9
1 Mee naa gi se saalingaa vai dogu biho
gai luoogu mada gi se vai e ssali ai loimada!
Gai au ga dangi ai i de laangi ma de boo
i hiidinga de daaia ga maakau o ogu dangada!
2 Mee naa gi dahi ogu mommee i de vao,
se mommee e nnoho gaainga ai dangada e hagadaga saele,
gai au ga dugu ogu dangada
ga hano gee mai i olaadeu daha,
go hiidinga gilaadeu alodahi ni dangada e dagodo haisala,
gai se hagabuulingaa dangada e dee hai hegau i de mee abodonu.
3 “Olaadeu alelo e bei de mee hholu
e baba ange laa e tili ai denga muna hhadu;
gai e dee go de mee abodonu
e ssula i honga de henua.
Gilaadeu e hagadaga ange donu de baubau,
gai gu dee iloo donu au,
go Tagi Maolunga e hagadaba.
4 Tangada gi kana gi dagidiiloo dangada e paa ange gi de ia,
aude hagadonusia dahi oo daina.
Go hiidinga dangada alodahi ni dangada hadu muna,
gai tangada e baa adu se dangada adi longo.
5 Dahi ma dahi e daahanga tangada e baa ange gi de ia,
gu deai se dangada e daalaa de muna abodonu.
Gilaadeu alodahi gu aabo ange i tala muna hhadu;
gilaadeu e hagadee saohia gilaadeu i de hai de baubau.
6 Gu kona mmao de vaivai haia o dangada,
gu laumalie de hagasenga,
gai dangada gu dee llodo gi iloo e gilaadeu au,”
go Tagi Maolunga e hagadaba.
7 Deelaa ai, e hagadaba Tagi o denga hagabuulinga hebagi:
“Tilo, au e hagagilimalali naa ma de hagatale ange olaadeu dagodo,
gai ni aha ange naa aagu e hai,
i hiidinga o haisala o ogu dangada?
8 Olaadeu alelo e bei tao hagamaakau,
gai e tala ai muna hagasenga.
Dahi ma dahi e basa danuaa ange gi tangada e baa ange,
aagai ono lodo e hagatau dana hai e dugu ai ssele e dada ai ia.
9 E aha, e dee heohi dagu hagaduasala gilaadeu i hiidinga o de mee nei?
go Tagi Maolunga e hagadaba.
Gai e aha, e dee heohi dagu sui ange hegau
a dahi huaahenua e haia mee nei?”
10 Au e dangi naa ma de dangi see i hiidinga o denga mounga,
ma de dangi i hiidinga o mommee iai helii i lodo henua.
Mommee laa gu ngadi daakodo ma teai dangada e seesee ai,
gu dee langona hogi leo o denga manu haangai ai.
Gai denga manu llele ma manu dolodolo gu hulo gee mai i kilaa.
11 “Au e hai naa Jerusalem gi bei de hagabuudungaa mee maoha,
gai gi se mommee e nnoho ai denga jackal.
Gai au e oha naa denga aduhale o Judah
ga hai gi se mommee e deai dangada e nnoho ai.”
12 Goai tangada gu heiangi abodonu e donu ange gi de mee nei? Gai goai a Tagi Maolunga gu tala ange mee nei aagena, gi maua ai e ia i de tala de mee nei? Gu aha gu maoha ai nei de henua ma gu ngadi dagodo be se vao, gu deai dangada e hulo laa kilaa? 13 E hagadaba Tagi Maolunga: “Go hiidinga gilaadeu gu tili agu hainga ne gaavange gi gilaadeu, ma tee hagallongo mai gi de au aabe ne daudali i agu hainga. 14 Aagai gilaadeu ne hagamakaga olaadeu lodo ga daudali ange i denga Baal, bei mee a olaadeu dubuna ne agoago ange ai gilaadeu.” 15 Deenei ai, e hagadaba Tagi o denga hagabuulinga hebagi, de Maadua o Israel: “Tilo, au e haangai ange naa de huaadangada nei i gai mmala ma de hagaunu gilaadeu i vai hagammau. 16 Au e hai naa gilaadeu gi mavaevae saele gi nnoho i denga huaahenua alaadeu ma olaadeu dubuna tigi iloo laa. Au e doolohi naa gilaadeu ma dagu gadilaasa, ga dae ai gi dagu daa gilaadeu gi odi i de maakau.”
17 E hagadaba Tagi o denga hagabuulinga hebagi,
“Goodou hagasaelea age muhuu!
Gai hagahia denga haahine e haia tangi see gi loomai;
alumia denga haahine hugadoo e iloo de hai de mee nei.
18 Gilaadeu gi hagamoolau mai
gi tangi see i gidaadeu,
ga dae ai gi de hoohonu odaadeu ganomada i loimada,
ga malingilingi iho i odaadeu hiihii mada.
19 De leo o tangi see e langona mai i Zion:
‘Gidaadeu gu odi i de maoha!
Gidaadeu gu kona mmao i de dookaa.
Gidaadeu e hulo gee donu i taadeu henua
i hiidinga odaadeu hale gu maoha.’ ”
20 Denga haahine, goodou hagalaangona muna a Tagi Maolunga,
huugea oodou dalinga hagalaangona ai ana muna.
Agoagona ange oodou damaa hine i de hai e hai ai tangi see,
gai goodou hagadau agoagona i de hai tau ange gi de magau.
21 De magau gu gage mai laa lodo odaadeu abaaba vaaligiligi,
ma gu ulu gi lodo odaadeu hale danuaa;
gai gu daa ma gu maakau denga gauligi i honga haiava
ma denga dama daane i mommee e hagabuni ai dangada.
22 Hai ange, “E hagadaba Tagi Maolunga:
‘Angaanga o de gau e ngadi daakodo saele naa
bei denga duudae i lo te duu malaelae,
ma denga grain gu lava laa i de duuduu a de gau hagihagi,
gai e deai donu dangada e hagabudulia.’ ”
23 E hagadaba Tagi Maolunga:
“Tangada heiangi gi dee duuhia donu huu dono heiangi,
gai taane mmahi gi dee duuhia donu huu ono mahi,
tangada lava gi dee duuhia hogi ono goloa lagolago,
24 aagai tangada e lodo e tuhi,
ia gi duuhia dono donu ange ma dana iloo au,
gai go au Tagi Maolunga, de ia e abodonu laa,
ma de hai hegau i de hagamodu heohi ma de heohi i henua i lalo,
go hiidinga aanei mee oogu e malangilangi ai,*1 Co 1.31; 2 Co 10.17
go Tagi Maolunga e hagadaba.
25 Tilo, e tae mai naa laangi, go Tagi Maolunga e hagadaba, aagu e hagaduasala ai dangada e tuu dagaholiage laa donu huu olaadeu angaanga, gai e dee tuu dagaholiage olaadeu lodo — 26 go de gau Egypt, ma de gau Judah, ma de gau Edom, ma de gau Ammon, ma de gau Moab ma gilaadeu alodahi e nnoho i lodo henua, aama gilaadeu e dahi laa baasi o olaadeu biho. Go hiidinga denga huaahenua nei alodahi e dee tuu dagaholiage, gai e bei ai hogi de gau Israel alodahi, gilaadeu e dee tuu dagaholiage olaadeu lodo.”