa naa,
de gau haimeedabu e llele naa olaadeu mouli,
gai denga pelaabisi gu dee hagadonusia alaadeu mee e gidee.”
10 Gai au ga hai ange, “De Ia Aamua go Iahweh, koe gu daahanga de hagabuulingaa dangada nei, aama Jerusalem i dau hagadaba, ‘Goodou e nnoho paba donu,’ aagai de gadilaasa gu baba ange donu e daa gimaadeu gi maakau.”
11 De masavaa laa gai e tala ange naa gi de huaadangada nei ma Jerusalem, “De madangi hagavvela e ssau mai naa i honga duuduu malaelae i de vao ga dau i dogu huaadangada, aagai e dee se madangi e nonu ai ma de hagagilimalali ai huamanu; 12 gai se madangi mmahi mai i ogu daha. Gai se madangi niiagu ne hagahi gi humai gi hagaduasala ina gilaadeu.”
13 Tilo, ia e hanage bei dagodo o hagausinga,
ono hada hebagi e bei dagodo o ssio;
gai ana hoosa e kemo ange i denga igele.
E vakaa naa gidaadeu! Gidaadeu e maakau naa donu!
14 Jerusalem, huuia gi deai baubau i oo lodo gi ola ai goe.
Dee hee maa taulooloa dau daohi denga maanadu baubau i oo lodo?
15 Dahi leo e tala mai loo i Dan,
ma de hagailoo dagodo o de hai ngadaa e humai laa i honga duuduu o Ephraim.
16 “Hagamanadua ange gi denga huaahenua,
gai hagailoo ina i Jerusalem:
‘Dahi hagabuulinga hebagi gu loomai i dahi henua mmao;
gilaadeu e hevaalogi e daamada de hebagi ange gi aduhale o Judah.
17 Gilaadeu gu duuli de aduhale bei denga daane e hagaloosia laa dahi veelenga,
go hiidinga ia gu hai baasi mai gi de au,’
go Tagi Maolunga e hagadaba.
18 Au dahulinga ma au hegau
gu hai ma gu duu adu de mee nei gi de goe.
Deenei doo hagaduasala.
Gai e kona naa donu!
Gai e velo naa donu oo lodo!”
19 Au gu duasala mmao, au gu duasala mmao,
gai gu kona mmao dogu mmae!
Au gu dee baba mmao ogu lodo!
Gai gu bonabona age ogu lodo.
Au gu dee maua i de noho donu ga dee muu.
Go hiidinga au gu langona de ili de hanga manu,
au gu langona de hagailoo o de hebagi.
20 Gu lagolago mmao mee ne oha ga maoha,
de henua alodahi gu maoha ma gu ngadi dagodo ai.
Gai ne daa hagalele donu de maoha ogu hale malo,
ma malo e buibui ai luu baasi.
21 Dee hee maa taulooloa dagu tilo de hagailonga o de hebagi
ma de hagallongo de ili o de hanga manu?
22 ⌊Tagi Maolunga e hagadaba,⌋
“Ogu dangada ni dangada llodo ssenga;
gilaadeu e dee iloo au.
Gilaadeu ni dama llodo ssenga;
gilaadeu e dee tonu ange.
Gilaadeu e heiangi i de hai mee baubau,
gai e dee iloo i de hai tanuaa.”
23 Au ne galo ange ga tilo dagodo o henua i lalo,
gai tilo, e vinigoso ma tee hagatau danuaa;
gai au ne galo age gi de langi,
gai gu deai maalama iai.
24 Au ne galo age gi denga mounga,
gai tilo, gilaadeu e ngalungaalue;
gai duuduu alodahi e ngalungaalue hogi.
25 Au ne galo ange ga tilo, gai gu deai donu dangada;
gai manu llele alodahi i lo te moana gu llele ma gu hulo.
26 Au ne galo ange ga tilo, gai de henua iai hua lagolago gu se ngadi mommee;
ono aduhale alodahi gu oha ma gu maoha
i mada luu mada o Tagi Maolunga ma dono bole laumalie.
27 E hagadaba Tagi Maolunga,
“De henua alodahi e maoha naa ga ngadi dagodo,
gai au e dee oha naa donu gi odi.
28 Henua i lalo e tangi naa,
gai lo te langi i lunga e hagagohu,
go hiidinga gu lava i dagu tala, ma de hagatau mee nei;
au e dee sui naa donu dagu maanadu,
aabe e ahe dagu maanadu.”
29 Denga aduhale gu maatagu,
i delaadeu langona leo o denga daane i honga hoosa
ma denga daane e dilia mee hholu.
Hanu e hulo naa ga mmuni i lodo mee muimui,
hanu e kage age gi magavaa hadu.
Gai denga aduhale alodahi gu dilia;
gu deai donu dangada e nnoho ai.
30 Gai koe de hine hagaaloha,
ni aha naa aau ga hai?
Ni haigamaiana aha doo gahu hagadanuaa i malo mmea,
ma de dau mee hagalaagii goolo?
Gai ni haigamaiana aha dau lebu luoo mada?
Koe e ngadi hagadanuaa donu huu goe.
Oo dau soa gu kino i de goe,
gilaadeu e ssala goe e daa gi magau.
31 Au e langona leo bei de dangi o de hine
e dangi i de masavaa o ono hagalangona,
ia e gonogono i de masavaa e haanau ai dana dama madua —
go de leo o tamaa hine o Zion*tamaa hine o Zion e bei go dangada o Zion, aabe go de aduhale go Zion. e ssala ai dana madangi,
ma de haalo luoono lima ga hagadaba,
“Gu vakaa loo au! Au gu dai ssili mada
i dogu madagu i de gau daa dangada.”