10
Denga diinonga ma de Maadua abodonu
1 De gau Israel, goodou hagalaangona muna a Tagi Maolunga adu gi goodou. 2 E hagadaba Tagi Maolunga:
“Goodou aude ago ange i dahulinga a denga huaahenua,
aabe gi maatagu i denga hagailonga i lo te langi,
e dee galemu donu de maatagu o denga huaahenua i mee nei.
3 Dahulinga a denga huaadangada e deai haigamaiana;
gilaadeu e sele iho dahi manu somo i lodo henua,
gai de labagau ga daa ai dahi diinonga.
4 Gai gilaadeu ga hagalaagii i selevaa ma goolo,
ga tugi gi makaga i de haamaa ma neele
gi dee singasinga saele ai.
5 Olaadeu diinonga e bei de mee e dugi ai laa
denga manu i lo te veelenga kiulii;
olaadeu diinonga e dee maua i de pasa;
gai dangada e saabai saele gilaadeu,
i hiidinga gilaadeu e dee maua i de seesee.
Goodou aude maatagu i denga diinonga nei;
gilaadeu e dee maua donu i de hai adu dahi baubau
aabe se danuaa daudahi gi goodou.”
6 Tagi Maolunga, e deai donu e bei oo dagodo;
go hiidinga koe e maolunga,
gai doo ingoo iai de mmahi.
7 De Hodooligi o denga huaahenua,
goai e dee madagu i de goe?
Deenei de mee e heohi de hai adu gi de goe.
Gai e deai donu e bei oo dagodo,
i magavaa o de gau heiangi alodahi o denga huaahenua,
ma olaadeu nohoanga hodooligi alodahi.*Rev 15.4
8 Gilaadeu alodahi e ssenga ma de llodo ssenga;
gilaadeu e agoago i daho denga diinonga laagau e deai laa olaadeu haigamaiana.
9 Gai denga selevaa ne tugi ga baabaa ni mee mai i Tarshish;
denga goolo ni mee mai i Uphaz.
Gai mee a de labagau ne hai i goolo ma selevaa,
ne hakahu i malo buluu ma de purple —
mee nei alodahi go denga labagau ne haia.
10 Aagai Iahweh go de Maadua abodonu;
go ia de Maadua e mouli laa, ma de Hodooligi e dee ngado mai.
Dono bole e hagangalungalue de henua,
gai denga huaahenua e dee pau ange gi dono bole.
11 Gai goodou hai ange gi gilaadeu: “E dee go denga diinonga ne haia de langi ma henua i lalo, gai gilaadeu e hai naa ga llilo i honga de henua ma lalo de langi.”
12 Go ia ne haia henua i lalo i ono mahi,
ma de hagaduu henua i lalo i dono heiangi,
ma de hhola de langi i hiidinga dono donu ange.
13 De masavaa oona e basa ai, gai vai i lo te langi gu hagalongaa;
gai ia e hai de mama o denga vai gi hanage i luu bido o henua i lalo.
Ia e hai gi laba de uila i de masavaa e pala ai de langi,
ma de hagasao mai de madangi i lodo ana mommee doange mee.
14 Dangada alodahi e ssenga ma tee iloo mee,
de labagau o denga goolo gu hagadogaa ina i ono diinonga.
Ono diinonga e dee ni mee abodonu;
gilaadeu e dee maua i de manavanava.
15 E deai olaadeu haigamaiana, gai ni mee hakadanga;
gilaadeu e llilo naa i de masavaa o delaadeu hagaduasala.
16 Gai e dee aanei dagodo o de ia e hagabinga laa go Tuuhanga o Jacob;
go hiidinga go ia ne haia mee alodahi,
gai ia hogi ne haia Israel, de aamuli o dono boolonga;
dono ingoo go Iahweh o denga hagabuulinga hebagi.
De gaavee gee o dangada o Judah
17 Goodou e nnoho laa i de mommee e duuli ina i denga hagadaumee,
sabaia age oodou sabiningaa mee i honga de gelegele.
18 Gai e hagadaba Tagi Maolunga:
“Tilo, au e maga naa gi daha dangada e nnoho i de henua nei;
au e hai naa gi humai de hai ngadaa gi gilaadeu,
gi langona iho ai e gilaadeu dogu lili.”
19 ⌊Dangada e hagataba,⌋ “Gu vakaa loo au i hiidinga au gu lagohia!
Dogu maanuga e dee maua gi mahu.
Aagai au e hagadaba,
‘Ni muna abodonu, de mee nei dogu magi,
au e hagauda donu de mee nei.’
20 Dogu hale malo gu maoha,
ono daula gu modumodu.
Agu dama gu hulo gee mai i ogu daha, gilaadeu gu dee maaleva;
gai gu deai donu se dangada e doe e hagaduulia age dogu hale malo
aabe go de dau age dogu buibui.
21 De gau hagaloosi e llodo ssenga;
gilaadeu e dee ssili gi iloo i daho Tagi Maolunga.
Deelaa ai, gilaadeu e dee hagadagadaga age
gai alaadeu hagabuulingaa ssiibi gu mavaevae saele.
22 Hagalaangona adu! Dahi longo gu humai —
se hagalongaa laumalie mai i de henua i ngaiho!
E hai naa ga ngadi daakodo denga aduhale o Judah,
ma de hai gi se mommee iai denga jackal.”
Talodalo a Jeremiah
23 Tagi Maolunga, au e iloo bolo de haiava o tangada e dee go ia e hilihilia,
gai e dee go ia e dagina dono haiava e seesee ai.
24 Tagi Maolunga, koe gi hagaheohi ina mai au,
gai haelea donu i de heohi;
gai e dee haelea au i doo lili,
kana haia e goe au ga se ngadi mee.
25 Koe gi bole ange gi denga huaahenua e dee iloo goe,
aama dangada e dee dalodalo adu gi de goe.
Go hiidinga gilaadeu gu oha Jacob;
gilaadeu gu daa ono dangada ma gu odi
ma de oha dono henua ma gu ngadi dagodo.