12
De nanu o Jeremiah
1 Tagi Maolunga, koe e heohi donu,
i de masavaa aagu e tala adu ai dogu heohi.
Aagai au e basa adu gi de goe i dagodo o dau hagamodu muna.
Gu aha de gau baubau e hagadagadaga age ai laa?
Gai gu aha de gau vaivai daakodo alodahi e duadonu ai laa?
2 Koe ne doo gilaadeu, gai olaadeu aga gu ssomo;
gilaadeu gu ssomo ma de hhua lagolago.
Gilaadeu e dagudagu doo ingoo i olaadeu ngudu,
aagai olaadeu lodo e mmao gee donu i de goe.
3 Tagi Maolunga, koe e iloo ogu dagodo;
koe e gidee ogu dagodo ma de hagatale dagodo o ogu lodo adu gi de goe.
Daagina gilaadeu gaavee bei denga ssiibi e kave laa e daa gi maakau,
gai vaae gilaadeu e hagadabena ange
gi de laangi o de daa gi maakau!
4 Dee hee maa taulooloa de ngadi dagodo o de henua,
gai denga helii alodahi i honga de gelegele gu mmae?
Go hiidinga dangada e nnoho i kilaa e baubau,
denga manu dolodolo ma manu llele gu maakau,
go hiidinga dangada e hagataba,
“Ia e dee gidee donu mee e hai mai gi gidaadeu.”
Tagi Maolunga e basa ange gi muna a Jeremiah
5 “⌊Jeremiah,⌋ noo koe e dalea donu huu
i de savini e houhou ange gi dangada,
gai dee hee dau hai e houhou ange ai gi denga hoosa?
Noo koe e baguu donu huu i de henua e nnoho paba ai dangada,
gai ni aha naa aau ga hai i lodo mee muimui o Jordan?
6 Oo daina, ma doo huaabodu
tee hai hegau adu gi de goe i de mee abodonu;
gilaadeu e kona donu de hai baasi adu gi de goe.
Aude hagadonusia alaadeu muna,
e dee galemu donu delaadeu pasa danuaa i de goe.
7 Au gu tili dogu hale;
au gu tili de huaahenua o dogu boolonga;
au e dugu ange naa de ia oogu e aloha ai gi ono hagadaumee.
8 Dogu boolonga gu bei dagodo o de laiono i lodo henua.
Ia e goo mai gi de au;
deenei ai, au gu kino ai.
9 E aha, dogu boolonga gu bei nei de haonga o de hyena,
gai denga manu llele e gaina laa manu maakau gu duuli ia e hai baasi ange?
Goodou hulo hagabaa ina mai denga manu alasala gi gaina gilaadeu.
10 De gau hagaloosi soa e oha naa dagu veelengaa grape,
ma gu dagadagahi dogu alahenua;
gilaadeu e hai naa dogu alahenua mahamaha
gi se mommee e ngadi dagodo.
11 Gilaadeu gu hai de henua ma gu ngadi henua,
gu ngadi dagodo ma de dangi mai gi de au.
De henua alodahi gu se ngadi mommee,
aagai gu deai donu dangada e anga ange aagena.
12 De gau e oohaa mee gu nnoho
i mommee maolunga alodahi i de vao,
e deai laa mee e ssomo ai,
gai de gadilaasa a Tagi Maolunga e oha naa de henua
mai i dahi bido ga dae ai gi de bido ange laa;
gai gu deai dangada e maua gi ola.
13 Gilaadeu e doo denga grain
aagai e hagihagi denga manu daladala;
gilaadeu ne ngadi hagadaalea donu huu gilaadeu,
aagai e deai donu mee e maua ai.
Gilaadeu e dookaa i de momo alaadeu mee ne hagihagi,
go hiidinga de lili o Tagi Maolunga gu laumalie.”
14 E hagadaba Tagi Maolunga, “De gau baubau alodahi i ogu gaogao e gaavee laa de mommee aagu gu bolo ange gi ogu dangada go de gau Israel, au e kave gee naa gilaadeu mai i olaadeu henua, ma de aau gee dangada o Judah mai i olaadeu daha. 15 Aagai dua dagu aau gee gilaadeu mai i olaadeu henua, gai au e ahe ange naa ga lodo aloha ange gi gilaadeu, ga hagaahe mai dahi ma dahi gi dono boolonga aama dono henua donu. 16 Gai de masavaa naa huu alaadeu e kana ange ai ga ago haiava o ogu dangada, ma de hagatoo donu i dogu ingoo, ga hagataba, ‘Au e hagatoo donu i de mouli o Tagi Maolunga’ — bei delaadeu hai ne agoago ange ai ogu dangada, gi hagatoo donu i de ingoo o Baal — gai gilaadeu e nnoho paba naa i magavaa o ogu dangada. 17 Gai noo dahi huaahenua e dee hagallongo mai, gai au e oha naa ga aau gee mai i dono mommee,” go Tagi Maolunga e hagadaba.